Давтх Закан 6 - Хальмг келнд орчулсн Әрүн Бичлһс

Бурхиг икәр күндлх болн Бурхнд дурлх заавр

¹ Деед Эзн, тана Бурхн, таднд дасхтха гисн зааврмуд, зокалмуд болн закад эн, одад эзлхәр йовх һазртан тедниг тадн күцәх йостат.

² Җирһлиннь насни туршарт Деед Эзиг, эврәннь Бурхиг, икәр күндлх зөвтәт. Мини дасхҗах Терүнә өгсн зокалмудыг болн зааврмудыг тадн цугтаһинь күцәх йостат. Тиим кевәр тадна үрд болн ачнр-зеенр кех зөвтә, тегәд тадн удан җирһҗ бәәхит.

³ Болв соңс, Израиль! Энүг цугтаһинь төвәр бәртн, күцәтн! Тегәд таднд сән болх, тадн һазр деер тооһарн олн болхит. Тер һазр үсәр болн балар байн, энүг таднд Деед Эзн, тана өвкнрин Бурхн, өгх болла.

⁴ Соңс, Израиль! Деед Эзн, мадна Бурхн, – ор һанцхн Деед Эзн!

⁵ Дурл Деед Эзнд, чини Бурхнд, зүркәрн, седкләрн, цуг чидләрн.

⁶ Эндр чамд мини өгчәх закрмҗс кезә чигн чини чееҗин тодлвр болтха.

⁷ Эврәннь үрдтән давтад келҗ өгчә, даңгинд тедниг давтад бә – гертән бәәхләрн эс гиҗ хаалһд йовхларн, нөөртән орхларн эс гиҗ босхларн.

⁸ Темдг гиһәд һартан бо, чини маңнад боодһа болад бәәтхә.

⁹ Эврәннь үүднә тотхд болн балһсна ик үүднд тедниг бич.

¹⁰ Деед Эзн, чини Бурхн, чамаг эн һазрт күргх. Энүнә тускар чини өвкнрт Абрахамд, Ицхакд болн Яковд чамд өгх болад Деед Эзн андһар өгч. Тенд ик болн цецгәлҗәх балһсд бәәнә – чини тосхсн биш.

¹¹ Гермүднь зөөрәр дүүрң – чини цуглулсн биш, худгуд – чини малтсн биш, уста үзмин болн олив модна тәрәд – чини тәрсн биш. Тенд чи цадтлан идхич!

¹² Болв хәләҗә, Деед Эзиг бичә март – чамаг Египетәс, мухлан һазрас көтлҗ һарһсиг.

¹³ Деед Эзиг, эврәннь Бурхиг, икәр күндл, Терүнд цергл, Терүнә нерәр андһар өг.

¹⁴ Тадна эргнд бәәх әмтнә талдан бурхдт бичә шүттн.

¹⁵ Тадн дунд бәәх Деед Эзн, тана Бурхн, хару Бурхн. Кемр уурлхларн Тер тадниг һазр деерәс уга кех!

¹⁶ Деед Эзиг, тадна Бурхиг, Массад Терүг сөрснлә әдләр бичә сөрәд бәәтн.

¹⁷ Деед Эзнә, тана Бурхна, өгсн зааврмудыг, закадыг болн зокалмудыг күцәтн.

¹⁸ Терүнә нүднд чик болн сән болхиг кетн. Тегәд таднд сән болх: тадн ирәд йир сәәхн һазр эзлхит, терүг тадна өвкнрт өгх болҗ Деед Эзн андһар тәвсмн.

¹⁹ Деед Эзн терүнәс тадна дәәсиг цугтаһинь көөх. Тиигҗ Деед Эзн келв.

²⁰ Кемр иргчдән чамас көвүнчн сурхла: «Деед Эзнә, мана Бурхна, таднд өгсн эн закврмуд, зокалмуд болн закад юн болҗахмб?»

²¹ Терүнд иигҗ хәрү өг: «Бидн Египетин хаана мухлас биләвидн. Деед Эзн күчтә һарарн мадниг Египетәс һарһҗ авв.

²² Мадна нүүрт Деед Эзн алдр өвәрц йовдл болн онц темдгүд үзүлв. Тернь Египетин хаанад, терүнә герт цугтан үклтә болҗана.

²³ Эн һазрт дахулҗ авч ирәд, энүг маднд белглхәр Деед Эзн, мадна өвкнрт андһар өгсәр, мадниг болхлаг Тер Египетәс һарһҗ авв.

²⁴ Эн зокалмудыг цугтаһинь күцәтхә гиҗ Деед Эзн маднд заавр өгв. Деед Эзиг, мана Бурхиг, икәр күндлтхә гиһәд, маднд кезә чигн сән болтха гиһәд, бидн әмд-менд бәәтхә гиһәд (эндр күртл бәәсәр) тиигв.

²⁵ Кемр бидн Деед Эзнә, мадна Бурхна, өмн Терүнә даалһсар цуг эн зааврмудыг чаңһар күцәхлә – эннь мана үнн болҗана».