Давтх Закан 26 - Хальмг келнд орчулсн Әрүн Бичлһс

Түрүн темсд болн арвна хүв

¹ Деед Эзнә, тадна Бурхна, таднд эзлтхә гиһәд өгчәх һазрт ирхләрн, терүг эзләд, тенд бүүрлхләрн,

² Деед Эзнә, чини Бурхна, өгсн һазрас цуглулҗ авсн урһцин түрүн темсдинь зембльд тәвәд Деед Эзнә, чини Бурхна, Эврәннь нернд бәәр кехәр йилһҗ авсн ормд авч ир.

³ Тер цагт бәәх гелң тал одад кел: «Ода би Деед Эзнд, чини Бурхнд, эн һазрт ирүв гиҗ герчлҗәнәв. Энүг Тер маднд өгх болҗ мана өвкнрт андһар тәвҗ».

⁴ Гелң чини земблиг авад, Деед Эзнә, чини Бурхна, тәкл тәкдг ормин өмн оркх.

⁵ Чи Деед Эзнә, чини Бурхна, өмн зогсад кел: «Мини өвк тенәд йовдг арамей билә. Цөөкн улс дахад тер Египет орад, тенд нүүҗ ирсн күн болҗ бәәв. Терүнәс тенд алдр, чидлтә болн тооһарн олн улс үүдв.

⁶ Египетин әмтн мадниг мууһар бәрәд, даҗрад, күнд көдлмш келгүлдмн.

⁷ Тиигхлә бидн Деед Эзиг, мадна өвкнрин Бурхиг, дуудвидн. Деед Эзн мадниг соңсв, мадниг түрҗәхиг, энлҗәхиг болн зовҗахиг үзв.

⁸ Тегәд Деед Эзн мадниг Эврәннь Күчтә һарарн, Эврәннь күчәрн, алдр болн әәмшгтә темдг, болн өвәрц юм кеһәд Египетәс һарһв.

⁹ Мадниг нааран авч ирәд, үсәр болн балар байн эн һазр өгв.

¹⁰ Тегәд Танд, Деед Эзн, нанд өгсн һазрин урһцин түрүн темс авч ирүв». Дарунь земблән Деед Эзнә, чини Бурхна, өмн тәвәд, мөрг.

¹¹ Деед Эзнә, чини Бурхна, чамд болн чини өрк-бүлд өгсн тоотыг эдләд байран ке. Тадн дунд бәәх левитмүд болн нүүҗ ирсн әмтн чамла хамдан нәәрлтхә.

¹² Арвдгч әңгин һурвдгч җилд, эврәннь цуг урһцин арвдгч әңгинь левитд, нүүҗ ирсн күүнд, өнчн-өвүд болн белвсн гергнд чини балһсдт цадтлан идтхә гиһәд өгхләрн,

¹³ тегәд Деед Эзнә, чини Бурхна, өмн кел: «Би эврәннь гертәс әрүн әңгинь авад терүг левитд, нүүҗ ирсн күүнд, өнчн-өвүд болн белвсн гергнд өгүв. Тана заасар цугтаһинь кевүв. Тана зааврмудас нег чигн юм эвдсн угав, нег чигн заавриг мартсн угав.

¹⁴ Өңгрсн кенд чигн һундрхад уульхларн, би эврәннь әрүн әңгиг идсн угав. Бузрдхларн нег чигн юм терүнәс авсн угав. Терүг өңгрсн күүнә төлә өгсн угав. Би Таниг, Деед Эзиг, мини Бурхиг, соңслав. Тана заксиг цугтаһинь төвәр күцәләв.

¹⁵ Теңгрәс, Тана бәәх әрүн бәәрнәс хәләһәд Израилиг, Эврәннь әмтиг болн маднд өгсн тер байн һазриг йөрәтн. Терүг, үсәр болн балар байн һазриг, өгх болҗ мадна өвкнрт андһар тәвләт».

Бурхна заквр бәрлһнә сурһмҗ өглһн

¹⁶ Ода Деед Эзн, тана Бурхн, тадниг урднь келсн эн зокалмудыг болн закадыг бәртхә гиҗ закчана. Тедниг батар бәртн – цуг зүркнәсн, цуг седкләсн!

¹⁷ Тадн Деед Эзн – тадна Бурхн гиввт. Ода тадн Терүнә даалһврар йовхит, Терүнә зокалмуд, закврмуд болн закад күцәхит гиҗ келвт, Терүг соңсх болвт.

¹⁸ Деед Эзн болхла, урднь андһар өгсәрн ода тадн Терүнә келн-улс, Терүнә зөөр болхит гиҗ келҗәнә. Тадн Терүнә зааврмудыг цугтаһинь күцәх йостат.

¹⁹ Тадниг Бурхн үүдәсн цуг әмтн дундас деегшән өөдлүлх. Таднд Тер магтал, туурмҗ болн әрүн нер белглҗәнә. Тегәд тадн Деед Эзнә, тана Бурхна, әрүн улс болхит. Тиигхәр Тер андһар өглә.