2 Пётр 2 - Хальмг келнд орчулсн Әрүн Бичлһс

Деми багшнр

¹ Әмтнә дунд деми әәлдәчнр бас бәәдг билә. Ода чигн тадн дунд бас деми багшнр һарч ирх. Тедн итклиг уга кедг буру ном нууцар авч ирәд, тедниг хулдҗ авсн Деед Эзиг һолх. Тиигәд тедн бийән шулуһар цааҗла харһулх.

² Кесг улс теднә аля йовдлыг дахх. Теднәс көлтә әмтн Үннә хаалһиг муурулх.

³ Иим багшнр хармч заңгасн көлтә худл үг келәд танас олз авх. Кесг цагтан теднә Зарһчнь белн билә. Тедниг цааҗлх Алач нөр уга сууна.

⁴ Яһад гихлә, Бурхн нам килнц кесн элчнрән чигн хәәрллго үксн улсин ормд хайсмн. Тендән тедн цевәр күләтә харңһуд сууна, Зарһин өдр күләҗәнә.

⁵ Бурхн кезәңк орчлңгиг чигн хәәрлсн уга. Тер килнцтә улсин һазрур усна аюл илгәв. Зуг Бурхнла чик седкләрн бәәтн гиҗ әмтиг сурһдг Ноахиг болн дәкәд долан күүг Бурхн аврсмн.

⁶ Бурхн Содом болн Гомора гидг балһсдиг гемшәһәд, хөөтк килнцтә улст үлгүр болтха гиһәд һалар шатасмн.

⁷ Зуг чик седклтә Лотыг аврсмн. Килнцтә улсин цалдң йовдлмуд Лотын седклинь дарсмн.

⁸ Эн чик седклтә Лот тедн дунд бәәһәд, йос эвддг йовдлмудынь үзәд, теднә тускар соңссн цагтнь өдр ирвәс седклднь му болдг бәәҗ.

⁹ Деед Эзнд иткдг улсин сөрлһнәс яһҗ харсхинь болн хар саната улсиг Зарһин өдр иртл яһҗ оньдиндән бәрҗәхинь Деед Эзн меднә.

¹⁰ Цогцин бузр седвәрмүдәр бәәдг болн Бурхна йосиг һолдг улсиг Бурхн онц кевәр цааҗна. Тиим улс әср болн ик саната. Тедн Бурхна алдр элчнриг му келхәс әәхш.

¹¹ Бурхна элчнр тиим улсас улм ик күчтә болвчн, деми багшнриг му келхш Деед Эзнә өмн гемшәхш.

¹² Эн улс ухан уга, бәргдәд алгдх мал мет төрхәрә медсәрн йовдлмуд һарһна. Эдн бийснь эс меддг юмиг му келнә. Эдн мал кевтәһәр алгдх.

¹³ Эдн талдан улсиг яһҗ зовала, тиигҗ бийснь зовлңган эдлҗ цааҗлгдх. Эдн өдрин дуусн нәр-наадан кеһәд байрлна, әркдәд хуульч йовдлмуд кенә. Эн учрар эдн таднла хамдан хот уусн цагт тадниг һутаһад неритн муурулна.

¹⁴ Эдн күүкд улсиг үзхләрн, аля яһҗ кехән ухална. Эн улс килнц кеһәд цадцхахш. Эн деми багшнр батар иткдго улсиг килнцд уңһана. Эдн хармч болхд дасхгдсмн. Эдн харалд туссн улс.

¹⁵ Деми багшнр чик хаалһасн хаҗиһәд, Босрин көвүн Балам гидг әәлдәчин хаалһар йовна. Эн әәлдәч мөңгнд дурта билә, тер мөңгиг хар саната йовдл кесндән авдг билә.

¹⁶ Балам эврәннь килнцәсн көлтә бурушагдҗ. Энүнә элҗгн күүнә келәр келәд, әәлдәчин ухан уга йовдлыг зогсав.

¹⁷ Эн улс хагсҗ одсн булг мет, салькнд туугдсн үүлн мет. Бурхн теднд харңһуһар бәәдг орм белдҗ.

¹⁸ Эдн ик саната, эргү үгмүд келәд, цогц махмудын му седвәрмүд олзлна. Хаҗһр хаалһасн чик хаалһд шиңкән орсн улсиг хавхдан бәрҗ авхар тиигнә.

¹⁹ Эдн әмтнд сул җирһл өгнәвидн гилднә, зуг бийснь кү үрәдг му авъясмудын мухла болна. Яһад гихлә, күн юмнд диилгдсн болхла, тер юмна мухла болҗ үлднә.

²⁰ Кемр күн Мана Деед Эзн болн Аврач Исус Христосиг медсәр орчлңгин бузр йовдлмудас сулдсн хөөн дәкн терүндән оралдҗ диилгдхлә, тер күүнә бәәдл урдк бәәдләсн улм му болна.

²¹ Учрнь эн: тедн чик бәәдлин хаалһиг медәд, әрүн заавриг үлдәхин ормд эн хаалһиг эс медсн деер болх билә.

²² Эн учрсн йовдлын тускар үлгүрт: «Ноха бөөлҗсндән хәрү ирдг», болн «Уһагдсн һаха дәкн бальчгт ордг» – гиҗ чикәр келгдҗәнә.