Давтх Закан 7 - Хальмг келнд орчулсн Әрүн Бичлһс

Ханана улсиг шүтәдтәһинь хамднь уга келһнә заавр

¹ Деед Эзн, тана Бурхн, тадниг эзлхәр бәәх һазрт күргәд тендәс олн улс дундас: хетмүдиг, гергашмудыг, амореймүдиг, кананахныг, перизмүдиг, хивеймүдиг болн евүсмүдиг көөхлә – долан келн-улс таднас тооһарн олн болн күчтә.

² Деед Эзн, тана Бурхн, тедниг тадна һарт орулхла, тадн тедниг диилхлә, тиигхлә тедниг буйсаһад уга кетн! Теднлә ямаран чигн бооца бичә кетн, тедниг бичә харстн.

³ Теднлә бичә төрл-садн болтн, эврә күүкдән теднә көвүдт бичә мордултн. Теднә күүкдәр көвүдтән герг бичә кетн.

⁴ Эс гиҗ тедн тадна көвүдиг Нанас салһх, көвүдтн талдан бурхнд мөргцхәх! Тегәд Деед Эзн таднд уурлад, тер кемдән тадниг алх.

⁵ Иигҗ кетн: теднә тәкл тәкдг орминь хамхлтн, әрүн чолудынь хамхлтн, Ашеран моддыг чавчтн, кегдлмүдинь шататн!

⁶ Тадн Деед Эзнә, тана Бурхна, әрүн улс болҗанат. Һазр деер бәәх цуг әмтнәс тадниг Терүнә үнтә гисн зөөрнь болтха гиҗ Деед Эзн, тана Бурхн, шүүҗ авв.

⁷ Деед Эзн таднд дурлад талдан улсас тооһарн олн гиҗ шүүҗ авсн уга. Уга, тадн тооһарн хамгин баһ биләт!

⁸ Зуг Деед Эзн таднд дурта, тадна өвкнрт өгсн андһаран бәрҗ хадһлҗана. Эн төләд Тер тадниг авч һарв, күчтә һарарн бәрәнәс, Египетин хаана һардврас сулдхв.

⁹ Деед Эзн, тадна Бурхн, йосндан итклтә Бурхн болҗахиг медҗ автн. Кесн бооцаһарн, Терүнд дурта болн заавринь күцәдг миңһәд үйин улс күртл, Тер итклтә.

¹⁰ Болв Терүг һазалсн улсиг Тер цааҗлх, цугтаһинь шулун алх!

¹¹ Тер учрар мини эндр таднд өгчәх зааврмудыг, зокалмудыг болн закадыг күцәтн.

¹² Кемр тадн эн закадыг соңсхла, кемр батар бәрәд күцәхлә, тиигхлә Деед Эзн, тана Бурхн чигн, тадна өвкнрлә кесн тер бооцанд итклтә болх.

¹³ Деед Эзн таднд дурта болх, тадниг әдслх, тооһарн олн улс болхит. Деед Эзн тадна хөөт үйнриг тер һазрт әдслх, тадна һазрин урһциг, тадна буудяг, чаһриг болн олив модна тосиг, үкрмүдин төлиг, хөөдин болн ямадын төлиг әдслх (тер һазриг таднд өгх болҗ Деед Эзн тадна өвкнрт андһаран өглә).

¹⁴ Цуг талдан улсас тадн икәр әдслгдхит. Тадн дунд үрн тогтдго залус, эс гиҗ күүкд улс, эс гиҗ төл тогтдго малмуд уга болх.

¹⁵ Тадниг Деед Эзн ямаран чигн гем-шалтгас гетлгх. Египетин үкүд гем таднд Тер илгәшго (тадн теднә тускар меднәт!). Тиим гемиг тадна дәәснд буулһх.

¹⁶ Тадна һарт Деед Эзнә, тана Бурхна, бәрүлсн цуг улсиг алхит. Тадн тедниг хармнх зөв угат, теднә бурхдт шүтх зөв угат. Яһад гихлә тертн таднд бәрән болх.

¹⁷ Тадн ухалх болвзат: «Эн улс маднас тооһарн ик. Бидн яһҗ теднәс һазр булаҗ авхмб?»

¹⁸ Болв бичә теднәс әәтн! Деед Эзн, тадна Бурхн, Египетин хааг болн Египетиг кевтнь яһсинь санлт.

¹⁹ Эврән нүдәрн үзсн алдр болн күнд сөрлтиг, темдгүдиг чигн, өвәрц юмсиг чигн сантн. Деед Эзн, тана Бурхн, тадниг Египетәс Эврәннь күчтә делсн һарарн көтләд һарһсиг сантн. Деед Эзн, тана Бурхн, эндр тадна әәҗәх цуг олн-әмтнлә тиим йовдл һарһх.

²⁰ Тер бас түргин баг теднд илгәх, әмд үлдснь, таднас бултснь чигн үкх.

²¹ Бичә әәтн, тадн дунд Деед Эзн, тана Бурхн, бәәҗәнә, алдр болн әәмшгтә Бурхн!

²² (Болв Деед Эзн, тана Бурхн, тер улсиг адһл уга көөх. Таднд шулуһар тедниг алх арһ учршго, эс гиҗ тенд зерлг аңгуд таднд әәмшг болад дегд олар өсх.)

²³ Деед Эзн, тана Бурхн, тер улсиг диилх диилвр таднд өгх. Тедн дунд Тер ик үүмә орулх, тегәд тедн алгдх.

²⁴ Теднә хаадыг диилх арһ Тер таднд өгх. Теднә нердиг мел теңгр дор тадн үлдәшгот. Нег чигн күн тадна өмн торҗ чадшго, тедниг цугтаһинь алхит.

²⁵ Теднә һарар кегдсн бурхдыг шататн. Тер кегдлмүд ширдсн цаһан мөңгнд болн алтнд авлгдҗ бичә автн, эс гихләг бәрәнд орхит. Яһад гихләг Деед Эзнд, тана Бурхнд, эн җигшүртә юмн.

²⁶ Җигшүртә юм бичә гертән орултн, эс гихлә эврән терүнлә хамдан буйсагдхит. Тиим юмн таднд җигшүртә болн йир му болтха – эн кевтән буйсагдх юмн.