Давтх Закан 3 - Хальмг келнд орчулсн Әрүн Бичлһс

Ог хааниг дииллһн

¹ Хәрү эргәд бидн Башана һазр тал һардг хаалһар йоввидн. Башана хан Ог дәәчнртәһән мадна өмнәс тосҗ ирәд, Эдрейин хаҗуд дә эклв.

² Деед Эзн нанд келв: «Бичә ә. Чини һарт Би тер хааг бийинь, терүнә дәәчнриг цугтаһинь болн терүнә орн-нутгиг өгчәнәв. Хешбониг һардҗасн амореймүдин Сихон хаанла әдләр чи терүнлә дәәлдхич».

³ Деед Эзн, мана Бурхн, Башана хан Огиг цуг дәәчнртәһинь мана һарт орулҗ өгв. Бидн тедниг сүл күртлнь цугтаһинь ка цокҗ алвидн!

⁴ Тер цагт бидн терүнә балһсдыг цугтаһинь эзлвидн. Башана хан Огин эзлҗәсн 60 балһсн, Аргов нутгиг цугтаһинь бидн аввидн.

⁵ Тер балһсд өндр эрстә болн хаагддг ик үүдтә билә (терүнә деер эс хашалгдсн олн селәд).

⁶ Тедниг бидн буйсаһад уга кеввидн. Хешбониг һардҗасн Сихон хаанла әдләр дәәлдвидн. Тер балһсдт бидн залусиг чигн, гергчүдиг чигн, бичкдүдиг чигн ка цокад алвидн.

⁷ Болв малмудынь болн авсн олвринь бийдән үлдәввидн.

⁸ Тегәд тер цагт Йордана ца Арнон уулын хавчгас Хермон уул күртл һардҗасн амореймүдин хойр хаана һазриг дәәлдҗ аввидн.

⁹ (Сидона әмтн терүг Сирион, амореймүд – Сенир гиҗ келцхәнә.)

¹⁰ Уулын тегш һазрар бәәх балһсд цугтан, Гилад кевтән болн Башан кевтән, Салха болн Эдрей күртл, Башана хан Огин һардҗасн балһсдыг аввидн.

¹¹ (Башана хан Ог рефаимүд дундас сүүлңкнь бәәҗ. Терүнә кевтрнь болхлаг төмрәр кегдҗ. Ода тернь амонмудын Равад бәәнә. Йирдән тоолхлаг: утдан йисн тоха, өргндән дөрвн.)

Йордан һолын дорд үзг талас һазр хувалһн

¹² Арнон уулын хавчгт бәәсн Гиладын уулта һазрин өрәлинь балһсдтаһинь Ароэрәс экләд би Рубена болн Гәдин отгудт өгүв. Тер цагт мадна булаҗ авсн һазр эннь.

¹³ Гиладын наадкинь болн Башаниг цугтаһинь – Огин һазриг би Манашен отгин өрәлднь өгүв. (Аргов нутгиг цугтаһинь – Башан цугтан урднь рефаимүдин һазр гиҗ нерәддг бәәҗ.

¹⁴ Болв Манашен көвүн Яир Аргов нутгиг кевтнь эзлв. Эннь Гешурин болн Маахин бәәрн улсин һазрин меҗә күртл бәәҗ. Тер һазрт Яир эврәннь нер өгв. Тегәд эндр күртл Башан Яирин Селәд гиҗ нерәднә.)

¹⁵ Махирт би Гилад өгүв.

¹⁶ Гиладас Арнон уулын хавчг күртл, тиньгр һазрин йоралар һардг меҗәтәһинь, Ябок һол күртл Рубена болн Гәдин отгудт тер һазр би өгүв. Ябок һолын ца амонмуд бәәнә.

¹⁷ Терүнәс талдан Йордана меҗәтә Араваг өгүв. Тернь Кинеретәс Араван (Давста) теңгс күртл болн дорд үзгин Фасга уулын ташу күртл болв.

¹⁸ Тер цагт эн отгудт би иим даалһвр өгләв: «Деед Эзн, тана Бурхн, таднд эзлтхә гиһәд эн һазриг өгв. Зуг тадн, дәәчнр, Израилин улсин цугтаһаснь түрүләд дәәнд орх йостат!

¹⁹ Тегәд тадна гергчүд, бичкдүд болн тадна мал таднд, мини өгсн балһсдт үлдцхәг. Таднд ямаран олн мал бәәхиг би меднәв!

²⁰ Тадна ахнр-дүүнр Йордана цаадк һазриг эс эзлтл (тер һазриг теднд Деед Эзн, тана Бурхн өгчәнә), Деед Эзн теднд, таднла әдл, төвкнүн җирһл эс өгтл, дөң болтн теднд. Терүнә хөөн, мини өгсн хүв һазр тал, тадн бийстн хәрү ирҗ чадҗанат».

²¹ Тер цагт би Навина көвүн Ешуад келүв: «Тер хойр хаанла Деед Эзн, тана Бурхн, ю кесинь чи эврәннь нүдәрн үзвч. Тиим бәәдл чини йовх һазрар цугтаднь Деед Эзн һарһх.

²² Бичә әәтн теднәс: Деед Эзн, тана Бурхн, Эврән тадна төлә дәәлдҗәнә!»

Әрүн Һазрт орх зөв Мошед уга

²³ Тер цагт би Деед Эзнәс эрҗ сурув:

²⁴ «Деед Эзн Бурхн! Та Эврәннь мухла – нанд Эврәннь алдран болн һариннь күчән экләд үзүлҗәнәт! Теңгрт эс гиҗ һазр деер тиим баатр йовдл һарһдг болн алдр керг күцәдг талдан бурхн бәәдви?

²⁵ Йордан һолыг һатлад терүнә ца бәәх йир сәәхн һазр үзх зөв нанд өгит – тендк йир сәәхн уулмудыг болн Ливаниг!»

²⁶ Болв Деед Эзн таднас көлтә нанд уурлад, намаг соңссн уга. Тер келв: «Болҗана! Дәкҗ Нанас энүнә тускар бичә сур.

²⁷ Фасга уул деер һарад барун үзг, ар үзг болн зүн үзг, өмн үзг тал эврәннь нүдәрн хәләлч – Йорданиг һатлх арһ чамд уга.

²⁸ Ешуад даалһвр өг, терүг бат болн зөргтә болтха гиҗ зак. Тер олн-әмтиг толһалад йовх. Чини үзх һазриг теднд хуваҗ өгх».

²⁹ Бет-Пеорин хаҗудк тиньгр һазрт бидн зогсвидн.