Давтх Закан 27 - Хальмг келнд орчулсн Әрүн Бичлһс

Гевал уул деерк чолуһар кесн бумб болн тәкл тәкдг орм

¹ Израилин медәтнрлә хамдан Моше олн-әмтнд заквр өгв: – Ода мини өгчәх зааврмудыг цугтаһинь күцәтн.

² Йордан һолыг һатлад Деед Эзнә, тадна Бурхна, өгчәх һазрт орхларн, тенд ик чолуд тәвтн, тедниг дотлар цәәлһтн.

³ Тер чолуд деер эн Закаг цугтаһинь бичтн. Энүг талдан эргднь һарад таднд Деед Эзнә, тадна Бурхна, өгчәх һазрт орхларн кетн. Тер үсәр болн балар байн һазриг Деед Эзн, тадна өвкнрин Бурхн, өгх болла.

⁴ Йорданиг һатлад һархларн, мини ода келҗәх чолудыг Гевал уул деер тәвтн. Тедниг дотлар цәәлһтн.

⁵ Тенд Деед Эзнд, тадна Бурхнд, төмр зер-зевлә харһгдад уга чолудар тәклин орм кетн.

⁶ Ясгдад уга чолудар Деед Эзнд, тадна Бурхнд тәклин орм тосхтн. Тенд Деед Эзнд, тадна Бурхнд, нерәдсн шаталһна бәрцин авъяс күцәтн.

⁷ Терүн деер эвцлһнә бәрц бәртн, тегәд Деед Эзнә, тадна Бурхна, өмн идтн, нәәрлтн!

⁸ Эн Закаг төвәр болн тодрхаһар чолуд деер бичтн.

⁹ Левин отгин гелңгүдлә хамдан Моше Израилин улст цугтаднь келв: – Израиль, тагчгр, оньган өг! Эндр тадн Деед Эзнә, тадна Бурхна, улс болвт.

¹⁰ Деед Эзиг, тадна Бурхиг, соңстн, Терүнә закврмудыг болн зокалмудыг күцәтн. Тедниг таднд би эндр соңсхад келҗәнәв.

Гаризим уул деер кех әдс болн Гевал уул деер кех харал

¹¹ Тер өдртән олн-әмтнд Моше заквр өгв:

¹² – Йордан һолыг һатлад һархларн, Шимона, Левин, Йудан, Исахарин, Йосипин болн Беняминә отгуд Гаризим уул деер зогсад олн-әмтиг әдслтхә.

¹³ Рубена, Гәдин, Ашерин, Завулуна, Дана болн Напталин отгуд Гевал уул деер зогсад харал тәвтхә.

¹⁴ Левитмүд Израилин улст цугтаднь чаңһар келтхә:

¹⁵ «Эрдмтә күүнә кесн һар кегдл эс гиҗ цутхсн кегдл Деед Эзнд җигшүртә. Тедниг босхад, нуувч ормд бәрхлә, тер күн харалла харһх!» Әмтн цугтан келх: «Тиигтхә!»

¹⁶ «Эцкән эс гиҗ экән һутасн күн харалла харһх!» Әмтн цугтан келх: «Тиигтхә!»

¹⁷ «Өөрхн күүнәннь меҗә көндәсн күн харалла харһх!» Әмтн цугтан келх: «Тиигтхә!»

¹⁸ «Сохр күүг хаҗһр хаалһар авч йовсн күн харалла харһх!» Әмтн цугтан келх: «Тиигтхә!»

¹⁹ «Нүүҗ ирсн әмтнә, өнчн әмтнә болн белвсн күүнә зөвинь эс күцәсн күн харалла харһх!» Әмтн цугтан келх: «Тиигтхә!»

²⁰ «Эцкиннь гергнлә дерән негдүлсн күн – эцкән һутаҗахмн болҗана. Тиим күн харалла харһх!» Әмтн цугтан келх: «Тиигтхә!»

²¹ «Ямаран чигн малта негдәд ниилсн күн харалла харһх!» Әмтн цугтан келх: «Тиигтхә!»

²² «Эгчнр-дүүтәһән, эврәннь эцкин күүкнлә эс гиҗ эврәннь экин күүкнлә дерән негдүлсн күн харалла харһх!» Әмтн цугтан келх: «Тиигтхә!»

²³ «Эврәннь хадм эктә дерән негдүлсн күн харалла харһх!» Әмтн цугтан келх: «Тиигтхә!»

²⁴ «Эврәннь өөрхн күүг нуувчар алсн күн харалла харһх!» Әмтн цугтан келх: «Тиигтхә!»

²⁵ «Кен-негнь кү алсндан мөңг авснь, буру уга күүнә цус асхснь харалла харһх!» Әмтн цугтан келх: «Тиигтхә!»

²⁶ «Эн Закаг эс күцәсн күн, эс бәрсн күн харалла харһх!» Әмтн цугтан келх: «Тиигтхә!»