SOLOMON LA 4 - Khualsim Bible

Monu ih Muisung Hlornak

¹ Lungduh, zei tluk muisung ci, iangngei hrim ai ci! Na hmelkhum phen mittangṭial dawh cu, ṭhuro mit ṭial lo ai ee. Na hluaisam ni Gilead tlang a ṭum, merun rual mang zaam sialmal.

² Na ha var tian rem dawh te cu, turual kholcia hmul meh awk, ṭiabeuh om lo kim ciuceu, a phiir ih dir lo ai ee.

³ Vo maimaw hluan na hmur te, iangngei kon na kaa; na biang no ni kawmseu taleti, na hmelkhum puanzaar pheen ah.

⁴ Na hngawng te cu David donhleisang, sidar thlurthlur an tian nak; ralterhthiam lum zahra baan mang, ṭhikual rualrual na orh nak.

⁵ Tlang cung lili par lak bual, hreungen suan phiir khi, na ṭaangbon ni iang hna ee.

⁶ Zing khuaṭhian ih thlizil te, a hran ziarmar lai hlanah, frankincense leh rimhmui myrrh om hmun tlang lei ah kal kei caal lang.

⁷ Lungduh aw, samthlairem, muisung hrim ci, na tiṭung soibei awk in dawh tling ci.

⁸ Lebanon khin ka sin rong ai law, ka corua nu aw, ra pok ai law Amana tlang ziik khin; Senir, Hermon tlang ziik in, kiosa no lungkuak pang, tlangtlai leen nak mual parin.

⁹ Far te can leh ka corua, ka lung la ai ci, lung mankhung thlaih ṭhi te rum, mit sir te ih ma veen zawn, ka lung hma thla ee.

¹⁰ Na zuun zei tluk thlum in al na maw, ka far can leh ka corua! Na zuun khi ni sabitzu hleih in, zei lo la khin ṭhasawn maw, na thathau ni rimhmui phunza hleih fawn hna.

¹¹ Ka corua nu, na hmur te ni khuailuati mang ti, na lei tang in cawhnawi, khuaizu luang ai khawh; na thuamthil rim Lebanon sidar rim khi lo ai ee.

¹² Ka far can leh ka corua nu cu, duum kalhkhar, kul duum cirh put khi hluan ee.

¹³ Na biang no cu taleti kung duum, a sung thei tlai rim ṭhacem, hena nard thawn an beer nak.

¹⁴ Nard, salfron, kalamus, sinnamon, frankincense, myrrh leh aloe, rimhmui ṭhacem kim ciuceu ih an omnak—

¹⁵ Lebanon khin rong luang ti thiang leh, duum cirh tikhur nung hi ci!

¹⁶ Zo thli thoin, sim thli hong hrang law! Zuanpi sawh law a thei tlai leh a rimhmui khi ram lengah. A duum sungah rong lang seh ka tum val, ei lai a pang a ṭha.