Давтх Закан 10 - Хальмг келнд орчулсн Әрүн Бичлһс

Хорив уулын хаҗуд болсн йовдлын тускар цааранднь келлһн

¹ Тер цагт Деед Эзн нанд келв: «Чолунас кевләд, урдкла әдл, хойр хавтха чолуна өөһинь авад ке. Тегәд Нан тал уул деер һарч ир. Дәкәд бас модн хәәрцг ке.

² Тер хавтха чолуд деер Би чини урднь хамхлсн хавтха чолуд деер бичәтә үгмүд бичнәв. Тедниг чи хәәрцг дотр тәвхич».

³ Акация моднас би хәәрцг кевүв, урдкла әдл хойр хавтха чолу өөһинь авад кевүв. Тегәд хавтха чолудан һартан авад уул деер һарув.

⁴ Деед Эзн тедн деер түрүн саамд бичсән шинәс бичв: Арвн Заавр, эдниг таднд уул деер шатчах һалас хамцана цуг улсин цуглрсн өдр соңсхла. Нанд Тер хавтха чолуд өгв.

⁵ Би эргәд, уул деерәс бууһад, эврәннь кесн хәәрцгт тәвүв. Деед Эзнә заасар хәәрцгт тедн бәәнә.

⁶ Израилин улс Беэрот-Бене-Яакан гидг һазриг үлдәһәд, Мосера тал ирцхәв. Тенд Ахарон өңгрв, тенд терүг оршав. Терүнә ормд Элеазар көвүнь гелң болв.

⁷ Тендәс тедн Гудгода тал ирцхәв, Гудгодас олн һооҗур гүүҗәх Йотвата тал ирцхәв.

⁸ Тер цагт Деед Эзн Левин отг йилһҗ һарһв. Эн отгт Деед Эзнә Бооцана хәәрцг авч йовх даалһвр, Деед Эзнә өмн бәәх, Терүнд церглх, Терүнә нерәр әдслх даалһвр өггдв. Эннь ода күртл тиигҗ кегднә.

⁹ Левин улс тегәд чигн ахнрлаһан әдл һазрин әңгән болн хүвән авсн уга. Теднә хүвнь – Деед Эзн Эврән, теднд үгән өгсн Деед Эзн, тадна Бурхн.

¹⁰ …Түрүн саамд бәәснлә әдләр уул деер би 40 өдр, 40 сө бәәвүв. Эн саамд бас намаг соңсад Деед Эзн тадниг алхар седсн уга.

¹¹ Тер нанд келв: «Йов, әмтиг дахулад хаалһд һар. Теднә өвкнрт Би андһар өгсәр, тедн йовад тер һазриг эзлх йоста».

Деед Эзн Израиләс ю некчәхин тускар

¹² Израилин улс! Деед Эзн, тана Бурхн, негхн сурвр таднас сурҗана: Деед Эзиг, тана Бурхиг, икәр күндлтн, Терүнә хаалһар йовтн, Терүнд дурлтн, Деед Эзнд, тана Бурхнд, зүркәрн болн седкләрн кевтнь церглтн.

¹³ Деед Эзнә зааврмудыг болн зокалмудыг күцәтн, тедниг Би эндр тадна сә хәәҗ соңсхҗанав.

¹⁴ Теңгр болн теңгрин цаадк теңгр, һазр деер бәәх юмс кевтән Деед Эзнә болҗана.

¹⁵ Зуг Деед Эзн һанцхн тадна өвкнриг хәәрлҗәнә. Олн улс дундас тадниг, теднә хөөт үйнриг шүүҗ авв (эннь эндр күртл тиим).

¹⁶ Тегәд тадн соңсхврта болтн, хөөннь бичә буцад бәәтн.

¹⁷ Яһад гихлә Деед Эзн, тана Бурхн, – бурхд деер Бурхн болн нойд деер Нойн. Тер – алдр Бурхн, күчтә болн әәмшгтә. Тер үннч, авлһ авдго.

¹⁸ Белвсн гергчүдин болн өнчнә зөвинь Тер харна. Нүүҗ ирсн әмтнд Тер дурта, теднд хот болн хувц өгнә.

¹⁹ Тадн чигн нүүҗ ирсн әмтнд дурлтн, яһад гихлә тадн эврән Египетд нүүҗ ирсн улс биләт.

²⁰ Деед Эзиг, эврәннь Бурхиг, икәр күндлтн. Терүнд церглтн, итклтә болтн, Терүнә нерәр андһаран өгтн.

²¹ Тер – тадна туурмҗ, Тер – тана Бурхн. Тадна төлә Тер алдр болн догшн кергүд күцәв. Тедниг тадн эврәннь нүдәрн үзвит.

²² Тадна өвкнр Египетд ирхләрн, тооһарн тедн 70 күн бәәҗ, ода Деед Эзн, тана Бурхн, тадниг тооһарн теңгрт бәәх оддта әдл олн болдгар өскәв.