Апокалипсис 11 - Хальмг келнд орчулсн Әрүн БичлһсХойр герч 1 Тер кемҗәлхин төлә нанд тайг өгв. – Йовад Бурхна сүмиг тәклин ширәтә хамднь кемҗәл. Дотрнь сөгдҗәх улсиг тоол. 2 Сүмин һазак бәәриг бичә кемҗәл. Яһад гихлә, тер буру номта улст өгсн юмн. Тедн әрүн балһсиг дөчн хойр сардан даҗрад залх. 3 Һашудсн цагт өмсдг хувцта хойр герчән илгәнәв. Тедн миңһн хойр зун җирн өдрт әәлдх йоста болх. 4 Эн хойр герч – орчлңгин Деед Эзнә өмн зогссн хойр олив модн, зул өргсн хойр тәвц болҗана. 5 Теднд күн хоран күргхәр седхлә, теднә амнаснь һал һарад өшәтнриг уга кех. Тиигәд эн герчнрт хоран күргхәр седсн күн тиигҗ алгдх. 6 Әәлдсн цагтан тедн теңгр хаах, хур ордгинь уурулх. Усиг цуснд хүврүлх дурта цагтан, һазрт аюл илгәх. Тедн тиим йоста болх. 7 Тедниг герчлҗ дуусхлань, йорал уга худгас һарсн догшн аң хойр герчин өмнәс дәәлдҗ, тедниг диилҗ алх. 8 Теднә әмн уга цогц алдр балһсна уульнцд кевтх. Тенд урднь теднә Деед Эзн кирс деер цааҗлгдсмн. Эн балһсна теҗг нернь Содом болн Египет. 9 Келн-әмтн болһнас, әәмг болһнас, келн болһнас цуг улс һурвн өдр дундур эн күшмүд хәләҗ үкәрт оршах зөв өгшго. 10 Тер хойр әәлдәч һазрт бәәсн улсиг зовасн учрас күмни улс теднә үклд икәр байрлх. Әмтн нег-негндән белг өгәд нәр кех. 11 Һурвн дундур өдр давхла, Бурхнас һарсн әмнә Сәкүсн теднә цогцд орад, тер хойр герч босад көләрн зогсҗ. Энүг үзсн улс икәр әәцхәҗ. 12 – Нааран, деегшән һартн, – гиҗ теднд келсн чаңһ дун теңгрәс һарсинь тер әәлдәчнр соңсв. Тер хойр герч үүлн деер теңгрүр өөдлв. Теднә өшәтнр энүг үзв. 13 Тер дарунь һазр икәр чичрв. Балһсна арвдгч хүвнь хольврад унҗ одв. Эн һазр чичрлһнд долан миңһн күн үкв, наадкснь икәр сүрдәд, теңгрин Бурхнд туурмҗ өргв. 14 Хойрдгч зовлң давад, һурвдгч зовлң бачм кевәр өөрдҗ йовна. Доладгч бүрә 15 Бурхна доладгч элч бүрә татв. – Мана Бурхн болн Терүнә илгәсн Аврач орчлңгиг залх йоста болв. Бурхн мөңкиндән залх, – гисн кесг чаңһ дун теңгрәс соңсгдв. 16 Бурхна өмн суусн хөрн дөрвн көгшәс элкдҗ киисәд Бурхнд сөгдҗ келцхәв: 17 – Ода бәәдг, урднь чигн бәәсн, Деед Эзн, сүркә күчтә Бурхн! Алдр күч авад орчлңгиг залсндтн ханлт өргҗәнәвидн! 18 Буру номта улс килңнҗ бәәнә. Болв Тана цухлын цаг ирв. Та үксн улсиг зарһла харһулхит. Тана зарцнрт, әәлдәчнрт, Бурхна улст болн таниг әәдг тоомсрта болн тоомср уга улст ачинь хәрүлх цагнь ирв. Орчлңгиг хоосрулҗах улсиг уга кех цаг өөрдв! 19 Теңгрт бәәсн Бурхна сүм тер дарунь секгдәд, тенд бәәсн бооцана хәәрцг үзгдв. Генткн цәкл цәкләд, шууган, оһтрһун дун һарад, мөндр икәр орад, һазр чичрв. |
© Институт перевода Библии, 2002-2023
Institute for Bible Translation, Russia