Давтх Закан 1 - Хальмг келнд орчулсн Әрүн Бичлһс

Израилин улсин һазр эргәд хәләлһн

¹ Израилин цуг әмтнд Мошен келсн үг эн: эннь Йордан һолын ца көдә һазрт, Суфин хаҗуд, Аравад дуудвр кеҗ. Тернь Паран, Тофел, Лаван, Хацерот болн Ди-Захав балһсд хоорнд болҗ.

² (Хорив уулас Кадеш-Барнеа һазр тал Сеирин уул хәләһәд һардг хаалһар 11 хонгт йовгдна.)

³ Дөчдгч җилин арвн негдгч сарин түрүн өдр Израилин улст Деед Эзнә соңсхад келтхә гисинь Моше күргәд келв.

⁴ Эннь амореймүдин хан Сихониг болн Башана хан Огиг диилснә хөөн болв. Сихон хан Хешбонд болн Ог хан Аштаротд болн Эдрейд һардҗав.

⁵ Йордана дару Моав һазрт Моше диг-даратаһар Зака келҗ өгдг болв. Моше иигҗ келв:

⁶ – Хоривд Деед Эзн, мана Бурхн, маднд келв: «Эн уулын хаҗуд тадна бәәснь болҗана.

⁷ Хаалһдан һарад уул тал амореймүд болн теднлә хоша бәәх олн-әмтн тал йовтн. Арава тал, уул тал, Шефелүр, Негевүр, эрг темцәд Канана нутг тал, Ливанур – алдр Епрат һол күртл йовтн.

⁸ Эн һазриг цугтаһинь Би таднд өгчәнәв! Йовад тер һазриг эзлтн! Тадна өвк Абрахамд, Ицхакд болн Яковд, теднә хөөт үйнрт өгх болҗ Би, Деед Эзн, андһар өгләв».

Һардачнриг шиидлһн

⁹ Тер цагт би таднд келләв: «Тадниг һанцарн залх чидл күрчәхш.

¹⁰ Деед Эзн, тана Бурхн, теңгр деерк одд мет тадниг олн тоота кев.

¹¹ Тегәд Деед Эзн, тана өвкнрин Бурхн, эндрк тооһас 1 000 дәкҗ икәр тадниг өсктхә. Тадниг Тер андһар өгсәрн йөрәтхәг!

¹² Болв би һанцарн яһҗ тиим юм даахмб, тадна күнд зарһ кехмб?

¹³ Отг болһнас цецн, тоолврта болн дамшлтта әмт шүүҗ автн. Тедниг би тадна һардачнрт шииднәв».

¹⁴ Тадн хәрү өгвт: «Чикәр чи келҗәнәч!»

¹⁵ Тегәд би отгин толһачнр болҗах цецн, дамшлтта әмтиг дуудад тадна ахлачнрт шиидүв. Негинь терүнә отгин 1 000 күүнә ахлачд орулув, бас негинь 100 күүнә, бас негинь өрәл зууна, зәрминь 10 ахлачд, зәрмснь бас ахлачнр болв.

¹⁶ Тер цагт Би тадна зарһчнрт заавр өгләв: «Зарһ-зерг юмиг ахнр-дүүнр хоорнд тәәлтн. Зарһинь чикәр кетн – эврә улс дунд болҗах зарһ-зерг юмн болну, эс гиҗ тадн дунд бәәх талын улсла болну.

¹⁷ Тана зарһ чик болтха. Күчтәһинь чигн, күчн угаһинь чигн соңстн. Әмтнәс бичә әәтн, яһад гихлә зарһ Бурхнас ирҗәнә! Кемр керг таднд дегд күнд болхла, нанд өгтн, би күцәсүв».

¹⁸ Тер цагт би таднд ю кехинь цәәлһҗ өгләв.

Арвн хойр гетәчин тускар

¹⁹ Бидн Хоривас һарад ик гидг болн әәмшгтә көдә һазрар йовсиг, тадн цугтаһинь эврән нүдәрн үзцхәвит! Деед Эзнә, мана Бурхна, заасар амореймүдин бәәсн уул тал йовад, бидн Кадеш-Барнеад күрвидн.

²⁰ Тенд би таднд келләв: «Тадн амореймүдин бәәх уул тал ирвт. Эн уулыг Деед Эзн, мана Бурхн, маднд өгчәнә.

²¹ Хәләтн, Деед Эзн, тана Бурхн, эн һазриг таднд өгчәнә! Йовад энүг эзлтн, Деед Эзн таднд өгх болла, тадна өвкнрин Бурхн. Бичә әәтн, бичә сүрдтн!»

²² Болв тадн цугтан хамдан нан тал ирәд келцхәвит: «Түрүләд гетәчнриг илгәх кергтә. Тедн һазриг шинҗләд, ямаран хаалһар йовхиг болн ямаран балһсдт орхиг зааҗ өгх».

²³ Эннь нанд чик болҗ медгдв. Отг болһнас неҗәдәр 12 кү би йилһҗ авув.

²⁴ Тедн йовад уул өөдләд, «Эшкол» гидг тиньгр һазрт күрцхәв. Тер һазриг хәләһәд,

²⁵ тедн урһмласнь цуглулҗ маднд авч ирәд келцхәв: «Деед Эзн, мана Бурхн, маднд сән һазр өгчәнә!»

Израилин улсин зүтклһнә болн Деед Эзнә цухлын тускар

²⁶ Болв тадн йовхар седсн угат. Тадн Деед Эзиг, тана Бурхиг, соңссн угат!

²⁷ Эврәннь шатр дотр суулдад тадн керлдцхәввт: «Деед Эзн маднд дурго. Тегәд Тер мадниг Египетәс һарһҗ йовулв! Мадниг Тер амореймүдин һарт орулад цугтан үктхә гиҗәнә!

²⁸ Бидн альдаран йовҗ йовхмби? Мадна ахнриг соңсхд әәмшгтә. Тенд маднас ик болн өндр нурһта әмтн бәәнә гиҗ келцхәнә, теднә балһсд теңгрт күрм өндрәр батлад бәргдсмн чигн. Тенд анакмудыг үзцхәҗ гиҗ тедн келҗәнә!»

²⁹ Би таднд келләв: «Бичә чочтн, бичә әәтн!

³⁰ Деед Эзн, тадна Бурхн, өмнтн йовна, тегәд Тер тадна төлә Эврән дәәлдх. Тадна чирәд Египетд тиим йовдл болла!

³¹ Көдә һазрт бас тадн эврән тиим йовдл үзләт. Эврәннь көвүһән авч йовх күүнлә әдләр тадниг Деед Эзн, тадна Бурхн, авч йовв. Тадниг нааран йовтл цуг өдрмүдт мел тиим бәәдлтә болв.

³² Тегәд энүнә хөөн тадн Деед Эзнд, тадна Бурхнд, иткҗәхшвтә!

³³ Болв Тертн таднд амрх орм хәәһәд, тадна өмн йовла. Сөөд һал мет таднд чик хаалһ үзүлхин төлә, өдртнь үүлнә бәәдлтәһәр йовв».

³⁴ Деед Эзн тадна келсиг соңсад уурлад андһар өгв:

³⁵ «Эн керг уга үйнрәс нег чигн күн эн йир сәәхн һазр үзшго! Энүг Би тадна өвкнрт өгх болҗ андһар өгләв.

³⁶ Ефунен көвүн Калевәс талдан нег чигн күн үзшго, болв тер үзх. Калев Деед Эзнд иткдг билә. Тер төләд Би терүнд болн терүнә хөөт үйнрт ишкәд йовсн һазринь өгнәв».

³⁷ Таднас көлтә Деед Эзн нанд бас уурлв. Тер нанд келв: «Чи бас эн һазрт оршгоч!

³⁸ Болв Навина көвүн Ешуа, чини мухла, орх! Бийән батар бәр гиҗ кел. Эн һазриг тер Израилин улсин эзлх һазрт хүврәх йоста.

³⁹ Эн һазрт тадна үрд орх. Тедниг бәрәнд орҗ одвза гиҗ тадн әәҗәләт. Ода деерән юн сән, юн му болҗахинь тедн медҗәхш. Би теднд эн һазриг өгнәв, тедн эзлх.

⁴⁰ Тадн болхла, хәрү эргәд, көдә һазр тал йовтн, хаалһнь Улан Теңгс тал һарна».

Деед Эзнә өгх болсн һазриг булаҗ эс чадлһн

⁴¹ Тиигхд тадн нанд келләт: «Бидн Деед Эзнә өмнәс килнц һарһвидн. Болв бидн Деед Эзнә, мадна Бурхна, заксар йовад дәәлднәвидн!» Тадн һартан зер-зев авад уулмуд тал зөрҗ йоввт.

⁴² Деед Эзн таднд келтхә гиҗ даалһв: «Бичә йовтн. Дә бичә эклтн, Би таднла бишлм. Эс гиҗ хортн тадниг ка цокх!»

⁴³ Би таднд келсинь күргүв, болв тадн соңссн угат. Тадн Деед Эзиг соңслго уул деер һархар зүтквит.

⁴⁴ Тадниг тер уулын бәәрн әмтн – амореймүд – тосҗ авв. Тедн тадна ардас зөгин баг мет көөлдв! Тадниг тедн Сеирас Хорм балһсн күртл туув.

⁴⁵ Хәрү ирәд тадн Деед Эзнә өмн уульцхаввт, зуг Деед Эзн тадниг соңссн уга.

⁴⁶ Тадн Кадешд удандан бәәввт.