Давтх Закан 11 - Хальмг келнд орчулсн Әрүн Бичлһс

¹ Деед Эзнд, тана Бурхнд, дуран өгтн, кезә чигн Терүнә тәвҗәх неквриг, зокалыг, закаг болн заквриг күцәтн.

Деед Эзнә алдр кергин тускар тодлх кергтә

² Тодлад автн! Эннь цугтан тадна үрдлә болсн йовдл биш. Тедн Деед Эзнә, тана Бурхна, өгсн сурһмҗиг үзсн уга, Терүнә алдр кергүдиг чигн, Терүнә күчтә һариг, Терүнә делгү күчиг чигн,

³ онц темдгүдиг болн йовдлмудыг чигн, Египетд Терүнә күцәсиг чигн үзсн уга. Египетин хаанла ю кев, терүнә цуг орн-нутгла яһв!

⁴ Египетин дәәчнриг, мөрдинь болн мөр зүүдг тергдинь яһв! Египетин әмтн тадна ардас көөлдхлә, Тер Улан теңгсин ус орулад, тедниг алв. Эндр күртл эннь тиим.

⁵ Тадниг нааран йовҗ йовтл көдә һазрт Тер ю кев!

⁶ Рубена хөөт үйнрт, Элиавин көвүдт – Датан болн Авирам хойрт – Тер ю кев! Израилин улсин бәәрнә дунд һазр шуурад, тедниг өрк-бүлтәһинь, бәәсн шатрмудтаһинь болн малтаһинь зальгв.

⁷ Тадн Деед Эзнә кесн алдр йовдлмудыг цугтаһинь үзвит!

⁸ Тегәд ода таднд мини келҗәх зааврмудыг цугтаһинь күцәтн. Тегәд тадн чидлтә болхит, күрхәр йовх һазртан күрәд, терүг эзлхит.

⁹ Тегәд тадна өвкнрт болн таднд, теднә хөөт үйнрт Деед Эзнә өгнәв гисн һазрт удан бәәхит. Тер һазр үсәр болн балар байн.

¹⁰ Тадна күрхәр йовх болн эзлхәр бәәх һазр, салад һарсн Египетлә әдл биш. Тер һазрт тадн тәрәнә эк хаяд, терүг һарудын күнд көдлмш мет кеһәд усллат.

¹¹ Тадна күрәд эзлхәр йовх һазр мел уулмуд болн тиньгр һазрмуд, теңгрәс хурар услгдна.

¹² Эн һазриг Деед Эзн, тана Бурхн, килмҗән өгәд хәләҗәнә. Терүг даңгин җилин эргцд Тер хәләҗәнә.

Әдсллһн болн харалһн

¹³ «Кемр тадн Мини эндр өгчәх зааврмуд соңсхла, Нанд – Деед Эзнд, тана Бурхнд, дурта болхла, Нанд зүркәрн болн седкләрн шүтхлә,

¹⁴ тиигхлә Би тадна һазрт цагтнь хур орулад бәәхүв. Намрин хур болн хаврин хур орулхув. Таднд буудя, чаһр болн олив модна тосн кезә чигн бәәх.

¹⁵ Тадна мал идшлдг һазрт ноһан урһдгар кенәв. Тегәд тадн өлн бәәшгот».

¹⁶ Хаалһасн хаҗиһәд талдан бурхнд авлгдад шүтхәсн саглтн.

¹⁷ Эс гихлә Деед Эзн таднд уурлад теңгриг хаах. Тиигхлә хур оршго, һазр урһц өгшго, Деед Эзнә өгчәх йир сәәхн һазр деерәс тадн шулун уга болхит.

¹⁸ Мини келҗәх эн үгмүд кезә чигн тадна сананд болн уханд бәәтхә. Тедниг темдг гиһәд һартан боотн, маңнадтн боодһа болад бәәтхә.

¹⁹ Тедниг үрдтән дасхтн. Гертән бәәхләрн, хаалһдан йовхларн, унтхларн эс гиҗ босхларн кезә чигн терүг давтад бәәтн.

²⁰ Гериннь үүднә мөрд болн балһсна ик үүднд терүг бичтн.

²¹ Тегәд тадна җирһл болн тадна үрдин җирһл, Деед Эзн тадна өвкнрт өгх болад андһар өгсн һазр деер, ут болх. Теңгр һазр деер бәәтл тиим болх.

²² Кемр тадн мини келҗәх заавриг цугтаһинь күцәхлә, Деед Эзнд, тана Бурхнд, дурта болхла, кезә чигн Терүнә хаалһар йовхла, Терүнд иткхлә,

²³ тиигхлә Деед Эзн цуг эн келн-улсин һазриг таднд өгх. Тадн бийәсн олн болн чидлтә улсин һазриг эзлхит.

²⁴ Тадна көл ишксн ямаран чигн һазр тадна болх. Көдә һазрас Ливан күртл, Епрат һолас Барун үзгин теңгс күртл цугтан тадна зөөр болх.

²⁵ Кен чигн таднла зөрлцҗ чадшго. Тадна орх ямаран чигн һазрар Деед Эзн таднас әәх болн сүрдх бәәдл учрах. Тиим болхиг Тер таднд андһар өглә.

²⁶ Тегәд эндр би таднд әдсллһ эс гиҗ харал гиҗ йилһҗ автн гиҗәнәв.

²⁷ Кемр тадн мини эндр келҗәх – Деед Эзнә, тана Бурхна, заквр соңсхла, тадн әдсллһ авхит.

²⁸ Кемр тадн Деед Эзнә, тана Бурхна, заавр эс соңсхлаг, эндр мини орулсн хаалһас хаҗиһәд талдан меддго бурхд дахад йовхла – харалд күрхит.

²⁹ Тадна эзлхәр йовх һазрт тадниг Деед Эзн, тана Бурхн, авч ирхлә, Гаризим уул деер йөрәл тәвтн, Гевал уул деер харал тәвтн.

³⁰ (Эн уулмуд Йордана ца бәәнә. Тенд Аравад бәәсн кананахна һазрт, хаалһ барун үзг тал һарна. Тернь Морэн хар моддас хол биш, Гилгалын хаҗуд бәәнә.)

³¹ Ода тадн Деед Эзнә, тана Бурхна, өгчәх һазриг эзлхин төлә Йорданиг һатлҗанат. Терүг эзләд, тенд бүүрләд бәәхит.

³² Мини ода зааҗах зокалмудыг болн закадыг цугтаһинь батар бәрәд күцәтн!