Давтх Закан 29 - Хальмг келнд орчулсн Әрүн Бичлһс

Деед Эзнә бооцанд кесн немлт

¹ Деед Эзн Израилин улсла Моавд бооца кех даалһвр Мошед өгснь тиим. Хорив уул деер Деед Эзнә теднлә кесн бооцанд эннь немр болҗана.

² Израилин улсиг цугтаһинь дуудад Моше иигҗ келв: – Египетд Деед Эзн теднә хаанла, терүнә мухласла, орн-нутглань ю кесинь тадн цугтаһинь үзвит!

³ Тер ик болн күнд сөрлт, тер ик гидг темдгүд болн өвәрц юмсиг тадн эврәннь нүдәрн үзвит.

⁴ Болв эндр күртл Деед Эзн таднд медх уха өгсн уга, үзх нүд чигн, соңсх чик чигн өгсн уга.

⁵ «Би тадниг 40 җил көдә һазрар дахулув, болв тадна хувцн элсн уга, буршмг чигн бас элсн уга.

⁶ Би, Деед Эзн, – тадна Бурхн болҗахиг тадн меддгәр өдмгәр хот кесн угат, чаһр болн һашун әрк уусн угат», – гиҗ Тер келлә.

⁷ Тегәд тадн эн орм күртл ирвт. Тиигхлә мадна өмнәс Хешбона хан Сихон болн Башана хан Ог дәврцхәв. Болв бидн тедниг ка цокад диилвидн.

⁸ Бидн теднә һазринь булаҗ авад, Рубена болн Гәдин отгудт, өрәлинь Манашен отгт өгвидн.

⁹ Эн бооцана дараг бәрәд күцәтн, тегәд тадна кеҗәх керг бүтх!

¹⁰ Цугтан тадн эндр Деед Эзнә, тадна Бурхна, өмн зогсчанат – отгудын толһачнр, медәтнр, ахлачнр, Израилин улс цугтан:

¹¹ бичкдүд болн күүкд улс, тадн дунд бәәх нүүҗ ирсн әмтн – таднд модд чавчдгнь чигн, ус зөөдгнь чигн.

¹² Тадн Деед Эзнлә, тадна Бурхнла, эндр андһарарн бооца кехәр энд зогсчанат. Деед Эзн, тадна Бурхн, таднла эн бооца кеҗәнә.

¹³ Тадниг Эврәннь улсан кехәр, тадна Бурхн болхар таднд үгән өглә, тиигҗ тадна өвкнрт – Абрахамд, Ицхакд болн Яковд тиим андһар тәвлә.

¹⁴ Андһарар батлгдсн эн бооцаг би зуг таднла кеҗәхшв!

¹⁵ Эн бооцан эндр Деед Эзнә, мана Бурхна, өмн маднла хамдан зогсчах әмтнлә чигн, ода энд уга тадна үйнрлә чигн кегдҗәнә.

¹⁶ Бидн Египетд яһҗ бәәсиг тадн меднәлмт, дәкәд күүнә улсин һазрар йовсиг меднәт.

¹⁷ Теднә җигшүртә кегдлмүдиг – модар болн чолуһар, цаһан мөңгәр болн алтар кесинь – үзләт.

¹⁸ Тадн дунд залу күн эс гиҗ күүкд күн, эс гиҗ уңг-тохмарн, эс гиҗ отгарн Деед Эзнәс, мана Бурхнас, эндр хаҗиһәд талдан бурхдт шүтхнь уга болтха! Тадн дунд хор болн һашудх урһмл һарһх уңг бичә өсктхә!

¹⁹ Кемр кен чигн күн эн бооцана үгцәг соңсхларн, бийән әдсләд бичә дотран иигҗ келтхә: «Эврәннь һацлһар һардвр кесн бийнь нанд цугнь сән болх». Тиигҗ услгдсн һазр хагссн һазрла хамдан үрх!

²⁰ Деед Эзн тиим күүнә геминь тәвҗ өгшго. Терүнә шүрүтә уурнь тер күүг хуухлх, эн әрүн бичгт бичгдсн цуг харал терүн деер буух. Деед Эзн терүнә неринь теңгр дорас биллх.

²¹ Деед Эзн Израилин отгудас эн күүг харалла харһулх. Закана әрүн бичгт бичгдсәр тиигҗ кех.

²² Тадна үйнр – хөөт бәәх үрдтн болн хол нутгудас ирсн талын улс Деед Эзнә цухлан күргсн эн һазра түрү-зүдү бәәдл үзх,

²³ мок болн давс үзх, өгрсн һазр үзх, тиим һазрт тәрә тәрҗ урһаҗ болшго, тенд нам өвсн чигн урһшго. Эннь Содом болн Гомора, Адма болн Цевоим балһсд Деед Эзнә догшн уурт уга кегдснлә әдл.

²⁴ Келн-улс цугтан келцхәх: «Деед Эзн юунас көлтә эн һазриг иигсмб? Юунас көлтә Тер догшн ууран һарһв?»

²⁵ Теднд иим хәрү өгх: «Юңгад гихлә эн әмтн Египетәс һарһхд Деед Эзнә, теднә өвкнрин Бурхна, бооцаг мартҗ.

²⁶ Тедн йовад талдан бурхдт шүтцхәв, теднд мөргцхәв. Тер бурхдыг тедн меддго билә. Деед Эзн теднд бичә шүттхә гисмн.

²⁷ Тегәд Деед Эзн эн һазрт уурлад, эн әрүн бичгт бичәтә харалмудыг цугтаһинь терүнд буулһв.

²⁸ Догшн ууртаһар болн һалзу бәәдлтәһәр Деед Эзн тер һазрас тедниг оңдан орн-нутг тал көөв, ода чигн тедн тенд бәәһә».

²⁹ Нуувч юмн Деед Эзнд, мадна Бурхнд, бәәнә. Ил юмн маднд болн мадна үрдт мөңкинд өггдсмн: бидн эн Закаг күцәх йоставидн.