Давтх Закан 2 - Хальмг келнд орчулсн Әрүн Бичлһс

Көдә һазриг эрглһн

¹ Бидн хәрү эргәд көдә һазр тал Улан теңгсүр һарсн хаалһар йоввидн. Тиигтхә гиҗ Деед Эзн нанд закв. Сеирин уулыг эргәд бидн удан йоввидн.

² Дарунь Деед Эзн нанд келв:

³ «Эн уулмудыг эргәд йовснтн болҗана. Ар үзг тал йовтн.

⁴ Тегәд олн-әмтнд кел: Тадн эврәннь ахнрин, Сеирт бәәх Эсавин хөөт үйнрин, һазрар йовхит. Тедн таднас әәҗәнә. Хәләҗ йовтн,

⁵ теднлә бичә дәәлдтн! Нам нег ишкдл теднә һазрас таднд Би өгшгов. Яһад гихлә Сеирин уулыг Би Эсавд эзлтхә гиҗ өгләв.

⁶ Идх хотан, уух усан цаһан мөңгәр теднәс хулдҗ автн.

⁷ Деед Эзн, тана Бурхн, күцәх цуг кергтән күцәмҗтә болтн гиҗ тадниг әдслҗәнә! Эн алдр көдә һазрар тадн йовҗ йовхиг Тер меднә. Ода 40 җилдән Деед Эзн, тана Бурхн, таднла хамдан. Тегәд тадн ямаран чигн юмар дутҗахшит».

⁸ Бидн Эсавин хөөт үйнрин – эврәннь ахнрин – һазрас салад һарвидн. Хаалһдан бидн Элатас болн Эцион-Геверәс Арава дундаһур һарад Моавин көдә һазр тал йоввидн.

⁹ Деед Эзн нанд келв: «Моавин улсиг бичә дәвртн, теднлә дә бичә эклтн. Теднә һазрас Би таднд юм өгшгов. Яһад гихлә Би Лотын хөөт үйнрт Ар балһсиг эргндк һазртаһинь эзлтхә гиҗ өгләв».

¹⁰ (Урднь тенд эмитмүд бәәлә. Тер әмтн ик, тооһарн олн, анакмудла әдл өндр.

¹¹ Тедниг анакмудла әдл рефаим улст тоолна. Моавин улс тедниг эмитмүд гиҗ келцхәнә.

¹² Сеирт болхла, урднь хореймүд бәәлә. Болв Эсавин хөөт үйнр теднә һазриг булаҗ авад, тедниг ка цокад, эврән тенд бүүрлцхәв. Деед Эзнә эзлтхә гиһәд өгсн тер һазриг Израилин улс бас тиигҗ кецхәлә.)

¹³ «Уралан! – гиҗ Деед Эзн келв. – Зеред уулын хавчг һатлтн!» Бидн Зеред уулын хавчг һатлвидн.

¹⁴ Кадеш-Барнеас бидн 38 җил йоввидн. Тегәд Зеред уулын хавчгиг һатлад һарвидн. Деед Эзн теднд андһар өгсәр мадна бәәрнд урдк үйин дәәчнрәс мел күн уга билә.

¹⁵ Мана бәәрнд Деед Эзнә һар теднд күрәд неҗәдәр уга кев, чилгчднь теднәс әмд кен чигн үлдсн уга.

¹⁶ Тер дәәчнр негн күртлән үкхләг,

¹⁷ Деед Эзн нанд келв:

¹⁸ «Тадн Ар балһсна хаҗуһар моавмудын һазрар эндр йовхар бәәнәт,

¹⁹ удл уга амонмудын орн-нутгт күрхит. Тедниг бичә дәвртн, теднлә дә бичә эклтн. Теднә һазрас таднд Би юм өгшгов. Яһад гихлә Би эн һазрмудыг Лотын хөөт үйнрт эзлтхә гиҗ өгләв».

²⁰ (Эн һазриг бас рефаимүдин һазрт тоолҗана. Урднь энд рефаим улс бәәҗ. Тедниг амонмуд замзумс гиҗ нерәддг бәәҗ.

²¹ Эдн ик тооһарн олн, анакмудла әдл өндр келн-улс бәәҗ. Болв Деед Эзн тедниг уга кеҗ, амонмуд теднә һазриг эзләд тенд бәәцхәҗ.

²² Деед Эзн амонмудт Сеирд бәәсн Эсавин хөөт үйнрт кеснлә әдләр кев. Тертн хореймүдиг уга кев. Тегәд Эсавин хөөт үйнр теднә һазр эзләд, ода күртл тенд бәәцхәнә.

²³ Капторас ирсн улс Газа эргндк селәдәр бәәсн авей нертә әмтиг уга кеһәд, теднә һазрт бәәрлцхәв.)

Сихон хааниг дииллһн

²⁴ «Уралан! – гиҗ Деед Эзн келв. – Арнон уулын хавчг һатлтн! Хәләтн, Би тадна һарт Хешбонд һардҗасн амореймүдин хан Сихониг болн терүнә һазриг өгчәнәв. Экләд эзлтн! Дәәлдтн!

²⁵ Эн өдрәс авн теңгр дор бәәх әмтнд цугтаднь Би таднас әәдг, сүрддг седкл орулнав. Тадна тускар соңсчкад тедн чичрәд, догдлад бәәцхәх!»

²⁶ Кедемотын көдәһәс Хешбона хан Сихон тал эвцхәр би элчнр йовулув. Би терүнд иигҗ келтхә гивүв:

²⁷ «Буйн болтха, чини һазрар давад йовх зөв маднд өг. Бидн тустан хаалһар йовнавидн, зүн тал чигн, барун тал чигн хаҗишговидн.

²⁸ Мадна идх хотыг, мадна уух усиг чи маднд цаһан мөңгәр хулд. Зуг маднд чини һазрар йовх зөв өг –

²⁹ Сеирд бәәх Эсавин хөөт үйнр болн Ард бәәх Моавин улс зөв өгснлә әдләр – тегәд бидн Йордана ца бәәх һазр тал одхвидн. Терүг маднд Деед Эзн, мана Бурхн өгчәнә».

³⁰ Болв Хешбона хан Сихон мадниг давулҗ һарһхар седсн уга. Деед Эзн, мана Бурхн, Сихониг тадна һарт орулхин төлә, терүнә седклинь һацулв, зүркинь эвцдгоһар кев. Санснь күцв.

³¹ Деед Эзн нанд келв: «Хәлә, Би түрүләд чамд Сихониг болн терүнә орн-нутгиг өгнәв! Эн орн-нутгиг экләд эзлҗ ав».

³² Сихон цуг дәәчнртәһән мадна өмнәс тосҗ һарад, Яхацин өөр дәәлдв.

³³ Деед Эзн, мана Бурхн, терүг мадна һарт бәрүлв. Бидн терүг болн терүнә көвүдиг, цуг дәәчнринь ка цокад алвидн.

³⁴ Тер цагт бидн терүнә балһсдыг цугтаһинь буйсаһад уга кеввидн. Тер балһсдт залусиг чигн, гергчүдиг чигн, бичкдүдиг чигн, негн күртлнь цугтаһинь бидн алвидн.

³⁵ Зуг малмудынь болн балһсдт авсн олвриг бийдән үлдәвидн.

³⁶ Арнон уулын хавчг деер бәәх Ароэрәс болн тиньгр һазрт бәәх балһснас нам Гилад күртл нег чигн шивән улс маднд харш болҗ чадсн уга. Деед Эзн, мана Бурхн, цугтаһинь маднд өгв!

³⁷ Болв амонмудын орн-нутгиг тадн даҗрсн угат. Ябок һолын тиньгр һазриг чигн, уулар бәәх балһсдыг чигн тадн даҗрсн угат. Тиигтхә гиҗ Деед Эзн, тана Бурхн закла.