Давтх Закан 23 - Хальмг келнд орчулсн Әрүн Бичлһс

Деед Эзнә хамцанд кен орҗ чадхнь, орҗ чадшгон тускар

¹ Илҗрсн оман өндгтә эс гиҗ керчгдсн эрин мөчтә залу күн Деед Эзнә хамцанд орҗ чадшго.

² Нуувчар олдсн күн болн теднә хөөт үйнр арвдгч үйдән чигн Деед Эзнә хамцанд орҗ чадшго.

³ Амонмуд болн моавмуд, теднә хөөт үйнр нам арвдгч үйдән Деед Эзнә хамцанд кезә чигн орҗ чадшго!

⁴ Тадниг Египетәс ирҗ йовхла, тедн өдмг, ус авч хаалһ деертн һарч тоссн угалм. Тадниг харатха гиҗ Петор балһснас Арам-Нахараимд тедн Беорин көвүн Баламиг нәәмәдлҗ авла.

⁵ (Болв Деед Эзн, тана Бурхн, Баламиг соңсхар седсн уга. Тегәд Баламин харалыг чамд нерәдсн әдст хүврәв. Яһад гихлә Деед Эзн, тана Бурхн, таднд дурта.)

⁶ Тегәд чигн әмд-менд бәәсн деерән теднд эвтә бәәдл болн тогтун җирһл учрах юм бичә кетн.

⁷ Эдомин улсиг бичә һазалтн, яһад гихлә тедн тадна өөрхн төрл улс. Египетин улсиг бичә һазалтн, яһад гихлә теднә орн-нутгт тадн нүүҗ ирсн улс болҗ бәәләт.

⁸ Теднә хөөт үйнр һурвдгч үйдән Деед Эзнә хамцанд орҗ чадх.

Дәәчнрин цевр бәәдлин тускар

⁹ Тадн дәәснләһән дәәлдхәр йовхларн, ямаран чигн җигшүртә юмнас саглтн.

¹⁰ Кемр залу күүнәс сөөһәр һарсн асаһас көлтә кен-негнь бузрдсн болхла, тиигхлә тер күн бәәрнәс һазаран һартха. Бәәрнд тер оршго болҗана.

¹¹ Асхндан бийән уһатха, нарн суухла бәәрндән хәрү орҗ чадҗана.

¹² Бәәрнәс һазаран һарад мөрән үздг орм бәәх йоста.

¹³ Күн болһн эврәннь зер-зевәс талдан бас бийдән күрзтә бәәтхә. Кергтә цагтан нүк малтад мөрән үзчкәд, кирән булхмн болҗана.

¹⁴ Яһад гихлә Деед Эзн, тадна Бурхн, тадниг харсад болн диилвр белгләд, тадн дунд дәәчнрлә хамдан нег бәәрнд йовҗ йовна. Тер учрар тадна бәәрн әрүн болх зөвтә. Тадн дунд Тер ичртә юм үздгоһар болн тадниг хайҗ йовдгоһар әрүнәр бәәтн.

Талдан закад

¹⁵ Эзнәсн тадн тал зулад гүүсн мухлаг эзнднь бичә бәрүлҗ өгтн.

¹⁶ Танад тер бәәтхә, таасгдсн нег балһснд бәәтхә. Бичә терүг шахҗ һундатн.

¹⁷ Израилин күүкд болн көвүд дунд бийән аля җирһлд нерәдсн күн уга болтха.

¹⁸ Аля бәәдләр олҗах мөңгән Деед Эзнә, чини Бурхна, өргә герт орулҗ өгх зөв кенд чигн бичә өг, нам терүг өгнәв гисн бийнь. Деед Эзнд, чини Бурхнд, аля йовдл һарһдг гергчүд болн залус җигшүртә.

¹⁹ Эврәннь отга әмтнд цаһан мөңг болну, иддг хот болну олз авхар бичә өг.

²⁰ Күүнә күүнд үнинь баһрул, эврә отга күүндән бичә тииг. Тиигхлә Деед Эзн, чини Бурхн, чини бәәхәр йовх болн эзлх һазртчнь ямаран чигн кергичн әдслх.

²¹ Кемр чи Деед Эзнд, чини Бурхнд, андһар өгсн болхла, хооран саалго күцә терүгән, яһад гихлә Деед Эзн, чини Бурхн, маһд уга чамас андһарлсичн некх. Чамд килнц тусх.

²² Кемр андһар эс өгхлә, чамд килнц уга болх.

²³ Андһарлҗ келсән батар бәрәд күцә, Деед Эзнд, чини Бурхнд, эврән келсән сән дурар күцә.

²⁴ Кемр чи талын күүнә уста үзмин тәрәнд орхларн, цадтлан идҗ чадҗанач, болв савдан бичә цуглулҗ ав.

²⁵ Кемр чи талын күүнә буудян тәрәнд орхларн, буудян толһаг һарарн таслад ав, зуг күүнә буудян толһасиг хадурар бичә хад.