Давтх Закан 17 - Хальмг келнд орчулсн Әрүн Бичлһс

Тәкл тәкх малын тускар

¹ Деед Эзнд, тана Бурхнд, эрмдгтә эс гиҗ ямаран чигн тату-тартгта цар, эс гиҗ хө тәкл тәклһнд бичә авч иртн. Тернь Деед Эзнд, тана Бурхнд, җигшүртә.

Талдан бурхдт шүтсн күн цааҗлгдх

² Деед Эзнә, тана Бурхна, өгсн нег балһснднь залу күн эс гиҗ күүкд күн Деед Эзнд, тана Бурхнд, дурго юм һарһхла, Терүнлә кесн бооцаһан эвдхлә,

³ Мини зөв эс өгсн талдан бурхдт мөргх, эс гиҗ нарнд, эс гиҗ сард, эс гиҗ теңгрин ямаран чигн оддт,

⁴ тиигхлә терүнә тускар соңсхларн болн медхләрн сәәнәр мөшклһ ке. Кемр цугтан үнн болхла, Израильд тиим җигшүртә юмн кегдсн болхла,

⁵ тиигхлә тер күүг – залу күн эс гиҗ күүкд болну, балһсна үүдн тал һарһад, чолуһар шивәд алх кергтә!

⁶ Кемр хойр-һурвн герч бәәхлә цааҗлҗ болҗана, негхн герч болхла цааҗлҗ болшго.

⁷ Цааҗлсн цагт герч улс түрүләд цокх зөвтә, наадкснь терүнә дарунь. Хорта йовдлыг бәәрнәсн уңгарнь уга кетн!

Әрүн бәәрнд кегдх зарһ

⁸ Кемр эврәннь балһснд болҗах йовдл хаһлхд күнд болхла, тиигхлә Деед Эзнә, чини Бурхна, йилһҗ авх орм тал йов. Алсна туск кергиг, гемшәҗәх туск кергиг, сөрв һарһсна туск кергиг тенд кех кергтә.

⁹ Левин отгин гелңгүд тал болн тер цагт бәәх зарһч тал одад сур. Тедн чамд эврәннь шиидврән келх.

¹⁰ Деед Эзнә йилһҗ авсн ормд чамд келсн шиидвриг чи батар бәрәд болн цугтаһинь келсәрнь күцәх зөвтәч.

¹¹ Чамд дасхх Закаһар цугтаһинь ке, чамд келх шиидвриг күцә. Терүнәс зүн үзг тал чигн, барун үзг тал чигн бичә хаҗи!

¹² Кемр Деед Эзнд, чини Бурхнд, шүтҗәх гелңгиг эс гиҗ зарһчиг соңслго бәәхәр седхлә, терүг алх йоста. Израильд хорта йовдл уга кетн!

¹³ Әмтн цугтан медәд әәтхә, хөөннь нег чигн күн тиим догшн йовдл бичә һарһтха.

Хаана тускар

¹⁴ Деед Эзнә, тадна Бурхна, таднд өгчәх һазрт ирәд терүг эзлхләрн, тенд бүүрләд бәәхләрн болн эргндк улсла әдл бийдән хааг шиидхәр седхләрн,

¹⁵ тиигхлә Деед Эзнә, тадна Бурхна, йилһҗ авсн хааг тәвхит. Тернь тадна әмтнәс негнь болх. Йосиг тадна биш – талын күүнд бәрүлҗ болшго.

¹⁶ Хан дегд олн мөр бәршго болҗана. Олн мөр авхин төлә, хәрү Египет тал әмт йовулшго болҗана. Деед Эзн таднд келвш: «Тадн дәкҗ тер хаалһар хәрү йовшгот!»

¹⁷ Хаана зүркнь хооран һардгоһар, тер олн гергчүдтә болшго болҗана. Тер дегд дала цаһан мөңгтә болн алтта болшго болҗана.

¹⁸ Хаана ширәд тер суухлаг, Левин отга гелңгүдт бәәх эн Закаг бийдән һар бичгтән бичәд автха.

¹⁹ Наснаннь туршарт терүг бийдән бәрәд тер хан умшҗатха. Тегәд тер Деед Эзиг, эврәннь Бурхиг, икәр күндлдг дасх. Эн Закаг болн зокалмудыг батар бәрдг дасх.

²⁰ Тегәд эврә улстан деерлкшго, эн зааврмудас зүн үзг тал чигн, барун үзг тал чигн хаҗишго. Тегәд тер бийнь, терүнә хөөт үйнр удандан Израилиг залх.