Давтх Закан 32 - Хальмг келнд орчулсн Әрүн Бичлһс

¹ «Мини келсиг, теңгр, соңс! Мини келсиг, һазр, соңс!

² Мини ном хур мет асхрх, Мини ном чиг мет асхрх, Хур асхрад өвс норһх, Хур асхрад ноһа услх!

³ Деед Эзиг би дууднав! Мана Бурхна алдринь туурултн!

⁴ Тертн – хад чолунла әдл! Терүнә кергнь күцәмҗтә, хаалһнь үнн. Тертн чик Бурхн, худл уга, Тертн үннч, чик неквртә.

⁵ Терүнә өмн әмтн килнцтә, Тедн Бурхна үрд биш! Ичртә юмн! Зүткә үйнр!

⁶ Деед Эзнд тиигҗ ханвта? О, эргү, ухан уга әмтн! Тертн тадна Эцк, Үүдәһәч, Тадниг тогтала, тадниг өсклә!

⁷ Кезәңк цаган чи ухал, Кезәңк үйнрин цагиг ухал. Эцкәсн сурлч, келҗ өгг, Эврән көгшд келтхә чамд.

⁸ Деед Бурхн әмтнд һазр өгчәхд, күүнә бүл босхад үүдәҗәхд, Бурхна көвүдин тооһар Тер һазрин хүвинь йилһҗ өгв.

⁹ Деед Эзнә хүвнь – Терүнә улс! Деед Эзнә өнч авхнь – Яковин хөөт үйнр!

¹⁰ Эн әмтиг Тер көдәд олҗ, әмн уга, эҗго теегт. Тедниг Тер харсад хәләлә, Тедниг нүднләһән әдл хадһлла.

¹¹ Һәрд үүрән манҗах мет, Һууҗмулмудыннь деегүрнь ниснә, Җиврән деләд, теднән өргәд, Өрвлг деерән авч йовна,

¹² Тедниг Деед Эзн һанцарн дахулла, Теднлә күүнә бурхн уга билә!

¹³ Тедниг һазрин өөдмд өргв, Тедниг тәрәнә урһцар теҗәв, Тедниг хадын балар теҗәв, Хадын оливин тосар теҗәв.

¹⁴ Үкрин өрмәр, ямана үсәр, хурһдын өөкәр, хуцин өөкәр, Башана малмудын, текин өөкәр, Буудян сән һуйрар теҗәв! Уста үзмин чаһр уулач.

¹⁵ Ешурун тарһлад, заңта болв, Махта, тарһн, зүткә болв. Бийинь үүдәсн Бурхнас салв, Бийинь аврх Харсачиг бурушав!

¹⁶ Талдан бурхдар Терүг уурлулна, Терүг җигшүртә юмсарн уурлулна!

¹⁷ Бурхнд биш – шулмд бәрц бәрнә, Теднә урднь меддго бурхд, Талын һазрас ирсн бурхд, Тедниг тадна өвкнр медхш.

¹⁸ Чамаг һарһсн Харсачан мартвч. Чамд җирһл өгсн Бурхан мартвч!

¹⁹ Деед Эзнә үрднь Терүнд дурго болсинь җигшҗ үзв.

²⁰ „Теднәс Би буру хәләсүв! Тегәд яһдг чигн, – гив, – Тедн үрсн му үйнр, Тедн иткл уга үрд.

²¹ Намаг худл бурхдар уурлулв, Намаг һар кегдлмүдәр уурлулв. «Әмтн» гиҗ келгдшго улс илгәнәв: Үлү үзх седвәр орултха, Эргү әмтн тедниг уурлултха!

²² Мини цухлас һал шатв, Үклин һазр күртл шатчана! Тәрәг урһцтаһинь кевтнь шатах, Уулыг улднь күрәд шатах!

²³ Би тедниг зовлңд орулнав, Би бәәсн сумарн ханав!

²⁴ Тедн харһнад үкхдән күрх, Тедн гемдән үктлән бәргдх! Зерлг аңгуд, моһан хор Теднд Би бел кевүв.

²⁵ Һаза йовснь үлдәс үкх, Гертән бәәсинь әәмшг бәрх! Баһ наста көвүд, күүкд, Нилхд, көгшд – цугтан үкх.

²⁶ Би тедниг алхар седҗәләв, әмтнә тодлврас билләд хайхар,

²⁷ Болв дәәснь Намаг һутах! Деерлкәд келх: Бидн диилвидн! – Деед Эзн диилсн уга!“

²⁸ Тедн ухан уга әмтнлм, Теднд медх арһ угалм!

²⁹ Ухата болхла медх билә, Аштнь болхинь ухалхнь яһна.

³⁰ Негхн күн миңһиг мөрдхий, Нам хойрнь арвн миңһинь? Тиигхлә Харсачнь тедниг бәрүлв, Деед Эзн Эврән дәәснднь өгв!

³¹ Теднә „харсач“ мадна Харсачла әдлцшго! Мадна дәәсн чигн энүнлә зөвшәрҗәнә.

³² Уста үзмнь Содомин мет, Гоморан садын темсд мет: Тер темсднь хорар дүүрң, Уста үзмнь һашун хорн.

³³ Теднә чаһрнь – моһан хорн, Хорта моһан әәмшгтә хорн!

³⁴ „Нанд хадһлсн юмн бәәнә. Нанд бултулсн юмн бәәнә.

³⁵ Эннь тедниг темтрәд ирхлә, Эннь мини өшән, засгллһн! Теднә үклин өдр өөрхн, Цагнь агчад, өөрдәд одв“.

³⁶ Деед Эзн әмтән харсх, Деед Эзн мухласан хәәрлх: Цугтан тедн чидлән гееһәд, Мухласнь чигн, сулдан бәәснь Цугтан үкәд, күн үлдшго.

³⁷ „Теднә ,бурхд‘ ода яһсмб? Теднә нәәлсн ,харсач‘ альдв? – Тиигҗ Деед Эзн келх.

³⁸ Тадна бәрцин өөкинь идгүд, Тадна асхдг чаһр уудгуд яһла? Тедн ода тадниг авртха, Тедн ода тадниг харстха!

³⁹ Хәләтн: Энтн Би, Бив! Нанас талдан бурхд уга! Би алдув, Би әмдрүлдүв, Би шавтадув, Би эмндүв – Нанас кен чигн аврч чадхмн уга.

⁴⁰ Эврәннь һаран теңгрүр өргәд, Мөңк җирһләрн андһар өгчәнәв:

⁴¹ Би гилвксн үлдән бүлүдәд, Би һарарн зарһан кехлә, Тегәд дәәснәсн өшәһән авхув, Тегәд дурго улсан засглхув.

⁴² Мини сумн цусар ивтрх, Мини үлд махнас цадх, Алгдсн, бәргдсн улсин цусар! Өшәтнә ахлачнрин толһасар!“

⁴³ Олн-әмтн, Терүнә келн-улст байрлтн! Деед Эзн мухласиннь цуснд өшәһән авх! Дәәснәсн Тер өшәһән авх, Дурта улсиннь һазринь цеврлх».

⁴⁴ Моше Навина көвүн Ешуала хамдан ирәд әмтнд эн дууг соңсхв.

⁴⁵ Израилин улст энүг цугтаһинь соңсхад,

⁴⁶ Моше келв: – Эндр таднд келсиг цугтаһинь тодлад автн. Эврәннь бичкдүдт эн Закаг батар бәрәд күцәтхә гиҗ закч келтн.

⁴⁷ Энтн йирдән үг биш, энүнд тадна җирһл бәрәтә. Тиим учр деерәс тадна эзләд бәәхәр седҗәдг Йордана цаадк һазрт тадна җирһл ут болх.

Деед Эзн Мошег Нево уул деер һартха гиҗ дуудна

⁴⁸ Тер өдр Деед Эзн Мошед келв:

⁴⁹ – Аварим уулмуд деер һар – Моавд бәәдг Ерихона тус Нево уул деер. Тендәс Израилин улст Мини өгчәх Канана һазриг эргнднь хәләһич.

⁵⁰ Тер уул деер һарад тенд үкхич, тенд чи эврәннь өвкнр тал һархич. Тегәд Ор уул деер чини ах Ахарон үклә, эврәннь өвкнр тал һарла.

⁵¹ Яһад гихлә Цин гидг көдә һазрт бәәдг Мерибат-Кадешин булгин хаҗуд, Израилин улс дунд, тадн Мини өмн килнц һарһвт. Израильд Мини әрүн бәәдлиг медүлсн угат.

⁵² Израилин улст Мини өгчәх һазр чи үзхич, болв терүнд чи оршгоч.