Давтх Закан 34 - Хальмг келнд орчулсн Әрүн Бичлһс

Мошен үкл болн оршалһн

¹ Моавин тегш һазрас Моше Ерихона тус бәәдг Нево уулын Фасга ора деер һарв. Деед Эзн терүнд тендк һазриг кевтнь үзүлв: Гиладас Дана һазр күртл,

² Напталин һазриг кевтнь, Эпримин болн Манашен һазриг, Йудан һазриг барун үзгин теңгс күртл кевтнь үзүлв.

³ Негевиг бас, Тиньгр һазриг бас (Ерихона эс гиҗ Пальмин гидг балһсна дор һазриг), Цоар күртл үзүлв.

⁴ Тегәд Деед Эзн Мошед келв: «Мини Абрахамд, Ицхакд болн Яковд андһар өгсн һазр эн. Энүг теднә хөөт үйнрт өгх боллав! Би терүг чамд үзүлләв, болв чи тиигәрән оршгоч».

⁵ Деед Эзнә келсәр, Бурхна зарц Моше Моавин һазрт өңгрв.

⁶ Бет-Пеорин хаҗуд Моавин тегш һазрт терүг оршав. Ода күртл терүнә үкәр альд бәәхинь күн медхш.

⁷ Тиигхд Моше 120 наста бәәҗ. Үктлнь нүднә харань болн чидлнь баһрсн уга.

⁸ Израилин улс Моавин тегш һазрт Мошед һундл төрҗ һучн хонгтан уульцхав. Тиигҗ Мошег санҗ ууляд уйдсн һашута өдрмүд давв.

⁹ Навина көвүн Ешуад цецн ухан орв. Яһад гихлә Моше терүнә толһад һаран күрглә. Израилин улс терүг соңсад, Мошеһәр дамҗад Деед Эзнә өгсн заквриг күцәдг билә.

¹⁰ Тер цагас авн Израилин улс дунд Мошелә әдлцх дүңгә әәлдәч уга бәәҗ. Терүнлә Деед Эзн чирәһәрн харһад күүндҗ.

¹¹ Деед Эзнә седвәрәр Египетд тер ямаран өвәрц юм болн темдгүд һарһдг билә! Египетин хаанлань, терүнә мухласла, терүнә цуг орн-нутглань ямаран юм кеҗ йовла!

¹² Цуг Израилин улсин өмн ямаран күчтә юм, ямаран алдр болн әәмшгтә керг Моше кев!