Давтх Закан 21 - Хальмг келнд орчулсн Әрүн БичлһсИлдкгдәд уга үклин төлә кегдҗәдг гемән хәрүллһнә бәрц 1 Кемр Деед Эзнә, тана Бурхна, таднд эзлтхә гиһәд өгчәдг һазрт тегш ормд алгдсн күн кевтхлә, болв кен алсинь эс медгдхлә, 2 тиигхлә тадна медәтнр болн зарһчнр ирәд, хаҗудк балһсдас алгдсн күн күртл һазр кемҗәләд, 3 ямаран балһснд тер күн өөрхн бәәхинь йилһтхә. Тер балһсна медәтнр яарм зүүлһәд уга, көдлмшт орулад уга баахн үкр шүүҗ автха. 4 Тер үкриг медәтнр хагсдго һооҗур тал авч ирәд, күзүһинь мошктха. (Тер һооҗурин эрг деер күн һазр хаһлад уга, тәрә тәрәд уга болх йоста.) 5 Дарунь Левин отгин гелңгүд иртхә. Тедниг Деед Эзн, тадна Бурхн, Бийдән мөргтхә болн Деед Эзнә нерәр әмтиг әдслтхә гиҗ шүүҗ авсмн. Левин отгин гелңгүд зүткәтә сурврмудыг болн ноолдсн улс мөчдән гем авсна кергинь тәәлхмн болҗана. 6 Алгдсн күүнд өөрхн бәәсн балһсна медәтнр һооҗурин хаҗуд күзүһинь мошксн үкр деер һаран уһатха. 7 Тегәд келтхә: «Мана һар эн цусиг асхсн уга, яһҗ цусн асхрсинь бидн бас үзсн угавидн. 8 О, Деед Эзн, Эврәннь улсан цеврлтн, бәрәнәс Тана сулдхсн Израилин улсиг цеврлтн! Израилин әмтнд, Эврәннь улст асхрсн буру уга цусна гемиг бичә даалһ». Тегәд тедн цуснас цеврлгдх. 9 Тиигҗ тадн асхрсн буру уга цусна гемиг бийәсн буулһхит. Тернь Деед Эзнд тааста болх. Бәрәнд орулсн күүкд күүг мордулҗ авлһна тускар 10 Тадн дәәснләһән дәәлдхәр йовхла Деед Эзн, тадна Бурхн, тедниг тадна һарт бәрүлхлә, тадн бәргдсн әмтиг бәрәнд авхар йовҗ йовтл, 11 тедн дунд чи сәәхн күүкд кү үзхич, тер чамд таасгдх, терүг чи мордулҗ авхар седхич. 12 Тиигхлә терүг чи гер талан дахулҗ од. Тер күүкд күн үсән хусад, хумсан хәәчләд, 13 бәрәнә күүнә хувцан тәәләд, нег сардан чини герт бәәһәд, эцкән болн экән һашудҗ ууляд сантха. Энүнә дару чи терүнлә нииләд, гергн залу хойр болхит. 14 Кемр чи терүнд эс дурлхла, сулдхад тәвчк. Кемр чи терүнлә нииләд бәәсн болхла, терүг хулдшго болҗанач, терүг мухлала әдл бәршго болҗанач. Түрүн һарсн көвүнә зөвин тускар 15 Кемр залу күн хойр гергтә болад негнднь дурлад, негнднь эс дурта болхла, дурта, дурго хойрнь терүнд көвүд һарһҗ өгхлә – тиигхләрн түрүн һарснь дурта биш гергнә көвүн болна, – 16 болв эцк болсн залу көвүдиннь хоорнд зөөрән йилһҗ өгхләрн, дурта гергнәннь көвүнд дурта биш гергнә түрүлҗ һарсн көвүнәс урд хүвинь өгч чадшго болҗана. 17 Дурта биш гергнә көвүг эцкнь түрүңк үрн гиҗ тоолад, зөөрәсн хойр дам үлү әңг өгх йоста. Эн көвүнь терүнә залу гисн түрүн чидлинь медүлҗәхмн болҗана. Тегәд түрүңк үрнә зөвнь энүнә зөв. Соңсхвр уга көвүнә тускар 18 Кемр кенд болв чигн һацдг болн эцкән чигн, экән чигн соңсдго көвүн бәәхләг, кедү засглв чигн тедниг соңсдго болхла, 19 тиигхлә эцк эк хойрнь терүг балһсна медәтнр тал, балһсна ик үүдн тал авч иртхә. 20 Тедн медәтнрт келтхә: «Мана көвүн һацата, закрмҗ авхш. Эн мадниг соңсчахш, ик хотта, әркнч болв». 21 Балһсна әмтн энүг чолуһар шивәд алтха. Хорта йовдлыг бәәрнәсн уңгарнь уга кетн! Израиль кевтән энүнә тускар медәд әәцхәх. Цааҗлад бахнд өлглһнә тускар 22 Кемр күн хорта йовдл һарһад, алгдх йоста болад, терүг цааҗлад үзүртә бахн деер өлгсн болхла, 23 цогцинь сөөһәр бахн деер үлдәшго болҗана. Тиим күн тер өдртән оршагдх йоста. Өлггдсн күн Бурхна харалд орҗана! Деед Эзнә, тана Бурхна, эзлтхә гиһәд өгчәх һазриг бичә бузрдатн. |
© Институт перевода Библии, 2002-2023
Institute for Bible Translation, Russia