Давтх Закан 13 - Хальмг келнд орчулсн Әрүн Бичлһс

Шүтәнд мөрглһиг түкрсн күн алгдх

¹ Кемр тадн дунд әәлдәч эс гиҗ зүүд тәәлдг күн бәәһәд, таднд онц темдг эс гиҗ өвәрц юм үзүлх болҗ келхлә,

² терүнә келснь күцхлә, тер кемдән тадниг талдан меддго бурхд дахад шүттхә гихлә, –

³ тер әәлдәчиг эс гиҗ зүүд тәәлдг күүг бичә соңстн! Эннь Деед Эзн, тана Бурхн, зүркәрн болн седкләрн тадн Терүнд дурта угаһинь медхәр тадниг сөрҗәнә.

⁴ Деед Эзнә, тана Бурхна, ардас дахтн. Терүг икәр күндлтн, Терүнә заавриг күцәтн, Терүг соңстн, Терүнд шүттн, Терүнд кезә чигн итктн!

⁵ Тер әәлдәч эс гиҗ зүүд тәәлдг күн болхла, алгдх йоста. Яһад гихлә тер Египетәс тадниг көтлҗ һарһсн болн мухлан һазрас сулдхсн Деед Эзнә, тана Бурхна, тускар худл келҗәв. Деед Эзнә, тана Бурхна, заасн хаалһас тер күн тадниг хаҗилһхәр седв. Тиим хорта йовдлыг бәәрнәсн уңгарнь уга кетн!

⁶ Чини һарлцсн ах-дү, эс гиҗ көвүнчнь, эс гиҗ күүкнчнь, эс гиҗ чини дурта гергн, эс гиҗ әмн мет хәәртә иньгчнь нуувчар чамаг талдан бурхдт йовад шүттхә гиҗ ээрәд сурад чигн бәәх. Тиим бурхдиг чи чигн, чини эцк-өвкнр меддго билә.

⁷ Эн бурхд чини эргнд бәәдг, хоша бәәдг эс гиҗ холын һазрт нег захаснь талдан зах күртлнь бәәдг цуг әмтнә бурхд.

⁸ Тер күүнд бичә зөвән өг, бичә соңс! Терүг бичә хармн, бичә терүнд зов, бичә терүг харс.

⁹ Ал терүг! Терүг цааҗлхла, чи түрүләд цокх зөвтәч, наадкснь чини дару.

¹⁰ Тер күүг чолуһар шивәд алтн. Яһад гихлә тер тадниг Египетәс, мухлан һазрас, көтлҗ һарһсн Деед Эзиг, тана Бурхиг, үлдәтхә гиҗ ээрҗ сурҗав!

¹¹ Израиль кевтән медәд әәцхәх, хөөннь кен чигн күн тадн дундас тиим йовдл һарһшго!

^12-13 Таднд Деед Эзнә, тана Бурхна, бәәтхә гиһәд өгсн балһсдын негнднь, тадниг му саната әмтн талдан тадна меддго бурхдт шүттхә гиһәд ээрәд сурад бәәсиг соңсхларн,

¹⁴ терүг шинҗләд медҗ ав, сәәнәр сурҗ ав. Кемр тернь үнн болад, тадн дунд йосндан тиим җигшүртә йовдл һарсн болхла,

¹⁵ тиигхлә тер балһсна әмтиг цугтаһинь үлдәр алтн! Балһсиг цугтаһинь болн балһснд бәәдг юмсиг малтаһинь хамднь буйсатн – үлдәр цокад алтн!

¹⁶ Олвриг цугтаһинь талвң деер цуглулад, балһсиг олвртаһинь хамднь шататн. Эннь Деед Эзнд, тана Бурхнд, шаталһна бүкл бәрц болх. Эн балһсн мөңкинд күн уга довун болад, дәкҗ мел тосхгдшго.

¹⁷ Буйсагдсн юмнас нег чигн юмн тадна һарт бичә үлдтхә! Тегәд Деед Эзн эврәннь цухлан үлдәх, таднд хәәрлтән күргх, тадниг хармнх, тадна эцк-өвкнрт андһар өгсәрн таднас олн тоота улс кех.

¹⁸ Кемр тадн Деед Эзиг, тана Бурхиг, соңсхла, Терүнә зааврмудыг күцәхлә тиим болх. Эндр таднд би терүнә тускар келҗәнәв. Эннь Деед Эзнд, тана Бурхнд, тааста керг күцәх болҗанат.