Давтх Закан 5 - Хальмг келнд орчулсн Әрүн Бичлһс

Моше Арвн Заавр давтна

¹ Израилин улсиг цугтаһинь дуудад Моше келв: – Эндр таднд келҗәх зокалмудыг болн закадыг соңс, Израиль! Энүг чееҗәр дастн, батар бәрәд эдниг күцәтн.

² Деед Эзн, мана Бурхн, Хоривд маднла бооца келә.

³ Эн бооцаг мадна өвкнрлә биш, маднла келә. Ода энд зогсчах әмд-менд маднла цугталамдн келә.

⁴ Деед Эзн таднла нүүрцәд күүндлә, уул деер шатчах һал дотрас күүндлә.

⁵ Тер кемлә би Деед Эзнә болн тадна хоорнд Терүнә үгинь таднд күргхәр зогсчалав. Яһад гихләг тадн һалас әәһәд, уул деер һарсн угат. Деед Эзн келв:

⁶ «Би Деед Эзн, чини Бурхн, чамаг Египетәс көтлҗ һарһлав, мухласин һазрас.

⁷ Нанас талдан бурхд чамд уга болтха.

⁸ Ямаран чигн шүтә бичә ке – деер теңгрт бәәх, дор һазр деер бәәх эс гиҗ уснд, һазр дор бәәх ямаран чигн юмна дүрсд бичә ке.

⁹ Теднд бичә мөрг, бичә шүт, яһад гихлә Би, Деед Эзн, чини Бурхн – хару Бурхмб. Намаг һазалсн эцкнрин һарһсн килнцд Би эднә үрдиг, һурвдгч болн дөрвдгч үй күртлнь цааҗлҗанав.

¹⁰ Нанд дурта, Мини заавр күцәдг әмтнә хөөт үйнрт Би миңһдгч үйднь хәәрлтән күргҗәнәв.

¹¹ Аюдан харҗахар Деед Эзнә, чини Бурхна, нериг бичә келәд бә. Тиим юм һарһдг күүг Деед Эзн засгллго бәәшго.

¹² Бемб өдриг бәр – әрүн өдр. Тиигтхә гиҗ Деед Эзн, чини Бурхн, заквр өглә.

¹³ Зурһан хонгтан кех кергән цугтаһинь күцә,

¹⁴ доладгч өдр – бемб өдр. Эн өдр Деед Эзнә, чини Бурхна, өдр. Нег чигн күн эн өдр көдлшго болҗана: чи, чини көвүн, чини күүкн, чини мухла залу күн, чини мухла күүкд күн, чини цар, чини элҗгн – ямаран чигн мал, чини балһснд бәәх нүүҗ ирсн әмтн. Чини мухла залу күн болн мухла күүкд күн чамла әдл амртха.

¹⁵ Египетд чи эврән мухла бәәсән сан. Зуг Деед Эзн, чини Бурхн, чамаг Египетәс Эврәннь күчтә делгү һарарн көтлҗ һарһсиг санҗ йов. Тегәд Деед Эзн, чини Бурхн, чамаг бемб өдр бәртхә гиҗ закчана.

¹⁶ Деед Эзнә, чини Бурхна, заксар эцкән болн экән күндл. Тиигхлә чини җирһл ут наста болх, эн һазр деер чамд сән болх (иим һазр чамд Деед Эзн, чини Бурхн, белглҗ өгчәнә).

¹⁷ Бичә кү ал.

¹⁸ Авалясн талдан күүнлә бичә оралд.

¹⁹ Бичә хулха ке.

²⁰ Өөрхн улстан худл герч бичә бол.

²¹ Талдан күүнә гергиг булахар бичә сед. Талдан күүнә гериг болн тәрәнә һазриг, талдан күүнә мухла залусиг болн мухла күүкд улсиг, талдан күүнә цармудыг болн элҗгдыг, талдан күүнә нег чигн юм авхар бичә сед».

²² Иигҗ Деед Эзн тадна цуг хамцанд келв. Уул деер, шатчах һал дотрас, үүлн болн нигт харңһуһас чаңһ дууһар таднд Тер келв. Эн үгмүд деер Тер дәкҗ юм немсн уга. Келсн үгән Тер хойр хавтха чолун деер бичәд нанд өгв.

²³ Тадн таг харңһуһас келҗәх ду соңсвт, уул шатчах һалар авгдсн билә. Нан тал тадн, отгудын толһачнр болн медәтнр, ирвт.

²⁴ Тадн келвт: «Деед Эзн, мадна Бурхн, маднд Эврәннь туурмҗан болн алдр бәәдлән үзүлв. Шатчах һал дотрас Терүнә ду бидн соңсвидн. Бурхн күүнлә күүндҗәх кемлә тер күн әмд үлдҗ чадхиг бидн эндр медвидн.

²⁵ Ю хәәҗ бидн үкхмби? Эн алдр һал мадниг зальгхдан белн! Кемр бидн дәкн Деед Эзнә, мана Бурхна, ду соңсхла үкхвидн!

²⁶ Шатчах һалас Бурхна келҗәхиг соңссн тер күн маднла әдл әмд үлдхий?

²⁷ Чи йовад Деед Эзн, мана Бурхн, ю келхиг соңс. Дәкәд Деед Эзн, мана Бурхн, чамд ю келсинь маднд цугтаһинь келҗ өгхич. Бидн болхла, келсинь соңсад күцәхвидн».

²⁸ Деед Эзн тадна келсиг соңсад нанд келв: «Эн әмтн чамд ю келсинь Би соңслав. Тедн чикәр келҗәнә.

²⁹ О, кемр тедн йосндан зүркәрн шүтәд оньдин Намаг икәр күндлхәр болн Мини заавр күцәхәр седҗәхлә, теднд болн теднә хөөт үйнрт мөңкинд сән болх!

³⁰ Эврәннь шатрт хәрү ортн гиҗ тедниг йовад дууд.

³¹ Чи энд Нанла үлдхич. Зааврмуд, зокалмуд, болн закад цугтаһинь Би чамд өгнәв. Чи тедниг дасххич, тедн эдниг цугтаһинь эн һазрт күцәх. Эн һазриг Би теднд эзлтхә гиһәд өгчәнәв».

³² Деед Эзн, тана Бурхн, заксиг чаңһар бәртн, чаңһар күцәтн гив, барун тал чигн, зүн тал чигн бичә хаҗитн!

³³ Деед Эзнә, тана Бурхна, заасн хаалһар кезә чигн йовтн. Тегәд тадн әмд йовхит, тегәд таднд сән болх, тегәд эзлсн һазртан удандан җирһәд бәәхит.