Эклц 13 - Хальмг келнд орчулсн Әрүн Бичлһс

Абрам Лот хойр салҗана

¹ Египетәс Абрам гергтәһән, цуг эдл-ахутаһан Негев орв. Лот бас теднлә йовна.

² Абрам ода олн малта, цаһан мөңгтә, алтта болв.

³ Негевәс Бет-Эльд күртлән тер йовад йовв. Тенд Бет-Эль болн Ай хоорнд урднь терүнә шатр бәәлә.

⁴ Тер һазрт Абрам экләд йовхдан бәрц бәрлһнә бәәр кесмн. Абрам тенд Деед Эзнә нер дуудла.

⁵ Абрамла хамдан йовсн Лот бас олн үүрмг болн бод малта, бәрсн шатрмудта бәәҗ.

⁶ Тер һазр тедниг хамднь багтаҗ, эс теҗәҗ чадад бәәв. Яһад гихлә зөөрнь дегд ик болад, хамдан бәәҗ чадлго бәәв.

⁷ Абрамин малчнр болн Лотын малчнр хоорнд цүүгән болв. (Тиигхд тер һазрт кананахн болн перизмүд бүүрлҗәсн бәәҗ.)

⁸ Тегәд Абрам Лотд иигҗ келнә: – Чи ман хойрин хоорнд, чини малчнр мини малчнрин хоорнд цүүгән бичә болтха. Яһад гихлә бидн төрл-садн улсвидн.

⁹ Эн һазриг чи цугтаһинь үзҗәнч? Нанас сал. Кемр чи зүн үзг тал йовхла, би барун үзг тал эргнәв, кемр чи барун үзг тал йовхла, би зүн үзг тал эргәд йовнав.

¹⁰ Йордана тегш һазр Цоар күртл, Деед Эзнә сад мет, Египетин һазр мет сәәнәр услгдҗахиг Лот үзнә. (Эннь Деед Эзн Содомиг болн Гомораг күүчхәс урд тиим бәәлә.)

¹¹ Лот бийдән Йордана цуг тегш һазр шүүҗ авад дорд үзг хәләһәд йовна. Тиигҗ тедн нег-негнәсн салцхав.

¹² Абрам Канан һазрт бүүрләд бәәв. Лот болхла, Содомас хол биш шатрмудан бәрәд, тегш һазрт бәәх балһсдын дунд бүүрлв.

¹³ Содомин әмтн хар саната бәәҗ, Деед Эзнә өмнәс йир ик килнц һарһҗаҗ.

¹⁴ Лотыг салсна хөөн Деед Эзн Абрамд келнә: – Эн бәәх ормасн эргндән хәләлч: ар үзг болн өмн үзг тал, дорд болн деед үзг тал хәлә.

¹⁵ Чини үзҗәх цуг һазриг Би чамд болн чини хөөт үйнрт мөңкинд өгнәв.

¹⁶ Чини хөөт үйнриг һазрин шора мет тооһарнь икдүлнәв. Тегәд кемр кен негнь шора тоолҗ чадх болхла, чини хөөт үйнр бас тоолгдад бәәх.

¹⁷ Чи босад, эн һазрар утднь, өргнднь йовад үз. Яһад гихлә Би энүг чамд өгнәв.

¹⁸ Абрам шатрмудан ормаснь көндәһәд, Хевронас хол биш бәәсн Мамрен алдр хар моддын хаҗуд бүүрлхәр һарад йовна. Тендән Абрам Деед Эзнд бәрц бәрдг бәәр кенә.