Давтх Закан 12 - Хальмг келнд орчулсн Әрүн Бичлһс

¹ Деед Эзн, тана өвкнрин Бурхн, таднд өгчәх һазрт бәәхләрн батар бәрәд болн күцәх зокалмуд болн закад эн. Тер һазрт бәәсн деерән оньдинд тедниг күцәтн.

Тәкл тәклһнә орм болн диг-даран

² Өндр уулмуд деер, довуд деер, сагсхр модн болһн дор тадна булаҗ авсн һазрин әмтн эврәннь бурхдт шүтҗәсн әрүн бәәриг хамхлтн.

³ Теднә тәклин ормиг хамхлтн, әрүн чолудынь хамхлтн, Ашеран моддыг шататн, бурхна кегдлмүд уга кетн! Тер ормсар теднә туск ямаран чигн тодлвриг биллтн.

⁴ Деед Эзнә, тана Бурхна, төлә тиим юмс бичә кетн!

⁵ Тадн Деед Эзнә, тана Бурхна, өмн үзгдхин төлә тер ормд иртн, зуг Терүнә шүүҗ авсн тадна нег отгин һазрт одтн. Терүгәр Деед Эзн Эврәннь нернә төлә бәәр кех.

⁶ Шатах бәрцд орулх болн бәрц бәрх юмсан, эврәннь урһцин арвна әңгинь болн тәвцән, андһар өглһнә бәрцс болн эврә дурар өгчәх бәрцс, бод болн бог малмудын түрүңк төлинь тиигәрән авч иртн.

⁷ Тенд Деед Эзнә, тана Бурхна, өмн нәәрән кетн. Эврәннь күч-көлснә күцәмҗднь байрлтн, өрк-бүләрн нәәрән кетн. Яһад гихлә Деед Эзн, тана Бурхн, тадниг әдсллә.

⁸ Ода энд, күн болһн эврәннь сансарн, мадна кеҗәснлә әдләр, тадн тенд кех зөв угат.

⁹ Ода тадн Деед Эзнә, тана Бурхна, санамр бәәршлтхә гиһәд өгчәх тер һазрт болн авх әңдән күрәд угат.

¹⁰ Болв тадн Йордан һолыг һатлад Деед Эзнә, тана Бурхна, эзлтхә гиһәд өгчәх һазрт бүүрлхит. Тер таднд эвтә җирһл өгх, тадниг бүслҗәх дәәснәс харсх. Тадн әәмшг уга бәәхит.

¹¹ Деед Эзн Бийиннь төлә нег орм йилһҗ авх. Тегәд мини заасар, тадн шатах бәрцд орулх болн бәрц бәрх юмсан, эврәннь урһцин арвна әңгинь болн тәвцән чигн, Деед Эзнд өгсн андһарин сән бәрцсән чигн авч иртн.

¹² Тенд Деед Эзнә, тана Бурхна, өмн нәәрән кетн. Таднла хамдан тадна көвүд болн күүкд, мухла залус болн мухла күүкд улс, бас тадна балһснд бәәдг левитмүд нәәрлтхә. Таднар болхлаг, теднд эврә әңг һазр болн хүв һазр угалм.

¹³ Һазр болһнд бичә шаталһна авъяс күцәтн.

¹⁴ Зуг Деед Эзнә йилһҗ авсн тадна нег отгин һазрт шаталһна бәрцсән күцәтн, дәкәд мини заасиг цугтаһинь кетн.

¹⁵ Болв тадн эврәннь балһснд дурта цагтан малан алад, махинь идҗ чадхит. Терүг тадн малын тооһас иштә Деед Эзнә, тана Бурхна, евәләр кехит. Терүг цевр диг-дара бәрҗәхнь, эс бәрҗәх әмтн гөрәснә эс гиҗ буһ-марлын мах идҗәх мет, эн махиг идҗ чадҗана.

¹⁶ Зуг цусинь бичә хотд орултн, һазр деер уснла әдләр асхтн!

¹⁷ Эврәннь балһснд буудяһасн, чаһрасн болн олив тоснас арвдгч әңгинь идшго болҗанат. Тедү мет бод болн үүрмг малын түрүн төлин мах, андһар өгсн бәрцәс, эврә дурарн авч ирсн бәрцәс болн тәвцәс идшго юмн.

¹⁸ Тедниг мел Деед Эзнә, тана Бурхна, өмн йилһҗ авсн ормд идтн. Тегәд таднла хамдан терүг тадна көвүд болн күүкд, мухла залус болн мухла күүкд улс, дәкәд тадна балһснд бәәдг левитмүд идтхә. Деед Эзнә, тана Бурхна өмн, байрлтн, эврәннь күч-көлснә ашт байрлтн!

¹⁹ Тегәд хәләлт, эврә һазр деер җирһәд бәәхләрн, левитмүдиг бичә марттн.

²⁰ Деед Эзн, тана Бурхн, урднь келсәрн, тадна эзлх һазриг икдүлхлә, тадн идхәр седәд мах хәәхлә, тиигхлә кезә чигн дурндан идҗ чадҗанат.

²¹ Кемр Деед Эзнә, тана Бурхна, нернәннь төлә йилһҗ авсн орм таднас хол болхла, таднд мини заксар Деед Эзнә өгсн бод эс гиҗ үүрмг малыг эврәннь балһсндан алтн. Тегәд дурта цагтан доран идтн.

²² Тер махиг, гөрәснә эс гиҗ буһ-марлын махн мет, цевр диг-дара бәрҗәхнь, эс бәрҗәхнь идҗ чадҗана.

²³ Зуг цусинь хотд орулҗ бичә идтн, юңгад гихлә цусар әмд бәәдмн. Җирһлин әмиг махнла хамднь бичә идтн!

²⁴ Цусиг хотд орулҗ бичә идтн, уснла әдләр һазр деер асхтн.

²⁵ Терүг бичә идтн, тегәд таднд болн тадна хөөт үйнрт сән болх. Яһад гихлә чини кеҗәх юмс Деед Эзнд таасгдх.

²⁶ Зуг әрүн бәрцсиг болн андһар өгәд белдсн тәвциг Деед Эзнә йилһҗ авсн ормд авч ирхмн болҗанат.

²⁷ Шаталһна бәрциг болн махинь, болн цусинь Деед Эзнә, тана Бурхна, тәклин ормд шататн. Эвцлһнә бәрцин цусиг Деед Эзнә, тана Бурхна, тәклин ормд асхх кергтә. Терүнә махинь тадн идҗ чадҗанат.

²⁸ Мини таднд заксн цуг бооцасиг батар бәрәд күцәтн. Тегәд таднд болн тадна хөөт үйнрт кезә чигн сән болх. Яһад гихлә тадна кеҗәх керг Деед Эзнд, тана Бурхнд, сән болн чик болх.

Шүтәнд мөрглһиг хөрлһн

²⁹ Деед Эзн, тана Бурхн, тадна күрхәр йовх һазриг эзлхин төлә теднә улсиг алх. Тадн тер һазриг эзләд тенд бәәрлхит.

³⁰ Тегәд тедниг алсна хөөн, тадн меклгдәд бичә бәргдтн, саглтн. Теднә бурхдын тускар бичә суртн. «Эн улс яһҗ эврәннь бурхдт шүтҗәлә? Бидн бас тиигҗ кенәвидн», – гиҗ бичә келтн.

³¹ Тиим юм Деед Эзнә, тана Бурхна, төлә бичә кетн! Тедн Деед Эзнд җигшүртә болн дурго юм бурхнаннь төлә һарһҗав. Эврәннь бурхдын төлә тедн нам һарһсн көвүдән болн күүкдән шатадг бәәҗ!

³² Мини таднд заксиг батар бәрәд күцәтн. Энүн деер нег чигн юм бичә немтн, бичә хастн.