Давтх Закан 19 - Хальмг келнд орчулсн Әрүн Бичлһс

Хорһдх бас һурвн балһсн

¹ Таднд өгчәх һазрин улсиг Деед Эзн, тадна Бурхн, алад чиләснә хөөн, теднә һазриг тадн эзләд балһсдтнь болн гермүдтнь бәәрләд бәәснә хөөн,

² Деед Эзнә, тадна Бурхна, эзлтхә гиһәд өгчәх тер һазрт һурвн балһс салһад һарһҗ автн.

³ Деед Эзнә, тадна Бурхна, өгчәх һазриг кемҗәләд һурвн әңгд хуватн. Кемр кү алсн күн зулхар седхләрн, тер балһсдт бултҗ чадх.

⁴ Иим балһсдын негнднь кү алсн күн бултад әмән харсҗ чадхмн болҗана: кемр тер зөрц эс алсн болхла, алгдсн күүнлә тер өшән уга бәәсн болхла.

⁵ Үлгүрнь, күн ө-шуһу модн тал түлә кех мод авхар кенлә болв чигн хоюрн йовад, мод чавчхар сүк өргхлә, сүкнь ишәсн мөлтрәд хаҗудк күн деер унад алсн болхла, тиим күн тер балһсдын негн талнь гүүһәд бултад әмән харсҗ чадхмн болҗана.

⁶ Өшәһән авхар уурлсн күн терүг көөлдәд, хаалһ дегд ут болсар, күцәд алдгоһар тиигҗ кеҗ. Эн күн алгдшго, яһад гихлә теднә хоорнд өшән уга билә.

⁷ Тегәд һазртан һурвн балһс йилһәд һарһтн гиҗ би таднд закчанав.

⁸ Кемр Деед Эзн, тадна Бурхн, тадна өвкнрт андһар өгсәр, тадна һазриг икдүләд кевтнь таднд өгхлә,

⁹ (тадн мини өгчәх зааврмудыг маһдл уга күцәһәд, Деед Эзнд, тана Бурхнд, дурта болад, оньдинд Терүнә хаалһар йовхла тиим болх), – тегәд тер һурвн балһсн деер бас һурвн балһс немтн.

¹⁰ Тегәд Деед Эзнә, тадна Бурхна, таднд өгчәх һазрт буру уга күүнә цусн асхршго. Цусн асхрсар таднд гем уга болх.

¹¹ Болв тер өөрхн күүндән дурго болад, гетҗәһәд дәврәд алчкад, дәкәд тер балһсдын негн талнь гүүсн болхла,

¹² тиигхлә алачин бәәсн балһсна медәтнр терүг зулҗ гүүсн тер балһснаснь авхулад, өшәтнднь бәрүлтхә. Бурута күүг алтха.

¹³ Терүг бичә хармнтн! Израилиг тер гемәс – буру уга күүнә цусн асхрснас – сулдхтн. Тегәд таднд сән болх.

Һазрин әңгин меҗән тускар

¹⁴ Деед Эзнә, тадна Бурхна, өгсн һазрт өвкнрин һарһсн өөрхн улсин меҗәг бичә көндәтн.

Герчнрин болн худл герчнрин тускар

¹⁵ Зарһд орхла, негхн герч йос эвдсн эс гиҗ му йовдл кесн, ямаран чигн буру кесн күүг гемшәҗ чадшго. Хойр эс гиҗ һурвн герч бәәхлә, тегәд одҗ гемшәлһн чик болх.

¹⁶ Кемр худл келҗәх герч гем уга күүг гемшәҗәхлә,

¹⁷ тиигхлә тер хойр күн Деед Эзнә өмн, тер цагт бәәсн гелңгүдин болн зарһчнрин өмн һарх йоста.

¹⁸ Кемр зарһчнр кинән кевәр теднә төриг хәләһәд герч болҗах күн худлахар келәд, өөрхн күүһән бурушасн болхла,

¹⁹ тиигхлә өөрхн күүндән кехәр бәәсинь терүнлә кетн. Эврәннь әмтнәс хар саната йовдл уга кетн!

²⁰ Наадкснь цугтан терүнә тускар медәд әәцхәх, хөөннь таднас кен чигн күн тиим юм һарһшго.

²¹ Терүг бичә хармнтн! Әмнә ормд әмән өгх. Нүднә ормд нүдән өгх. Шүднә ормд шүдән өгх. Һарин ормд һаран өгх. Көлин ормд көлән өгх.