Давтх Закан 9 - Хальмг келнд орчулсн Әрүн Бичлһс

Израилин эврә үнн йовдлын төлә биш

¹ Соңстн, Израилин улс! Ода тадн Йордан һолыг һатлҗанат. Тенд таднас тооһарн олн болн чидлтә, батар бәргдсн ик болн теңгрт күрм балһсдта,

² ик болн өндр нурһта анакмуд гидг әмтнә һазр авхар седҗәнәт. Әмтн ю келҗәхинь тадн медләт, соңслат эсий: «Анакмудыг кен дааҗ сөрлцх?!»

³ Деед Эзн, тана Бурхн, тадна өмн һал мет цугинь шатаҗ йовхиг ода медҗ автн. Тедниг Тер алад, таднд диилвр өгчәнә. Тегәд тадн Деед Эзнә андһар өгсәр теднә һазриг булаҗ авад, шулуһар тедниг алхит.

⁴ Деед Эзн, тана Бурхн, тедниг көөһәд һарһхла, бийдән бичә келтн: «Чикәр бәәснд мадниг эн һазр эзлтхә гиҗ Деед Эзн нааран авч ирв». Уга, тер олн келн-улс хорта йовдл һарһснд Деед Эзн теднә һазриг таднд өгчәнә!

⁵ Тадн ирәд, теднә һазриг эзләд авхит. Тернь зөвтә болн чикәр кесәр биш болҗана. Яһад гихлә Деед Эзн, тана Бурхн, эн һазриг таднд өгчәхләрн, тер әмтиг бурута гиҗ тоолҗана. Дәкәд тадна өвкнрт – Абрахамд, Ицхакд болн Яковд – өгсн андһаран күцәхәр тиигв.

⁶ Деед Эзн, тана Бурхн, тер йир сәәхн һазриг эзлтхә гиҗ өгхләрн, таднд чикәр бәәснд биш (уга, тадн йир зүткә улст!).

Хорив уулын хаҗуд шүтәнд мөрглһнә тускар сана оруллһн

⁷ Көдә һазрт тадн Деед Эзиг, тана Бурхиг, яһҗ уурлулсан сантн, бичә марттн. Египетәс һарсн өдрәс авн нааран иртлән Деед Эзнә өмнәс тадн мел буцад йоввт.

⁸ Хоривин хаҗуд тадн Деед Эзиг йир уурлулвт. Тиигхд Тер тадниг мел ка цокхар седлә.

⁹ Уул деер һарад Деед Эзнә таднла кесн Бооцана хавтха чолуд авхин төлә, би тенд хот идлго, юм уулго 40 өдр, 40 сө давулув.

¹⁰ Деед Эзн нанд Бооцана хойр хавтха чолу өгв. Хамцана әмтн цугтан хургт хурхла, уул деер шатҗах һалас Деед Эзнә келснь цугтан, Бурхна һарар тер чолуд деер бичгдҗ.

¹¹ Тегәд 40 өдр, 40 сө давв. Деед Эзн нанд хавтха хойр чолу өгв. Теднь Бооцана чолуд.

¹² Деед Эзн нанд келв: «Шулуд, бу! Египетәс чини көтлҗ һарһсн әмтн керг уга болҗана. Мини зааһад закчасн хаалһас тедн шулун хаҗиһәд эргв! Тедн бийдән цутхсн кегдл кеҗ».

¹³ Деед Эзн нанд келв: «Эн әмтнә зүткәһинь Би үзҗәнәв!

¹⁴ Намаг бичә хөрҗ бәр. Би тедниг алнав, теңгр дор теднә нердиг биллнәв. Чамас болхла, теднәс чидлтә болн тооһарн олн улс үүдәнәв».

¹⁵ Би хәрү эргәд уулас буувув. Уул һалар падрад шатв. Мини һарт Бооцана хойр хавтха чолун билә.

¹⁶ Деед Эзнә, тана Бурхна, өмн тадн үнндән килнц һарһситн би үзүв – бийдән бүрүһин цутхсн кегдл кеситн үзүв. Деед Эзнә закч заасн хаалһас тадн шулун хаҗиввт!

¹⁷ Тегәд би хойр хавтха чолудыг һазр деер хайлав – тадна нүүрт тедниг хамхлув.

¹⁸ Дарунь би дәкн Деед Эзнә өмн түргүр унув. Дәкн 40 өдр болн 40 сө хот идсн угав, юм уусн угав. Деед Эзнд дурго юм кеһәд, Терүг уурлулад, тадн килнц һарһснд би тиигүв.

¹⁹ Нанд әәмшгтә болв, Деед Эзн уурлсн цухлдан болн һалзурхларн тадниг алхар седҗәв. Болв эн саамд Тер намаг бас соңсв.

²⁰ Деед Эзн Ахаронд бас дегд уурлв. Терүг алхар седв, болв тиигхд би Ахарона төлә бас сурув.

²¹ Тадна килнц – цутхад кесн бүрүг би шатачкув, хамхлув, үүлүв, тоос кеһәд зүлгәд үүлүв. Тер тоосиг уулас һооҗҗасн уснд хайлав.

²² Тадн Деед Эзиг Таверад чигн, Массад чигн, Киврот-Таавад чигн уурлулвт.

²³ Кадеш-Барнеаһас хаалһд һартн гиҗ Деед Эзн таднд закхлаг, Тер иигҗ келхлә: «Йовад Мини өгчәх һазриг тадн эзлтн!» Болв тадн Деед Эзиг, тана Бурхиг, соңссн угат, итксн угат. Терүг оньгтан авсн угат.

²⁴ Тадниг мини медснәс авн, Деед Эзиг тадн соңслго бәәввт!

²⁵ Би Деед Эзнә өмн түргүр унад 40 өдр, 40 сө сунад кевтүв. Яһад гихлә Тер тадниг алнав гиҗ келв.

²⁶ Би Деед Эзиг сурҗ эрүв: «Деед Эзн Бурхн, Эврәннь улсиг, Эврәннь зөөриг бичә алтн! Тедниг Та Эврәннь алдр күчәр сулдхвт, чидлтә һарарн тедниг Египетәс көтлҗ һарһвт.

²⁷ Эврәннь мухла Абрахамиг, Ицхакиг болн Яковиг тодлтн, эн әмтнә һацҗах заңгиг бичә хәләтн, терүнә буруг болн килнциг бичә хәләтн.

²⁸ Эс гиҗ мадниг Тана көтлҗ һарһсн һазрт келцхәх: „Деед Эзн өгнәв гисн һазртан тедниг күргҗ чадсн уга. Теднд дурго болв, тегәд тедниг алхар көдә һазр тал дахулад йовв“.

²⁹ Болв тедн Тана улс болн Тана зөөр. Тедниг Та Эврәннь алдр күчәрн, делгү һарарн дахулҗ һарһвт!»