Давтх Закан 14 - Хальмг келнд орчулсн Әрүн Бичлһс

Олн бурхнд шүтдг әмтнә оршалһна авъясмудыг хөрлһн

¹ Тадн – Деед Эзнә, тадна Бурхна, көвүд болҗанат. Үксн күүндән һундл төрҗ уульхларн, бичә бийдән керчсн сөрв һарһтн, маңна деерк үсән бичә хустн.

² Яһад гихлә тадн Деед Эзнә, тадна Бурхна, әрүн улс болҗанат. Һазр деерк улсас цугтаһаснь тадниг Деед Эзн шүүҗ авхларн, тадниг Терүнә бийиннь улс болтха гиҗ тиигв.

Цевр болн цевр биш малмудын тускар

³ Ямаран чигн җигшүртә юм бичә идтн.

⁴ Тадна идҗ болх малмуд эн: үкр, хөн, яман,

⁵ буһ-марл, гөрәсн, зерлг тек, зерлг бух, антилопа, уулын хуц.

⁶ Хойр турута кевлһән кевдг малмудыг цугтаһинь идҗ чадҗанат.

⁷ Болв тедн дундас темәг, туулаг болн дамаг бичә идтн (тедн кевлһән кевдг болв чигн, турунь салу биш, таднд тедн цевр биш).

⁸ Һаха бас бичә идтн (теднә туру салу болв чигн кевлһ кевхш, таднд тер цевр биш). Теднә мах бичә идтн, күшинь бичә көндәтн.

⁹ Усна әмтә тоотыг, сервәтә болн хачрста юмсиг идтн.

¹⁰ Зуг сервә болн хачрсн уга юмсиг бичә идтн – тедн таднд цевр биш.

¹¹ Ямаран чигн цевр шовуд идх зөвтәт.

¹² Идшго шовуд эн: һәрд, ик махсг шовун, скопа,

¹³ канюк, элә, зүсн-зүүл гекс шовуд,

¹⁴ зүсн-зүүл керәс,

¹⁵ темән шовун, сипуха, цах, зүсн-зүүл начн шовуд,

¹⁶ неясыть, шар шовун, һурвлһин тохмта шар шовун,

¹⁷ көдә һазрин һурвлһ, харцх, хар һалун,

¹⁸ ханчилду шовун, зүсн-зүүл көк хутн, цоклур шовун болн бавуха.

¹⁹ Нисдг хорха-хотн цугтан таднд цевр биш. Тедниг идҗ болшго.

²⁰ Болв нисдг цевр ямаран чигн юмсиг идх зөвтәт.

²¹ Зовлһ бичә идтн. Тиим махиг тадна балһсдар бәәх нүүҗ ирсн әмтнд өгтн, тедн идтхә. Эс гиҗ талын улст хулдтн. Тадн Деед Эзнә, тадна Бурхна, әрүн улс болҗанат. Ямана хурһиг экиннь үснд бичә чантн.

Арвна хүвин тускар

²² Эврәннь тәрәнә урһцин цугтаһаснь арвна әңгинь салһтн. Тадна тәрәнд урһсн цуг тоотаснь салһтн. Җил болһн тиигҗ кетн.

²³ Буудяһас, чаһрас болн олив тоснас арвдгч әңгинь, бас бод малын болн үүрмг малын түрүн төлин махиг тадн Деед Эзнә, тадна Бурхна, өмн Терүнә йилһҗ авх ормд идтн. Терүгәр Бийиннь нернд бәәр кеҗ авх. Тиигҗ тадн кезә чигн Деед Эзиг, тадна Бурхиг, икәр күндлдг дасхит.

²⁴ Болв тиигәрән йовхд дегд удан болх, энүг цугтаһинь күргх чидл таднд күрлго чигн бәәх. Яһад гихлә, Деед Эзнә, тадна Бурхна, нерн туурдгар йилһҗ авсн орм таднас хол болад чигн бәәх. Тадниг Деед Эзн, тадна Бурхн әдслснә хөөн

²⁵ энүг цугтаһинь цаһан мөңгнәс сольтн. Тегәд һартан цаһан мөңгтә Деед Эзнә, тадна Бурхна, йилһҗ авх орм тал йовтн.

²⁶ Тенд эн цаһан мөңгәр дурта юман сольҗ автн – бод болн үүрмг мал, чаһр болн искәсн әрк, авхар седсән авхит. Тенд Деед Эзнә, тадна Бурхна, өмн эврәннь өрк-бүләрн хамдан нәәрлтн!

²⁷ Тиигхләрн тадна балһснд бәәдг левитмүдин тускар бичә марттн. Теднд таднла әдл эврә гисн һазрин әңг болн хүв угалм.

Һурвдгч җилин арвна хүвин тускар

²⁸ Һурвдгч җилин чилгчәр эврәннь тәрәнә урһцас эн җилә хүв – арвдгч әңгинь – балһсна ик үүдн тал авч одтн.

²⁹ Левитмүд (теднд таднла әдл эврә гисн һазрин әңг болн хүв угалм) болн нүүҗ ирсн әмтн, тадна балһснд бәәдг өнчн-өвүнь чигн, белвсн әмтн чигн ирәд цадтлан идцхәг! Тегәд тадниг Деед Эзн, тадна Бурхн, кеҗәх кергитн әдслх.