Давтх Закан 16 - Хальмг келнд орчулсн Әрүн Бичлһс

Песах нәәрин тускар

¹ Авив гидг сарин тускар бичә марттн. Деед Эзнд, тана Бурхнд, Песах нәр нерәд, яһад гихлә мел авив сард тадниг Деед Эзн, тана Бурхн, Египетәс көтлҗ һарһла.

² Песах нәәрт нерәдәд Деед Эзнд, тана Бурхнд, тәкл тәкх үүрмг болн бод малыг, Эврәннь нернә төлә бәәрән кех Деед Эзнә йилһҗ авсн ормд алтн.

³ Песахин бәрцтә хамднь искәһәд болһсн һуйр бичә идтн. Долан хонгтан терүнлә тадн эс искәсн һуйр идхит. Эннь зовлңта бәәснә хөөн Египетәс маһд уга һарсна тодлвр. Тиигҗ тадн насн туршарт Египетәс һарсн өдрән санхит.

⁴ Долан хонгтан тадна һазрт альд чигн искәлһнә экн уга болх йоста. Асхар алсн малын махиг өрүн күртл бичә үлдәтн.

⁵ Деед Эзнә, тана Бурхна, өгсн нег чигн балһснд Песах нәәрин тәклин малыг бичә алтн.

⁶ Зуг Деед Эзнә, тана Бурхна, Бийиннь нернә төлә йилһҗ авад бәәрән кех ормд Песахин нәәрин малыг алтн. Терүг асхар нарн суух кемлә алтн – Египетәс мел тадна һарчасн цагла кетн.

⁷ Деед Эзнә, тана Бурхна, йилһҗ авсн һазрт махиг болһад идтн, өрүнднь герүрн хәртн.

⁸ Зурһан хонгтан эс исксн һуйр идтн, доладгч өдр Деед Эзнд, тана Бурхнд, цуглрад мөргх өдр. Эн өдр көдлҗ болшго.

Долан хонгин нәәрин тускар

⁹ Урһц хуралһна эклцәснь дола дәкҗ долан хонг тоолад,

¹⁰ Деед Эзнә, тана Бурхна, төлә Долан хонгин нәр кетн. Эврәннь седкләр тана Деед Эзнә, тана Бурхна, әдслсәрнь һару һарһад нәәрлтн.

¹¹ Тегәд Деед Эзнә, тана Бурхна, өмн Терүнә йилһҗ авсн болн Эврәннь нернд кех ормд нәәрлтн. Таднла хамдан тегәд тадна көвүд болн күүкд, мухла залус болн мухла күүкд улс, тадна балһснд бәәх левитмүд, бас тадн дунд бәәх нүүҗ ирсн әмтн, өнчн улс болн белвсн гергчүд нәәрлтхә.

¹² Египетд эврән мухлас болҗ бәәсән сантн. Эн зокалмудыг батар бәрәд күцәтн.

Җолмин нәәрин тускар

¹³ Буудяһан хураһад цокдг ормд болн чаһран шахҗ һарһдг ормд – көдлмшән чиләхләрн, Җолмин нәр долан хонгтан кетн.

¹⁴ Эн нәәрт байрлтн, таднла хамдан тадна көвүд болн күүкд, мухла залу улс болн мухла күүкд улс, бас левитмүд, тадна балһснд бәәх нүүҗ ирсн әмтн, өнчн болн белвсн гергчүд җирһтхә.

¹⁵ Долан хонгтан Деед Эзнә, тана Бурхна, төлә Деед Эзнә йилһҗ авсн ормд нәәрлтн. Яһад гихлә Деед Эзн, тана Бурхн, байн урһцар болн кеҗәх кергинтн күцәмҗәр тадниг әдслв. Седкләрн икәр байрлтн!

¹⁶ Җилд һурв дәкҗ залу улс Деед Эзнә, тана Бурхна, өмн Терүнә йилһҗ авсн ормд ирх йоста. Эс искәсн һуйрин нәәрт, Долан хонгин нәәрт болн Җолмин нәәрт тиигх йоста. Деед Эзнә өмн кен чигн хоосн һарта бичә одтха!

¹⁷ Күн болһн эврәннь арһар Деед Эзнә, тана Бурхна, әдслснә кемҗәһәр белгән авч иртхә.

Зарһчнрин тускар

¹⁸ Деед Эзнә, тана Бурхна, таднд өгсн балһсдар цугтаднь, тадна отгудар зарһчнриг болн ахлачнриг шиидтн. Тедн чикәр зарһан кетхә.

¹⁹ Нег чигн күүнә закана зөвиг бичә эвдтн, зарһинь үннәр кетн. Авлһ бичә автн. Яһад гихлә авлһ цецн күүг сохр кенә, үннч күүг худлч кенә.

²⁰ Үннч болтн, зуг үннч. Тегәд тадн әмд йовхит, тегәд Деед Эзнә, тана Бурхна, таднд өгчәх һазриг эдлхит.

Буру номта улсин авъясмудас сагллһн

²¹ Деед Эзнә, тана Бурхна, бәрх тәклин ормин хаҗуд Ашеран мод бичә тәртн. Ямаран чигн мод бичә тәртн.

²² Терүнд әрүн чолу чигн бичә тәвтн. Деед Эзн, тана Бурхн, тиим юмнд дурго.