Давтх Закан 31 - Хальмг келнд орчулсн Әрүн Бичлһс

Навина көвүн Ешуаг Мошен дару орулгдҗ авлһн

¹ Моше йовад Израилин улст цугтаднь иигҗ зәңглв:

² – Би ода 120. Нааран-цааран йовлһнд чидл күрчәхш. Терүнәс даву Деед Эзн нанд келв: «Чамд Йордан һол һатлх арһ уга».

³ Деед Эзн, тадна Бурхн, Эврән тадниг дахулад йовх. Тенд бәәх улсиг Тер алх, һазринь тадн авад эзлхит. Ешуа Деед Эзнә даалһсар тадниг дахулҗ йовх.

⁴ Амореймүдин хаадудта, Сихонла болн Огонла, теднә һазрла кесн әдләр эн улсиг Деед Эзн алх.

⁵ Деед Эзн таднд эн улсиг диилх диилвр өгчәнә, тегәд эдниг мини келсәр кетн.

⁶ Дәәснәсн бичә әәтн, чаңһ-чиирг болтн, Деед Эзн, тадна Бурхн, таднла хамдан йовҗ йовна, тадниг хайшго, тадниг үлдәшго! – гиҗ Моше келв.

⁷ Дәкәд Моше Ешуаг дуудад, Израилин улсин нүүрт келв: – Чаңһ-чиирг, зөргтә бол. Деед Эзнә эн улст өгх болсн һазр талнь чи дахулҗ одхич. Тиигх болҗ Тер эн улсин өвкнрт андһар өгсн бәәҗ. Эн һазриг теднә үлмәд орулхич.

⁸ Чини өмн Деед Эзн йовх, Тер хаҗудчнь бәәх. Чамаг Тер үлдәшго, чамас салшго. Бичә ә, бичә үүм!

Зака умшх заквр

⁹ Эн Закаг Моше бичҗ авад, Левин хөөт үйнрт болн Израилин медәтнрт өгв. (Левин хөөт үйнр Деед Эзнә Бооцана хәәрцг авч йовна.)

¹⁰ – Долан җил болад, нег дәкҗ өрән хәрүлһнә Җолмин нәәрт,

¹¹ Израилин улс цугтан Деед Эзнә, тадна Бурхна, өмн Терүнә шүүҗ авсн һазрт цуглрхла, эн Закаг соңсхад умштн. Терүг Израилин улс цугтан соңстха.

¹² Әмтиг цугтаһинь цуглул – залусиг, гергчүдиг болн бичкдүдиг, бас тадна балһсдар бәәдг нүүҗ ирсн әмтиг, – цугтан соңстха, дастха. Тедн Деед Эзиг, тадна Бурхиг икәр күндләд, эн Закаг сольвр угаһар күцәх йоста.

¹³ Энүг меддго бичкдүд бас соңсад дастха. Тедн Деед Эзиг, тадна Бурхиг, икәр күндлх йоста. Тадн Йордана ца тер һазриг эзләд, бәәрләд бәәхәр йовхларн кезә чигн тиигх йоста болҗанат, – гиҗ Моше закв.

Деед Эзн Мошед болн Навина көвүн Ешуад үзгднә

¹⁴ Деед Эзн Мошед келв: – Чини үкх цаг өөрхн. Ешуаг дууд, Харһлтын Шатрт Мини өмн зогстн. Тенд Би терүнд даалһвр өгнәв. Моше Ешуа хойр Харһлтын Шатрт ирнә.

¹⁵ Шатр дотр теднд Деед Эзн үүлн бахн болҗ үзгдв. Үүлн бахн Шатрин үүднд зогсв.

¹⁶ – Удлго чи давсн өвкнртән күрәд тогтнхич. Эн улс болхла орҗ ирх һазрин күүнә бурхдт шүтх. Тедн Намаг үлдәһәд, теднлә кесн Мини бооцаг эвдх.

¹⁷ Тиигхлә Би теднд уурлад, тедниг бас үлдәхүв. Би теднәс салхув, тедн талдан улсин олвр болх. Тедн олн түрү-зүдү бәәдлд орх. Тегәд тедн иигҗ келх: «Маднла мана Бурхн уга болсар бидн иим бәәдлд орвидн!» – гиҗ Деед Эзн Мошед келв. –

¹⁸ Йос эвдсн учр деерәс болн тедн талдан бурхдт шүтсәр, Би теднәс хәрү эргнәв.

¹⁹ Тегәд бийдән эн ду бичҗ автн. Эн дууг Израилин улст дасх. Тедн терүг давтад бәәтхә, хөөннь теднә өмнәс эн дун Мини герч болх.

²⁰ Би теднә өвкнрт өгх болад андһарлсн һазрт тедниг күргнәв. Тер һазр үсәр болн балар байн. Тедн тенд цадтлан идцхәх, тарһлх. Тегәд талдан бурхдт шүтәд көдлх! Намаг болхла һолад Мини бооцаг эвдх.

²¹ Теднд олн түрү-зүдү бәәдл үзгдх, тиигхлә эн дун герчнь болад гемшәх. Нам тер цага үйнр эн дууг тодлх. Ода бийнь тер андһар өгсн һазрт тедниг күргәд уга болвчн, Би теднә седклинь медҗәнәв!

²² Тер өдртән Моше тер дууг бичҗ авад, Израилин улст дасхв.

²³ Деед Эзн Навина көвүн Ешуад келв: – Чаңһ-чиирг бол, зөргтә бол. Мини теднд өгх болад андһарлсн һазр тал тедниг чи дахулад йовхич. Би чамла йовхув.

Закана әрүн бичг Бооцана хәәрцгин хаҗуд тәвгдҗ

²⁴ Моше әрүн бичгт Закаг кевтнь чилтл бичхлә,

²⁵ Деед Эзнә Бооцана хәәрцг авч йовдг левитмүдт даалһвр өгв:

²⁶ – Эн Закана әрүн бичгиг авад Деед Эзнә, тадна Бурхна, Бооцана хәәрцгин хаҗуд тәвтн. Эннь терүнд чини өмнәс кех герч болх.

²⁷ Тадниг соңсхвр уга, һацата заңтаһитн би меднәлм! Нам ода намаг әмд деерм, тадн Деед Эзиг соңсҗахшит. Намаг үкхлә, юн болх?

²⁸ Отгин медәтнриг болн ахлачнриг нан тал цуглулад авч иртн. Теднд би чаңһар эн үгмүд келсүв, теднә өмнәс теңгр һазр хойриг герчд дууднав.

²⁹ Намаг үкснә хөөн тадн му йовдл һарһад бәәхиг меднәв. Мини орулсн хаалһас тадн хаҗихит. Иргчдән тадн түрү-зүдү бәәдлд орхит, яһад гихлә Деед Эзнд дурго йовдл һарһад бәәхит, кесн кергәрнь Терүнә цухл босххит.

Мошен дун

³⁰ Моше эн дууна үгмүдиг келв. Цуглрсн Израилин улс терүг чиләтл цугтан соңсцхав.