Эклц 12 - Хальмг келнд орчулсн Әрүн Бичлһс

Абрамин дуудвр

¹ Деед Эзн Абрамд келнә: – Эврәннь бәәх һазрасн, төрл-саднасн, эврәннь эцкин гертәс һарад Мини үзүлсн һазрур йов.

² Чамас Би алдр әмт һарһад, Чамд әдс өгнәв. Чини нериг Би өөдән өргнәв, Чи йөрәлин көрң болхич.

³ Чамаг йөрәҗәх әмтиг Би йөрәнәв, Чамаг харасн күүг Би харанав. Чамар дамҗулҗ Һазр деерк цуг улс тохмарн әдс авцхах.

⁴ Тегәд Абрам Деед Эзнә келсәр йовв, терүнлә хамдан Лот йовв. Харанас һарад йовхд, Абрам далн тавта билә.

⁵ Сара гергән, ач көвүн Лотыг, Харанд эдлҗәсн эдл-ахуһан, олҗ авсн мухласан тер бийләһән авв. Тедн Канан һазр тал йовад, тиигән ирв.

⁶ Шехемд Морэ гидг нертә алдр хар модн урһҗасн орм күртл Абрам эн һазрар йовв. Тер цагт тенд кананахн бәәҗ.

⁷ Деед Эзн Абрамд үзгдәд келнә: – Би эн һазриг чини хөөт үйнрт өгнәв. Үзгдәд ирсн Деед Эзнд Абрам тенд бәрц бәрдг бәәр кев.

⁸ Тендәс тер Бет-Эләс дорд үзг тал бәәх уулта һазрур йовна. Тенд Бет-Эль балһсна барун үзгин болн Ай балһсна дорд үзгин хоорнд шатрмуд бәрнә. Тенд бәрц бәрх бәәр Деед Эзнд кенә. Деед Эзнә нер тер дуудна.

⁹ Тегәд Абрам тендәсн Негев тал цаарандан йовна.

Абрам Египетд

¹⁰ Тер һазр деер харһнлһн болв. Харһнлһн дегд күчр болснас көлтә Абрам Египетд цаг зуур бәәхәр йовв.

¹¹ Египет тал өөрдҗ йовад Сара гергндән тер иигҗ келнә: – Чамаг сәәхниг би медҗәнәв.

¹² Египетихн чамаг үзсн цагтан келх: «Энтн терүнә гергн», – тегәд намаг алад, чамаг әмд үлдәх.

¹³ Чини төлә нанд сән болдгар, чи мини дү күүкн гиһәд кел. Тегәд би чини нилчәр әмд үлдх биләв.

¹⁴ Абрамиг Египетд ирхлә, Египетин улс Сараг йир сәәхн бәәсинь үзв.

¹⁵ Хаана ямта улс Сараг үзхләрн, тедн хаанд Сараг буульҗ. Тегәд Сараг хаана герт авч одна.

¹⁶ Саран төлә Абрамиг тер сәәнәр тосв. Абрамд хөд, мал, элҗгнс, зарцнр болн темәд олн болв.

¹⁷ Болв Абрамин Сара гергнәс көлтә хаанд, терүнә герт бәәх цуг әмтнд Деед Эзн күнд гем өгв.

¹⁸ Тегәд хан Абрамиг дуудад сурна: – Чи намаг яһвч? Эн чини гергн гиһәд яһад нанд эс келвч?

¹⁹ Яһад чи «Эн мини дү күүкн» гиҗ келвч? Намаг терүгәр гергән кетхә гиҗ иигҗ келвч? Чини гергн эн. Энүгән авад йов!

²⁰ Хан заквр өгнә. Терүнә әмтн Абрамиг гергтәһинь хамднь, бәәсн цуг эдл-ахутаһинь хаалһднь орулад йовулна.