Давтх Закан 30 - Хальмг келнд орчулсн Әрүн Бичлһс

Кемр әмтн килнцтә җирһлән үлдәхлә, Деед Эзн теднә буруһинь тәвҗ өгх

¹ Тиигәд би таднд эн әдсллһиг болн харалыг цугтаһинь келҗ өгүв. Нег дәкҗ, тер келн-улс дунд бәәхләрн, тадниг тенд Деед Эзн, тадна Бурхн, тараһад хайхла, таднд ухан орх.

² Тегәд тадн Деед Эзн, тадна Бурхн, тал хәрү ирәд, эврәннь үрдтәһән зүркәрн болн седкләрн Терүг соңсхла, эндр мини закчасар,

³ тиигхлә Деед Эзн, тадна Бурхн, тадниг урдк сән бәәдлд өршәһәд хәрү орулх, тегәд бәәсн күүнә улс дундас Тер тадниг һарһҗ авх.

⁴ Нам тадн хамгин теңгр-һазрин захд көөгдсн бийнь Деед Эзн, тадна Бурхн, тендәс тадниг хәрү авх.

⁵ Деед Эзн, тадна Бурхн, тадниг өвкнрин һазрт авч ирх, тегәд тадн дәкн тер һазрин эзнь болхит. Деед Эзн тадниг өвкнрәсн үлү күцәмҗтә болн тооһарн теднәс олн болдгар кех.

⁶ Деед Эзн, тадна Бурхн, тадниг болн тадна хөөт үйнриг соңсхврта кех. Терүнд зүркәрн болн седкләрн дурлад, әмд үлддгәр кех.

⁷ Деед Эзн, тадна Бурхн, тер харалмудыг цугтаһинь тадниг мөрдҗ йовх дурго хортн деер болн дәәсн деер буулһх.

⁸ Тадн болхла, дәкн Деед Эзиг соңсхит, эндр мини таднд келҗәх Терүнә зааврмудыг күцәхит.

⁹ Деед Эзн, тадна Бурхн, таднд цугинь өгх: кергтн күцәмҗтә болх, хөөт үйнр олн болх, малын төл өсх, тәрәнә урһц байн болх – ямаран чигн олзта-орута юм өгх. Деед Эзн тадна өвкнрт килмҗән өгәд байрлҗ йовснла әдләр, дәкн чамаг сән бәәдлд орулсндан байрлх.

¹⁰ Яһад гихлә тадн Деед Эзиг, тадна Бурхиг, соңсад Закана әрүн бичгт бичәтә Терүнә зааврмудыг болн зокалмудыг күцәхит. Деед Эзнд, тадна Бурхнд, тадн әрүн зүркәрн болн седкләрн хәрү ирхит.

¹¹ Болв эндр мини таднд өгчәх зааврмуд дегд күнд биш, таднас холдсн уга.

¹² Тедн теңгрт бәәхш, тадн иигҗ келҗ чадшгот: «Мана төлә кен теңгрт һархмб, кен тедниг буулһҗ авч ирәд, күцәтхә гиҗ маднд өгхмб?»

¹³ Теднь теңгс һатц биш, тегәд тадн иигҗ келҗ чадшгот: «Бидн тедниг күцәдгәр мадна төлә кен теңгс һатлад авч ирәд тедниг маднд өгхмб?»

¹⁴ Эн зааврмуд таднд дегд өөрхн, тедн тадна келнд болн тадна зүркнд. Тедниг күцәх арһ таднд бәәнә!

Әмд-менд бәәхиг эс гиҗ үклиг шүүҗ авлһн

¹⁵ Тегәд эндр би таднд җирһл болн сән бәәдл, эс гиҗ үкл болн зовлң шүүҗ автха гиҗәнәв.

¹⁶ Би тадниг Деед Эзнд, тадна Бурхнд, дурлтха гиҗ закчанав, Терүнә хаалһар йовад, Терүнә зааврмудынь, зокалмудынь болн закадынь күцәтхә гиҗәнәв. Тегәд тадн әмд бәәхит, олар өсхит. Деед Эзн, тадна Бурхн, тадна эзлхәр йовх һазрт таниг әдслх.

¹⁷ Болв кемр тадн Терүнәс буру эргәд, соңслго хаалһасн хаҗиһәд талдан бурхдт шүтәд иткхлә,

¹⁸ тиигхлә – би ода таднд келҗәнәв – маһд уга тадн үкхит! Тиигхлә тадна эзлхәр йовҗ йовх Йордана цаадк һазрт удан бәәшгот.

¹⁹ Эндр би теңгр һазр хойриг герч болтха гиҗ дуудҗанав: җирһл болн үкл, әдсллһ болн харал би таднд йилһҗ автха гиҗ келүв. Тадн җирһл шүүҗ автн, тегәд тадн болн тана хөөт үйнр әмд үлдхит.

²⁰ Тегәд Деед Эзнд, тадна Бурхнд, дурта болхит, Терүг соңсхит, Терүнд итклтә болхит. Деед Эзнд тадна җирһл, тадна өвкнр Абрахамд, Ицхакд болн Яковд андһарлад өгх болсн һазрт тадн ут нас наслад җирһхит.