Эклц 10 - Хальмг келнд орчулсн Әрүн Бичлһс

Ноахин көвүдин хөөт үйнр

¹ Шем, Хам болн Япет гидг Ноахин көвүдин уңг-тохм эн. Усна аюлын хөөн теднәс көвүд төрв.

² Япетин көвүд: Гомер, Магог, Мадай, Яван, Тувал, Мешех болн Тирас.

³ Гомерин көвүд: Ашкеназ, Рипат болн Тогарма.

⁴ Явана көвүд: Элиша, Таршиш, Киттим болн Роданим.

⁵ Теңгсин көвәһәр бәәдг әмтн теднәс эврә һазрар түгвә. Тедн эврә әмтн дунд эврә келтә, эврә отгта болцхав.

⁶ Хамин көвүд: Куш, Мицраим, Пут болн Канан.

⁷ Кушин көвүд: Сева, Хавила, Савта, Раама болн Савтеха. Раамаин көвүд: Шебә болн Дедан.

⁸ Һазр деер түрүңк күчтә дәәч болсн Нимродын эцкнь бас Куш бәәҗ.

⁹ Деед Эзнә евәләр тер күчтә аңһуч бәәҗ. Тегәд иигҗ келгднә: «Деед Эзнә евәләр күчтә аңһуч болсн Нимродла әдл».

¹⁰ Терүнә орн-нутгт түрүләд ик чинртә бәәсн балһсд: Вавилон, Эрех, Аккад болн Калне – цугтан Шинар гидг һазрт бәәҗ.

¹¹ Тер һазрас Нимрод Ашур тал һарна. Тенд Ниневе, Реховот-Ир, Калах балһсд болн

¹² Ниневе Калах хойрин хоорнд Ресен гидг алдр балһс тосхв.

¹³ Мицраим лудмудын, анамудын, лехавмудын, наптухмудын,

¹⁴ патрусмудын, каслухмудын (каслухмудас пилистмүд үүдвә), каптормудын эцк.

¹⁵ Канан Сидона эцк. Сидон энүнә түрүн үрн. Дәкәд хетин,

¹⁶ евүсмүдин, амореймүдин, гергашмудын,

¹⁷ хивеймүдин, аркеймүдин, синмүдин,

¹⁸ арвадмудын, цемармудын болн хаматмудын эднә эцк Канан бәәҗ. Хөөннь Канана отга улс тарна.

¹⁹ Канана һазрин меҗә Сидонас Герар тал, Газа нертә һазр күртл, тендәс Содом, Гомора, Адма болн Цевоим тал, Лаша балһснд күрнә.

²⁰ Хамин көвүд отгарн болн келәрн эврә һазрта, улста болсарн тиим болҗана.

²¹ Япетин ах Шемәс бас көвүд төрнә. Эверин цуг хөөт үйнрин өвк эцкнь Шем болҗана.

²² Шемин көвүд: Элам, Ашур, Арпакшад, Луд, Арам.

²³ Арамин көвүд: Уц, Хул, Гетер болн Маш.

²⁴ Арпакшадас Шелах төрнә. Шелахас Эвер төрнә.

²⁵ Эверәс хойр көвүн төрнә: негнднь Пелег гидг нер өгнә, яһад гихлә терүнә өдрмүдт һазр хувагдла. Терүнә дүүд Йоктан гидг нер өгнә.

²⁶ Йоктанас төрсн көвүднь: Алмодад, Шалеп, Хацармавет, Ярах,

²⁷ Хадорам, Узал, Дикла,

²⁸ Овал, Авимаэл, Шебә,

²⁹ Офир, Хавила болн Йовав. Эдн Йоктана көвүд.

³⁰ Теднә бүүрлсн һазр Мешаһас Сепар күртл дорд уулын нутгт бәәнә.

³¹ Шемин көвүд отгарн болн келәрн эврә һазрта, эврә улста болсарн тиим болҗана.

³² Ноахин көвүдин отг тохм улсарн тиим. Усна аюлын хөөн һазр деерәһүр теднәс цуг әмтн сална.