Давтх Закан 15 - Хальмг келнд орчулсн Әрүн Бичлһс

Өрнәс болн мухла бәәдләс сулдхлһна диг-даран

¹ Долан җил болад күүнә өринь тәвҗ өгтн.

² Өөрхн күүндән өгйәһәр өгсн юман хәрү сурлго өринь тәвҗ өгтн. Израилин өөрхн күүнәсн, эврәннь ах-дүүһәсн, Деед Эзнә өмн өриг тәвҗ өгчәх цагт өр некдмн биш.

³ Талын күүнәс өринь некҗ чадҗанат, болв эврәннь әмтнә өриг тәвҗ өгтн.

⁴ Зуг тадн дунд угатя әмтн бәәшго болҗана. Яһад гихлә, эзлтхә гиһәд Деед Эзнә, тана Бурхна, өгчәх һазрт тадниг Тер элвгәр әдслх.

⁵ Кемр тадн Деед Эзиг, тана Бурхиг, соңсхла болн батар бәрәд, мини эндр келҗәх Терүнә зааврмудыг цугтаһинь күцәхлә, тиим болх.

⁶ Деед Эзн, тана Бурхн, тадниг әдслхәр андһар урднь өгсәр, тадн олн келн-улст өгйәһәр өгхит, эврән болхла өгйәһәр юм авшгот. Тегәд олн келн-улсиг һардхит. Тедн тадниг закршго болҗана.

⁷ Деед Эзнә, тадна Бурхна, таднд өгчәх һазрт, ямаран чигн балһсдт кемр тадн дунд тадна отга улсас тер бийнь угатя әмтн бәәхлә, – тиигхлә бичә аврлт уга зүрктә бол, теднәс бичә хармн.

⁸ Чини һар өгәнч болг. Терүнд кергтәһинь хәәҗәсәрнь хармнлго өгйәһәр өг.

⁹ Чини зүркнд му санан орхас сагл. Доладгч җил – өриг тәвҗ өгдг җил – өөрдҗ йовхиг ухалад, эврәннь угатя ахнр-дүүнрән дургоһар хәләһәд сурсинь өглго бәәввзәч. Тиигхлә тер Деед Эзиг дуудад мөргх, тегәд чамд килнц буух!

¹⁰ Өгйәһәр өг, зуг тиигхләрн бичә уурл. Чамаг Деед Эзн, чини Бурхн, һарарн кеҗәх цуг кергичн әдслх.

¹¹ Эн һазрт кезә чигн угатя әмтн бәәх, тегәд би чамд герәслҗәнәв: чини һазрт бәәдг эврә угатя ахнр-дүүнртән өгйәһәр өгчә, чини һар өгәнч болг.

¹² Кемр чини нег отга улсас – еврей залу күн эс гиҗ еврей күүкд күн – чини мухла болад зурһан җил көдлхлә, тиигхлә доладгч җилднь терүг чи сулдхх йостач.

¹³ Терүг чи хоосн һарта бичә йовул.

¹⁴ Терүнд эврәннь малас, эврәннь тәрә цокҗ белддг һазрас болн белдсн чаһрас өг. Деед Эзн, чини Бурхн, чамаг әдслсн юмнас өг.

¹⁵ Египетд эврән мухла болҗ бәәсән бичә март. Деед Эзн, чини Бурхн, болхла чамаг даҗрлһнас сулдхла. Тегәд би чамд эндр тиим заквр өгчәнәв.

¹⁶ Кемр мухла чамаг болн чини өрк-бүлиг таасад, дурлад, һархшув гихлә,

¹⁷ тиигхлә шөвгәр чикинь үүднд хатх. Тер тегәд оньдинд чини мухла болх. Мухла күүкд күүнд бас тиигҗ ке.

¹⁸ Мухла күүг сулдххларн чи бичә һундрх. Яһад гихлә зурһан җилдән тер, нәәмәдлҗ авсн күүнәс, хойр дам үлү олз чамд орулв. Тегәд Деед Эзн, чини Бурхн, кеҗәх чини цуг кергиг әдслх.

Малын түрүн төлин тускар

¹⁹ Бод болн үүрмг малын түрүн эр төлиг Деед Эзнд, тана Бурхнд, нерәдтн. Үкрин түрүн төләр бичә көдлмш келгтн, хөөнә түрүн хурһиг бичә хәәчлтн.

²⁰ Деед Эзнә йилһҗ авсн ормд, җил болһн Деед Эзнә, тадна Бурхна, өмн өрк-бүлтәһән хамдан тедниг идтн.

²¹ Кемр мал эрмдгтә болхла – доһлң, сохр эс гиҗ талдан эрмдгтә болхла – терүгәр Деед Эзнд, тадна Бурхнд, бәрц бичә бәртн.

²² Терүг эврәннь балһснд идтн. Терүг цеврәр бәрҗәх, эс бәрҗәх әмтн гөрәснә эс гиҗ буһ-марлын махн мет идҗ чадҗана.

²³ Зуг цусинь хотд бичә орултн. Терүг уснла әдл һазрт асхтн!