Давтх Закан 24 - Хальмг келнд орчулсн Әрүн Бичлһс

¹ Үлгүрнь, залу күн гер авад, гергтәһән бәәҗәхләнь, гергнь эс таасгдхлань, эс гихлә ирлцшго ичртә бәәдл үзхләрн, терүнд салҗах герчин цаас өгәд, гертәсн көөхлә,

² тер гергн гертәснь һарн талдан залуд мордна.

³ Кемр мордсн гергн хойрдгч залудан эс таасгдхла, тернь бас салх герчин цаас өгәд, гертәсн көөхлә, эс гиҗ терүнә хойрдгч залунь өңгрхлә,

⁴ түрүңк залунь тер гергиг хәрү авч чадшго, яһад гихлә тер цевр биш болҗана. Деед Эзнд эннь җигшүртә болх билә! Деед Эзнә, тана Бурхна, таднд эзлтхә гиһәд өгчәх һазриг бичә килнцәр бузрдатн.

⁵ Кемр залу күн шиңкән гер авсн болхла, дәәнд тер мордшго болҗана. Терүнд бичә талдан даалһвр өгтн. Нег җилдән тер сулар бәәтхә. Гертән тер бәәһәд авсн гергән байрлултха.

⁶ Һар теермиг бәрәнд авдмн биш (һанцхн деерк теермин әңгиг чигн) – эннь күүнә җирһлиг авснла әдл болҗана.

⁷ Кемр кен-негнь кү хулхалҗ авхла – тернь Израилин улсин ахнр-дүүнр болхла, дәкәд терүнәс олз бийдән кехәр хулдсн болхла, хулхач алгдх йоста. Хорта йовдлыг эврәннь бәәрнәсн уңгарнь уга кетн!

⁸ Кемр арсна гем ирхлә, Левин отга гелңгүдин таднд дасхсиг батар бәрәд күцәтн. Теднд мини заксар кевтнь күцәтн.

⁹ Тадниг Египетәс йовҗ йовхд Деед Эзн, тана Бурхн, Мирьямла ю кесинь сантн.

¹⁰ Кемр чи өөрхн күүндән өгйәһәр юм өгсн болхла, бәрүлсн деер өмсдг хувцан авхар гертнь бичә ор.

¹¹ Одад гериннь һаза чи зогсҗа, тер күн авсан эврән чамд һарһҗ өгх.

¹² Кемр тер күн угатя болхла, терүнә бәрүлһнд авсн юмн чамд бәәхлә, бичә унт.

¹³ Нарн суутл терүнд кергтә юминь хәрү өг. Яһад гихлә тер деер өмсдг хувцарн бийән хучад унтхларн, чамд ханлтан өргх билә. Тегәд чи Деед Эзнә, чини Бурхна, өмн үннч күн болхич.

¹⁴ Чини һазрт тадна балһсдын негнд бәәх чини ахнр-дүүнрин, эс гиҗ нүүҗ ирсн әмтнә нәәмәдлҗ авсна кен-негинь бичә даҗрхар сед. Терчн угатя болчкад хөв уга күн.

¹⁵ Терүнә шиңгәсн мөңгинь тер өдртнь нарн суутл өг. Яһад гихлә тер күн угатя, шиңгәсн мөңгәрн тер әмд йовна. Эс гиҗ тер Деед Эзиг дуудад чини тускар зарһ бәрх. Тегәд чи килнцд орхич!

¹⁶ Көвүдин һарһсн гемәс көлтә эцкнриг гемшәҗ болшго, эцкнрин гемәс көлтә көвүдиг гемшәҗ болшго. Күн болһн зуг эврәннь һарһсн му йовдларн алгдхмн болҗана.

¹⁷ Нүүҗ ирсн әмтнә болн өнчн әмтнә йосиг бичә даҗр. Белвсн гергчүдин хувц бәрүлһнд бичә ав.

¹⁸ Египетд чи эврән мухла болҗ бәәсән сан. Деед Эзн, чини Бурхн, чамаг мухлан бәрәнәс сулдхла. Тегәд би чамд тиим заавр өгчәнәв.

¹⁹ Кемр хадлһна цагт хадҗах тәрәндән буудян нег боодһа мартхларн, терүг авхар бичә хәрү од. Терчн нүүҗ ирсн күүнд, өнчн күүнд эс гиҗ белвсн гергнд күрттхә. Тегәд Деед Эзн, чини Бурхн, чини ямаран чигн күцәх кергичн әдслх.

²⁰ Кемр олив моднасн темсинь авхларн, ац деернь үлдсн оливсиг бичә цуглул, тедниг нүүҗ ирсн күн, өнчн күн эс гиҗ белвсн гергн автха.

²¹ Уста үзмән цуглулхларн, ац деернь үлдсинь бичә ав, тернь нүүҗ ирсн күүнд, өнчн күүнд эс гиҗ белвсн гергнд күрттхә.

²² Египетд чи эврән мухла болҗ бәәсән сан. Тер учрар би чамд тиим заавр өгчәнәв.