Давтх Закан 8 - Хальмг келнд орчулсн Әрүн Бичлһс

Деед Эзнә сә кеснә тускар медтхә гиҗәнә

¹ Эндр мини өгчәх зааврмудыг цугтаһинь батар бәртн, күцәтн. Тегәд тадн әмд йовхит, тооһарн олн болхит. Тадна өвкнрт Деед Эзн өгх болад андһар өгсн һазрт тадн ирәд эзлхит.

² Деед Эзн, тана Бурхн, тадниг тогтнулхин болн сөрхин төлә, 40 җилдән тадниг көдә һазрар дахулҗ йовсиг сантн. Терүнә зааврмудыг күцәҗ кехит эс гиҗ күцәҗ кешгоһитн медхәр тиигв.

³ Тадниг тер тогтнулад, харһнулад, манна хотар асрад йовв. Тиим хотын тускар тадн чигн, тадна өвкнр чигн меддго билә. Зуг һанцхн өдмгәр күн әмд бәәдгог таднд Деед Эзн медүлхәр седҗәв. Деед Эзнә үг болһнас күн әмд-менд җирһнә!

⁴ Эн 40 җилин туршарт тадна хувцн элсн уга, тадна көл хавдсн уга.

⁵ Деед Эзн, тана Бурхн, тадниг эцк көвүһән сурһҗах кевтә сурһҗахиг медтн!

⁶ Деед Эзнә, тана Бурхна, закврмудыг күцәтн, Терүнә йовсн хаалһар йовтн, Терүг икәр күндлтн.

⁷ Деед Эзн, тана Бурхн, тадниг йир сәәхн һазрт дахулад авч ирх. Тенд усна урсхулмуд бәәнә, тиньгр һазрар болн уулмуд дундас булгуд болн һазр дор бәәдг усн хаһрад һарчана.

⁸ Буудята болн ичмәтә, уста үзмтә, инҗр, гранат болн олив модта, зөөгин балта һазрт тадниг Деед Эзн авч ирх.

⁹ Эн һазрт тадн өлн бәәшгот, юн чигн дуту болшго. Терүнә чолудт төмр бәәнә, уулас улан мөңг авч чадхит.

¹⁰ Цадхларн таднд йир сәәхн һазр өгсн Деед Эзиг, тана Бурхиг, магттн.

¹¹ Хәләтн, Деед Эзиг, тана Бурхиг бичә марттн. Мини эндр таднд келҗәх Терүнә зааврмудыг, закадыг болн зокалмудыг цугтаһинь күцәтн.

¹² Тадн цадтлан хот идхләрн, сән гермүд бәрхләрн, терүндән бәәхләрн,

¹³ олн бод болн үүрмг малта, дала цаһан мөңгтә болн алтта, олн зүсн-зүүл зөөртә болхларн,

¹⁴ бичә караглтн, Деед Эзиг, тана Бурхиг, бичә марттн. Тер тадниг Египетәс, бәрәнәс һарһҗ авла.

¹⁵ Тадниг ик гидг болн әәмшгтә көдә һазрар, хорта моһас болн чим хорхас дундаһар, хагсу болн усн уга һазрар дахулҗ йовулв. Тадна төлә хад чолунас ус Тер һарһв.

¹⁶ Көдә һазрт Тер тадниг манна хотар асрв. Тиим юм тадна өвкнр меддго билә. Тадниг Тер тогтнулад болн сөрәд бәәхләрн, хөөннь таднд сән болтха гиҗ санҗав.

¹⁷ Эврә чидләрн эн зөөриг кевтнь олв гиҗ бичә сан!

¹⁸ Деед Эзиг, тана Бурхиг, санҗ йовтн. Таднд зөөрән олхд Тер дөң болҗана. Эндр өдр күртл тадна өвкнрлә кесн бооцаг Тер бәрҗәнә.

¹⁹ Кемр тадн Деед Эзиг, тана Бурхиг, мартад, талдан бурхд дахад, теднд шүтәд мөргхләг, тиигхлә маһд уга тадн үкхит. Энүнә тускар тадниг эндр саглҗанав!

²⁰ Деед Эзн тадна өмн, уга кеҗәх тер әмтнлә әдл, тиигҗ тадн үкхит. Яһад гихлә тадн Деед Эзнә, тана Бурхна, үг соңссн угат.