Давтх Закан 18 - Хальмг келнд орчулсн Әрүн Бичлһс

Левин отгин гелңгүдин хүвнь

¹ Израилин талдан улсар болхла, Левин отгин гелңгүдт цугтаднь эврә хүв болн әңг һазр уга болх. Теднә хүвнь – Деед Эзнд өргҗәх һалын бәрц, терүгәрн тедн эдлвр кех.

² Левин отга улст ахнр-дүүнр дунд хүв уга болх. Теднә хүвнь – Деед Эзн Эврән. Тиигҗ Тер андһар өгч теднд.

³ Олн-әмтн гелңгүдт иим юм өгх йоста: кемр бәрцд бод эс гиҗ үүрмг мал орулҗахла, тиигхлә гелңд малын түрүн көл махиг, терүнә өргиг болн дотриг өгтхә.

⁴ Гелңд урһцин түрүңк буудя, чаһр болн эврәннь урһцин олив тос, бас хөөһән түрүн хәәчлхләрн нооснаснь өгтхә.

⁵ Яһад гихлә Деед Эзн, тадна Бурхн, тадна отгуд дундас терүг шүүҗ авв. Тер болн терүнә хөөт үйнр оньдинд Деед Эзнә өмн бәәҗ, Деед Эзнә нернә төлә церглдгәр тиигв.

⁶ Кемр Израильд, тадна балһсдын негнднь Левин күн бәәҗәһәд, Деед Эзнә йилһҗ авсн ормд дурта цагтан ирхлә,

⁷ тер күн, талдан Левитнрлә әдләр тенд, Деед Эзнә, эврәннь Бурхна, өмн церглтхә.

⁸ Нам эврәннь уңг-тохминнь зөөр хулдад мөңгтә болсн бийнь, тер ахнртаһан әдл эдлвр авх зөвтә.

Илвч болн белг бәрдг әмтнд дурго боллһн

⁹ Кемр тадн Деед Эзнә, тадна Бурхна, өгчәх һазрт ирхләрн, тер әмтнә кедг җигшүртә юм бичә дастн.

¹⁰ Таднас кен чигн күн һалын бәрц гиҗ көвүһәрн эс гиҗ күүкәрн бичә бәртхә. Тадн дунд медлгч, белг бәрдг, тааҗ меддг, илвч күн уга болтха.

¹¹ Авта удһн, сүмс болн үксн кү дууддг әмтн бас уга болтха.

¹² Иим юм кесн әмтн Деед Эзнд җигшүртә. Деед Эзн, тана Бурхн, тиим юм кедг улсиг чамас көөх.

¹³ Деед Эзнә, тана Бурхна, өмн цевр болтн!

¹⁴ Тана булаҗ авх һазрин әмтн белг бәрдг болн медлгч әмтиг соңсна. Зуг тиим бәәдл таднд Деед Эзн, тана Бурхн, өгхәр седҗәсмн уга!

Деед Эзнә әәлдәч

¹⁵ Деед Эзн, тадна Бурхн, таднд нанла әдл әәлдәчиг илгәх. Тернь тадна негнь болх. Терүг соңстн!

¹⁶ Тегәд Деед Эзнәс, тана Бурхнас, Хорив уулын хаҗуд хамцана хургт сурснтн күцх. Тиигхд тадн келләт: «Дәкҗ Деед Эзнә, мана Бурхна, ду соңсхмн биш, эн һалын алдр заль хәләхмн биш, эс гиҗ бидн үкхвидн!»

¹⁷ Деед Эзн нанд келв: «Тедн чикәр келҗәнә.

¹⁸ Теднд Би чамла әдл әәлдәчиг өгнәв. Тернь теднә негнь болх. Би Эврәннь келх үгән терүнд өгнәв. Тегәд әмтнд Мини келхәр седсиг цугтаһинь терүнд закад келүлнәв.

¹⁹ Кемр кен-негнь Мини келсиг эс соңсхла, Мини нерн деерәс әәлдәчин келсиг эс соңсхла, Би Эврән тиим күүнәс сурхув!

²⁰ Кемр ямаран чигн талдан әәлдәч Мини нерн деерәс Мини эс кел гисиг келхлә, эс гиҗ талдан бурхдын нерн деерәс келхлә, терүг алх кергтә».

²¹ Чи ухалад чигн бәәхич: «Деед Эзнә йосндан эс келсиг бидн яһҗ медҗ чадхмб?»

²² Кемр Деед Эзнә нерн деерәс әәлдәчин келснь эс бүтхлә, эс күцхлә – тиигхлә Деед Эзн эс келсмн болҗана. Әәлдәч эврәннь седвәрәр келсмн болҗана. Бичә терүнәс ә!