Давтх Закан 25 - Хальмг келнд орчулсн Әрүн Бичлһс

¹ Үлгүрнь, зүтклдҗәх хойр күн зарһд ирнә – зарһ теднә зүткә хаһлад зөвтәһинь зөвтә гиһәд, бурутаһинь бурута гиһәд йилһнә.

² Тегәд кемр бурутаһинь цокх болхла, тиигхлә терүг зарһчин нүүрт һазр деер кевтүләд, буруһиннь кирцәһәр зарһчин келсәр цоктха.

³ Эс гиҗ 40 дәкҗ цокснас үлүһәр цокҗ болшго. Кемр терүнәс икәр цокхла, чини өөрхн күн чини нүүрт басгдх.

⁴ Теермдҗәдг царин амиг бичә бо.

⁵ Кемр ахнр-дүүнр хамдан бәәҗәһәд, теднә негнь көвү үлдәлго өңгрхлә, өңгрсн залуһин гергн күүнә күүнд мордшго болҗана. Залуһиннь көвүн дү терүнә гергинь автха, терүнлә бәәтхә.

⁶ Гергнә һарһсн түрүн үрн өңгрсн залуһин хөөт үйнь болҗ тоолгдх. Эннь өңгрсн ахин нерн Израильд мартгддгоһар тиигҗәнә.

⁷ Кемр тер күн эврәннь бергән мордулҗ авхар эс седхлә, тер гергн балһсна ик үүдн тал ирәд медәтнрт иигҗ келтхә: «Мини көвүн дү Израильд ахиннь нериг хадһлхар бәәхш. Ахан тер сольхар седҗәхш!»

⁸ Тиигхлә балһсна медәтнр терүг дуудад күүндх йоста. Кемр бергән буулһҗ авшгоһар һацад бәәхләнь,

⁹ медәтнрин нүүрт бергнь терүн тал одад көләснь буршмгинь тәәлҗ авад, чирәднь нульмад келтхә: «Эврәннь ахин гериг эс бүтәхлә иигдмн!»

¹⁰ Израилин улс дунд терүнәс һарсн өрк-бүлнь иим нер авх: Көл нүцкн отг.

¹¹ Кемр хойр күн ноолдҗахла, негнәннь гергн цокчах күүнәс залуһан харсхар ирәд, терүнә эрин мөчәс бәрхлә,

¹² гергнә һаринь чавчтн. Бичә терүг хармнтн!

¹³ Эврәннь сузһд негнь ик, негнь бичкн хойр әдл биш чолун гиир бичә бәр.

¹⁴ Гертән негнь ик, негнь бичкн хойр әдл биш кемҗәнә сав бичә бийдән бәр.

¹⁵ Чини гиир чик төв чиңнүртә болх зөвтә, кемҗәнә сав чик, төв кемҗәтә болх зөвтә. Тегәд Деед Эзнә, чини Бурхна, чамд өгчәх һазр деер җирһл ут наста удан болх.

¹⁶ Тиим йовдл һарһҗадг кен чигн күн – кен чигн мекч – Деед Эзнд, чини Бурхнд җигшүртә.

¹⁷ Тадниг Египетәс ирҗ йовхд амалекмүд ю һарһсинь ухалтн!

¹⁸ Тадниг тосҗ авхларн, тедн ардастн дәврәд үлдсинь ка цокад алв. Тадн цуцрад, чидл уга биләт. Амалекмүд болхла Бурхнас әәсн уга.

¹⁹ Деед Эзн, тана Бурхн, эзлтхә гиһәд өгчәх һазртан таднд төвкнүн җирһл белглҗәхлә, тадниг бүслҗәх хортнас харсхла, Амалекин улсин туск тодлвриг эн делкә деерәс уга кетн. Бичә марттн!