Апокалипсис 17 - Хальмг келнд орчулсн Әрүн Бичлһс

Ик нертә аля күүкд күн догшн аң хойр

¹ Долан ааһ бәрсн Бурхна элчнрин негнь нан тал өөрдәд иигҗ келв: – Нааран ир! Дала һолын усна өөр суусн ик нертә аля күүкд яһҗ цааҗгдхинь чамд үзүлнәв.

² Һазрин хаадуд терүнлә аля, бузр йовдл кеҗ, һазрт бәәсн улс терүнә аля бузр чаһрас ууҗ согтсмн.

³ Би Әрүн Сәкүсәр дүүрв, Бурхна элч намаг эҗго көдәд авч ирнә. Тенд улан догшн аң деер суусн күүкд күүг би үзв. Тер аң деер Бурхиг му келдг олн нерд бичәтә бәәҗ. Тер аң долан толһата арвн өвртә бәәҗ.

⁴ Күүкд күн улавцр, көк болн улан хувцта, алтн кеерүлһтә, эрднь чолуһар, сувсар кесн чимгтә бәәҗ. Һартнь зута болн бузр-аля йовдлмудар дүүрң алтн ааһ бәәҗ.

⁵ Терүнә маңнаднь нууц тәәлвртә нернь бичәтә бәәҗ. Тер нернь эн: Вавилон гидг алдр балһсн – орчлңгин аля күүкд улсин болн зута йовдлын эк.

⁶ Бурхна улсин цусар, Исусин тускар герчлсн улсин цусар терүг согтсинь би үзв. Тер күүкд күүг үзәд би йир икәр өврв.

⁷ – Яһад өврәд бәәнәч? Эн күүкд күүнә болн терүнә суусн долан толһата, арвн өвртә аңгин нууц чинринь би чамд ода цәәлһҗ өгнәв.

⁸ Чини үзсн аң урднь әмд билә, ода тер әмн уга. Зуг тер йорал уга худгас һарад үкллә харһх. Орчлң үүдснәс өмн әмн-җирһлин дегтрт нернь эс бичгдсн әмтн аңгиг үзәд икәр өврх. Яһад гихлә, тер аң урднь әмд билә, ода әмн уга, зуг хәрү ирх.

⁹ Цугинь медҗ авхин төлә цецн ухан кергтә. Долан толһа гиснь – күүкд күн суусн долан өөдм һазр, бас тернь долан хан болҗана.

¹⁰ Түрүңк тавнь өңгрҗ одла, негнь ода ширә деер сууна, сүүлңкнь ирәд уга. Тер ирхләрн хан болҗ удан үлдшго.

¹¹ Урднь әмд бәәсн, ода әмн уга аң долан хаадудын негнь, эн нәәмдгч хан болҗ хәрү ирх. Эн үкллә харһх.

¹² Чини үзсн арвн өвр – арвн хан мөн. Тедн әмтиг залад уга, зуг аңла хамдан хан болад, нег частан йос бәрх зөв авх.

¹³ Тер арвн хаадуд нег ухан-саната, болв тедн эврәннь йосан болн күчән догшн аңд өгх.

¹⁴ Тедн Хурһнла дәәлдх. Зуг Хурһн Эврәннь Бурхна дуудсн, шүүҗ авгдсн итклтә дахгчнртаһан тедниг диилх. Яһад гихлә, Тер эздүдин Эзн, хаадудын Хан.

¹⁵ Дәкәд Бурхна элч иигҗ келв: – Аля күүкд күн суусн дала һолын усн гиснь – олн зүсн келн-улс, олн келн.

¹⁶ Чини үзсн арвн өвр болн аң аля күүкд күүнд дурго болад, терүнә эзлсн юминь цугинь булаҗ авад, күүкд күүг чим нүцкн үлдәх. Эдн күүкд күүнә цогц махмудынь идәд, терүг һалд шатах.

¹⁷ Яһад гихлә, Бурхн Эврәннь таалыг күцәх сана арвн хаадудын уханднь орулсмн. Бурхна таал эн: Бурхна үг эс күцтл арвн хаадуд нег уха-сана зүүһәд, йос күчән аңд өгх.

¹⁸ Чини үзсн күүкд күн болхла орчлңгин хаадудыг залдг алдр балһсн мөн.