Давтх Закан 4 - Хальмг келнд орчулсн Әрүн Бичлһс

Бурхна зокалмудыг болн закадыг олн-әмтн бәртхә гиҗ Моше закчана

¹ Израилин улс, тадниг сурһх Мини зокалмуд болн закад соңсит! Тегәд тадн әмд үлдхит, Деед Эзнә, тана өвкнрин Бурхна, таднд өгчәх һазрт ирәд эзлхит.

² Мини келсн үгмүдт бичә юм немтн, бичә юм хастн. Деед Эзнә, тана Бурхна, зааврмудыг күцәтн гиҗ закчанав.

³ Деед Эзн Пеорин Баал уулын хаҗуд ю кесинь тадн эврән үзләт! Пеорин Баалыг дахад йовсн тадниг цугтаг Деед Эзн, тана Бурхн, уга кеһәд алсинь эврән үзләт.

⁴ Деед Эзнд, тана Бурхнд, иткҗ үлдсн тадн болхла – эндр күртл цугтан әмд бәәнәт.

⁵ Деед Эзн, мини Бурхн, нанд заксар би ода таднд Терүнә зокалмуд болн закад сурһҗанав. Тедниг тадн одсн, эзлсн һазртан бәрәд күцәх йостат.

⁶ Батар тедниг бәрҗ күцәтн. Тегәд одҗ олн келн-әмтн цугтан тадна цецниг болн ухаг үзҗ медх. Тиим зокалмудын тускар соңсчкад тедн келцхәх: «Ямаран цецн болн ухата эн алдр келн-улс!»

⁷ Деед Эзн, мадна Бурхн, маднд өөрхн бәәснлә әдл тиим алдр келн-әмтн уга: Деед Эзиг бидн дуудх болһнд, Тер маднд хәрү өгнә.

⁸ Ода мини таднд сурһҗах эн зокалмудас болн закадас чик Заката тиим алдр келн-улс уга.

⁹ Зуг сагар бәәтн, бийән хәләтн. Эврәннь нүдәр үзсән бичә марттн. Әмд бәәсн деертн үзҗ йовсн юмн тана зүркнд үлдтхә! Үрдтән, ачнр-зеенртән келҗ өгчәтн.

¹⁰ Тер өдр тадн Деед Эзнә, тана Бурхна, өмн Хорив уулын хаҗуд зогсчалат. Яһад гихлә Деед Эзн нанд заквр өглә: «Нан тал олн-әмтән дууд, Би теднд Эврәннь зәрлгән соңсхад келнәв. Җирһлиннь туршарт һазр деер бәәхләрн тедн Намаг икәр күндлдг болн тевчдг дастха, үрдтән дасхтха».

¹¹ Тегәд тадн ирәд уул дор зогсвт. Уул деер теңгрт күрчәх һал шатчана. Харңһу таг – үүлн, нигт харңһу.

¹² Деед Эзн таднла шатчах һалас күүндв, тадн келсн үгинь соңсвт, болв дүринь үзсн угат. Зуг дун соңсгдв.

¹³ Деед Эзн таднд Эврәннь бооцана үгцәһинь соңсхв. Терүг тадн күцәх йостат – Арвн Заавр. Тедниг Тер хойр хавтха чолун деер бичҗ.

¹⁴ Тер цагт Деед Эзн таднд зокалмудан болн закадан дасхтха гиҗ нанд закла. Тедниг тадн одад эзлх һазртан бәрх йостат.

Шүтәнд мөрглһнәс сагллһн

¹⁵ Хорив деерк һалас Деед Эзн таднла күүндхлә, тадн ямаран чигн дүр үзсн угат. Саглтн,

¹⁶ хорта юм һарһхасн – залу күүнә, эс гиҗ күүкд күүнә дүрстә шүтә кехәсн,

¹⁷ эс гиҗ һазр деер бәәх малын бәәдлтә, эс гиҗ теңгрәр нисдг шовуна бәәдлтә,

¹⁸ эс гиҗ һазр деерк әмтә-киитә юмсин, эс гиҗ һазрас дорагшан уснд усчдг заһсна бәәдлтә юмсуд кехәсн саглтн.

¹⁹ Теңгр хәләҗәһәд, нар, сар болн одд, теңгрткиг цугтаһинь үзҗәһәд, бичә авлгдтн – теднд бичә шүттн, бичә церглтн! Деед Эзн, тана Бурхн, теңгр дорк цуг талдан улст тедниг нерәдв.

²⁰ Болв Деед Эзн тадниг Египетд сулдхв, тенд тадн хәәлҗәх бешт бәәснлә әдләр зовҗалат. Тер тадниг Египетәс Эврәннь улс болтха гиһәд һарһв. Тернь күцв.

²¹ Деед Эзн таднас көлтә нанд уурлад, Йордан һатлҗ тер йир сәәхн һазрт намаг орулшго болҗ андһар өгв. (Тер һазриг Деед Эзн, тана Бурхн, тадниг эзлтхә гиҗ өгчәнә.)

²² Би Йорданиг һатллго энд үкхүв. Тадн болхла терүг һатлад, тер йир сәәхн һазриг эзлхит!

²³ Зуг Деед Эзн, тана Бурхн, таднла кесн бооцаг бичә марттн, хәләтн: ямаран чигн кегдл бийдән бичә кетн, ямаран чигн дүрмүд бичә кетн. Терүг Деед Эзн, тана Бурхн, хөрҗәнә.

²⁴ Яһад гихлә Деед Эзн, тана Бурхн, – шатадг һал! Тер хару Бурхн!

²⁵ Таднас үрд һарад, теднәс ачнр-зеенр һарад, тадн удан тер һазрт бәәснә хөөн хорта юм һарһад – Деед Эзнд, тана Бурхнд, таасгддго кегдлмүд болн зүсн-зүүл дүрмүд кеһәд бәәхләрн, Терүг уурлулхит.

²⁶ Би теңгриг болн һазриг герч кехәр дуудҗанав. Тер һазр эзлхин төлә тадн ода Йордан һолыг һатлхит. Болв кемр тадн Мини келсиг эс соңсхла, тиигхлә удл уга тер һазрас уга болхит. Тегәд тадн удан бәәшгот, тадн уга кегдхит.

²⁷ Деед Эзн тадниг олн келн-улс дунд тарах. Зуг таднас цөөкнь әмд һарх. Деед Эзнә йовулсн улс дунд тадн бәәхит.

²⁸ Тенд тадн күүнә һарар кесн бурхдт шүтхит – модн болн чолун бурхдт. Тер бурхд юм үздго, юм соңсдго, юм иддго болн үнр һарчахиг меддго болҗана.

²⁹ Тенд тадн Деед Эзиг, тана Бурхиг, хәәхит. Кемр зүркәрн болн седкләрн Терүн тал адһҗ темцхләрн Терүг олҗ авхит.

³⁰ Кемр таднд күнд болхлаг, кемр иргчдән таднд тиим юмн үзгдхләг, тегәд тадн Деед Эзн, тана Бурхн, тал хәрү ирхит. Тегәд Терүг соңсдг болхит.

³¹ Деед Эзн, тана Бурхн, йирдән өршәңгү седклтә Бурхн. Тер тадниг үлдәшго, алшго. Тадна өвкнрт андһар өгәд, кесн бооцаһан Тер мартшго.

Израиль – шүүҗ авсн келн-улс

³² Һазр деер кү үүдәсн өдрәс экләд тадна өмнк цагт юн бәәсинь болн урдк цагин тускар суртн: теңгрин нег захас талдан зах күртл альднь болв чигн иим алдр керг күцәгдлү? Энүнлә әдлцх юмна тускар кен соңссн болх?

³³ Таднла әдл ямаран чигн улс һал дотрас бурхна ду соңсад, әмд үлдснә тускар меддг болхий?

³⁴ Ямаран чигн бурхн талын улс дунд бәәсн улсас ирәд бийдән әмт салһад авч чадхий? Терүнә төлә Эврәннь күчтә болн делсн һарарн күнд сөрлт болн темдг, өвәрц йовдл болн дә Тер илгәһәд бәәв. Энүг тадна төлә Деед Эзн, тана Бурхн, Египетд тадна нүүрт кев.

³⁵ Деед Эзн – Бурхн, Терүнәс талдан бурхн угаг тадн эврән үзвит, эврән медвит.

³⁶ Деед Эзн теңгрәс таднд сурһмҗ өгхәр дуудвр кев. Тер Эврәннь алдр һалан һазр деер үзүлв, тер һал дотрас Деед Эзн таднла күүндсиг эврән соңсвт.

³⁷ Деед Эзн тадна өвкнрт дурлв, тегәд теднә хөөт үйнриг, тадниг, шүүҗ авв. Эврәннь алдр күчәрн Египетәс тадниг Тер һарһв.

³⁸ Эннь таднас тооһарн олн болн чидлтә улсин һазринь таднд өгхин төлә, тадниг теднә һазрт авч ирәд эзлтхә гиһәд бәәлһхин төлә кегдв.

³⁹ Ода медәд, тодлад авчктн: Деед Эзн – Бурхн деер теңгрт болн дор һазрт, талдань уга.

⁴⁰ Эндр таднд мини соңсхҗах Терүнә зокалмуд болн закврмуд күцәтн. Тиигхлә таднд болн тадна хөөт үйнрт сән болх, Деед Эзнә, тана Бурхна, мөңкинд өгчәх һазрт удан бәәхит.

Йордан һолын ца хорһдх һурвн балһсн

⁴¹ Тер цагт Моше Йорданас дорд үзг тал һурвн балһс йилһҗ һарһв.

⁴² Өөрхн күүһән зөрц бишәр алсн, урднь өшә уга бәәсн күн тер балһсдын негн талнь гүүһәд әмән харсҗ чаддгар кев.

⁴³ Тер балһсд эн: көдәд уулын тегш һазрт, Рубена әңгд бәәсн Бецер; Гәдин әңгд Гиладт бәәсн Рамот; Манашен әңгд Башанд бәәсн Голан.

Мошен хойрдад келлһнә нүр үг

⁴⁴ Израилин улст Мошен өгсн Закан эн.

⁴⁵ Эннь Египетәс һарсна хөөн Израилин улст Мошен зәңглсн закврмуд, зокалмуд болн закад –

⁴⁶ терүгән тер тиигхд Йордана ца Бет-Пеорин хаҗудк тиньгр һазрт Хешбонд һардҗасн амореймүдин хан Сихона һазрин улст соңсхв. Моше болн Израилин улс Египетәс һарад Сихониг диилцхәв.

⁴⁷ Терүнә орн-нутгинь Башана хан Огин нутгтаһинь хамднь авцхав. Амореймүдин эн хойр хаана һазр Йорданас дорд үзг тал эзлгдҗәҗ.

⁴⁸ Эн һазр Арнон уулын хавчг деерк Ароэрәс Сирион уул күртл бәәҗ, талданар Хермон.

⁴⁹ Йорданас дорд үзгин цуг Арава тиньгр һазриг, Араван теңгс болн Фасга уул күртл тер хойр хан эзлҗәҗ.