1 Тимофей 3 - Хальмг келнд орчулсн Әрүн Бичлһс

Иткдг улсин һардачин заңгин тускар

^1-3 Иткдг улс һардхар седҗәх күн бәәхлә, тер буйнта көдлмш кехәр седҗәнә. Иткдг улсин һардач күн иим болх йоста: әмтнәс келүлшго, һанцхн гергтә, чаһр ууҗ согтшго, бийән сәәнәр бәрдг, олн дунд күндтә, әмтиг гиичлүлхдән дурта, арһта багш, чаһрт авлгддго, ноолдач биш номһн заңгта, эвтә болн мөңгнд дурлшго күн болх.

⁴ Тер күн эврәннь өрк-бүлән сәәнәр һардҗ чаддг болх зөвтә. Үрдүднь терүг бас тевчәд, соңсхврта болх йоста.

⁵ Кемр кен чигн күн эврәннь өрк-бүлән эс һардҗ чадҗахла, тер күн яһҗ Бурхнд иткдг улсиг һардхмб?

⁶ Һардх күүг шиңкән Бурхнд итксн улсас шүүҗ авхмн биш. Тиим күн ик сана зүүдг болдг. Тиигхләрн тер эрлглә әдл засггдх.

⁷ Һардх күн олн дунд тоомсрта болх йоста. Эс тиигхлә тер күн һутагдҗ, эрлгин хавхд бәргдх.

Иткдг улсин нөкднрин заңгин тускар

⁸ Иткдг улсин нөкднр бас тиим болх йоста: сән заңгта, үннч, чаһрт авлгддго, мөңгнд хармч биш болх.

⁹ Тедн сүзгин медүлсн үннд цевр седкләрн иткх йоста.

¹⁰ Түрүләд тиим улсиг сөрәд хәләх кергтә. Кемр тедн эн шүүвр даахла, тиигәд одҗ иткдг улсин нөкдин көдлмш кеҗ чадхмн.

¹¹ Нөкднрин гергчүд бас сән заңгта, хов зөөшго, чаһр ууҗ согтшго, цугтад ицлтә бәәдг болх зөвтә.

¹² Нөкднр һанцхн гергтә болх зөвтә. Эврәннь өрк-бүлән болн үрдүдән сәәнәр һардҗ чаддг болх йоста.

¹³ Нөкднр эврәннь көдлмшән сәәнәр күцәхлә, тедниг талдан иткдг улс өөдән үнлх. Тедн Исус Христост итклиннь тускар зөргтәһәр келх.

Христианск сүзгин алдр нууц

^14-15 Би удл уга танад күрхв гиҗ нәәлҗәнәв. Кемр намаг удадхла, эн бичг Бурхна өрк-бүлд бийән яһҗ бәрхиг зааҗ өгх. Бурхна өрк-бүл әмд Бурхнд иткдг улс мөн. Иткдг улс болхла үннә ул болн хаац болҗана.

^16а Мана шаҗна нуувч ик алдр: Исус Христос күн болад төрсмн.

^16б Әрүн Сәкүсн терүг чик седклтә гиҗ үзүлв. Терүг Бурхна элчнр цугтан үзлә. Түүнә тускар олн улс дунд цәәлһвр кегдв. Христос туурмҗтаһар теңгрүр авгдла. Терүнд делкән олн улс иткв.