Yohanes 5 - Abun Scripture

Yefun Yesus ben yetu ge dik yo ge mo syurgun Betesda de

¹ Orete Yesus mu mo Yerusalem wa An simo ye Yahudi bi kam sye dik yo mone.

² Mo Yerusalem karowa pe gato gum do, ”Domba bi Ros Syo” ne syurgun dik yo mone. Syurgun ne su a Ibrani gum do Betesda. Mone yé nggo nukot mumek wairi syurgun ne.

³ Yé mwa gato i án sem mo bur mo nukot bok ne mo syurgun de. Deyo gro ndu e, deyo gwes út e, deyo syim si gwes út re. [Yé mwa gato i ne, án eswa syurgun rom-ram,

⁴ we wam bok yo Yefun Allah bi malaikat is ma mo syurgun, ete malaikat ne ben syur ne rom-ram. Syur ne do rom-ram yo, ye gato mu bok ngga mo syur ne nyim kadit ye yi neya, bere an ge kadit an bi suki re.]

⁵ Yebris ge dik yo kem mo nat ne, an i sor mu kom mo tahun musyu gri sop munggwo.

⁶ Yefun Yesus me an sem mone, ete Yefun jam do an i nam it sa, Yefun Yesus ndo mo yebris ne do, ”Nan iwa nan ge kadit nan bi suki ne bado?”

⁷ Ye gato i ne ki nai Yefun Yesus do, ”Yenggras, syur rom-ram yo, ye yo ós wa gwat ji ngga mo syurgun ne kekro nde. Ji do mu mo syur ne saresa, ye yi anato mu ngga mo syur ne nyim wé kadit ji re.”

⁸ Sane Yefun Yesus ki nai an do, ”Nan sun, nan pam nan bi sun, nan mu se!”

⁹ Yefun Yesus do syogat an sun sane, sugane it ye ne ge re. An pam an bi sun, orete an mu. Yefun Yesus ben ye ne ge su kam Sabat, {ye Yahudi bi kam sye, kam gato yé fowa ben suk su ne.}

¹⁰ Sane ye Yahudi bi yepasye ki nai ye gato ge sim ne do, ”Kam ré kam sye, kam Sabat, men bi yenggras duno men do, su kam Sabat men ben suk nde, sane nan pam nan bi sun nde.”

¹¹ Sarewo yebris ne ki nai yepasye ne do, ”Ye gato gado ben ji ge ne, An anato syogat ji pam ji bi sun, ete ji gwat mu.”

¹² Sane yepasye ndo mo an do, ”Je u gei anato syogat nan pam nan bi sun, ete nan gwat mu ne?”

¹³ Sarewo ye gato ge kadit an bi suki ne jam nde Ye gato ben an ge ne, we Yefun Yesus fres mo yé mwa miten kadit an re.

¹⁴ Ber o, ete Yefun Yesus ku yebris ne mo Yefun Allah bi nu mit, ete Yefun ki nai an do, ”Su ré nan ge it. Nan ben sukibit o nde, ondebe nan ku sukye sye wai kadit ne o re.”

¹⁵ Sane ye ne syesyar mu mo nden, ete an ki nai ye Yahudi bi yepasye do, Yefun Yesus gane anato ben an ge re.

¹⁶ Sane yepasye ne meret os wa ben sukye nai Yefun Yesus, we Yefun ben ye ne ge su kam sye kam Sabat ne.

¹⁷ Sarewo Yefun Yesus ki nai ye Yahudi bi yepasye ne do, ”Ji bi Ai Yefun Allah ben suk gat sor kom mo kam ré, sane Ji waii ben suk dom.”

¹⁸ Yefun Yesus ki bi sukdu-i ne anato ye Yahudi wergat án nggwa nggi wai o subere án meret os wa án gu Yefun Yesus wé. Yepasye meret os nggi wai o, mo suk gato Yefun Yesus ben siri kadit ye Yahudi bi sukduno subot kam sye ne sor nde, wo yepasye ne maskwa mo gato Yefun Yesus ki do, Yefun Allah anato An bi Ai re. Yefun Yesus ki do, Yefun Allah anato An bi Ai bi sukjimnut do, Yefun Yesus dakai anato tepsu Yefun Allah.

Yefun Allah bi Gan bi suktinggi

¹⁹ Yefun Yesus ki suk su ye Yahudi bi yepasye sare do, ”Suk gato Ji ki ré suksangge anare, Ji gato Yefun Allah bi Gan, Ji wadigan yo nggiwa ben suk nde. Ji ben suk gato Ji me Ji bi Ai ben ne ko. Suk gato Ji bi Ai ben ne yo, bere An bi Gan to Ji ré waii benbot dom.

²⁰ We Ji bi Ai bi sukjimnut sye kas subot Ji, gato An bi Gan. An kadum suk mwa ne sino gato An dakai ben ne nai Ji. Bere An kadum suk gato sye wai nai Ji o re, subere nin yeket.

²¹ Ji bi Ai Yefun Allah anato sun yekwop mbau satu, ete ben ye ne kem ndo to kapyo mato kapyo. Sane dom, An bi Gan to Ji ré ben yetu gato An mit iwa ne kem gesyos.

²² Ji bi Ai Yefun Allah yo ndobot yetu nde. Ji bi Ai dakai bes Ji wa Ji ndobot yetu mwa ne sino mo bur ré sor.

²³ Ji bi Ai bes Ji gum wa Ji ndobot yetu subere yé mwa ne sino jammo An bi Gan tepsu yé jammo An. Ye gato yo jammo Ji nde yo, ye ne yo jammo Ji bi Ai gato syogat Ji ma mo bur ré dom nde.

²⁴ Suk gato Ji ki ré suksangge anare, ye gato jammo Ji bi sukdu, orete an onyar kem mo Ji bi Ai gato syogat Ji ma mo bur ré it yo, ye ne kem gesyos it. Bere Ji yo syo sukye nai ye ne mo bot gesyos nde. Ye ne brek kadit os gato mu mo bot gesyos, ete an muket os gato mu mo pe gato an kem ndo to kapyo mato kapyo it.

²⁵ Suk gato Ji ki ré suksangge anare, Ji bi sukdu ne karowa bor it. Karowa o nde, wo bor it anare. Bere yekwop jam Yefun Allah bi Gan to Ji ré ké. Ye gato jam Ji ké ne yo, ye ne mbau satu.

²⁶ Tepsu Ji bi Ai dakai anato ben yetu mbau, An ben An bi Gan to Ji ré nggiwa ben yetu mbau dom.

²⁷ Yefun Allah bes Ji gum kok wa Ji ndobot yetu, we Ji anato gum do Yetu bi Pa.

²⁸ Nin yeket suk gato Ji ki ne nde, we karowa yé mwa gato kwop ne jam Ji ké,

²⁹ ete yé ne syesyar kadit bi makwe ne. Yé gato ben suk gato ndo yo, yé ne sun ete mbau to kapyo mato kapyo. Sarewo yé gato ben suk gato ibit yo, yé ne sun ete ku sukye mo bot gesyos.”

Sukdu gato ye ki rer subot Yefun Yesus

³⁰ ”Ji dakai yo ben suk tepsu Ji dakai bi sukjimnut nde, wo Ji ndobot yetu mo suk gato án ben ne tepsu sukdu gato Ji bi Ai ki ne. Ji ndobot nje sisu sangge sor, Ji ndobot nje sisu ri-roi, we Ji yo ben Ji bi suk-i ket Ji i nde, wo Ji ben Ji bi suk-i tepsu Ji bi Ai gato syogat Ji ma mo bur ré mit-i sor.

³¹ Ji dakai ki sukdu subot Ji dakai yo, bere nin nut do, suk gato Ji ki ne yo sangge nde.

³² Sarewo Yetu ge dik yo o anato ki sukdu rer subot Ji mó re. Ji bi Ai anane. An bi sukdu-i ne sa, sangge.

³³ Nin syogat yé bok yo mu ndo mo Yohanes, ete Yohanes ki sukdu subot Ji gato sangge mó re.

³⁴ Sukdu gato yetu ki subot Ji, Ji dakai yo mitmo sukdu ne nde re. Sarewo Ji ki subot Yohanes bi sukdu-i subere ós nin brek kadit os ibit, subere nin kem ndo to kapyo mato kapyo.

³⁵ Yohanes ne tepsu sukru gato ru rer, ete i-rer ne ku pe gato ndendu mó. Ketke nin iwa sukru ne, i-rer ku nin, wo yo nam nde ge, nin bariwa re.

³⁶ Yohanes ki bi sukdu-i subot Ji mó re, sarewo suk mwa ne sino gato Ji bi Ai syogat Ji ben more kadum rer wai kadit sukdu ne do, Yefun Allah anato syogat Ji ma mo bur ré re.

³⁷ Sane dom, Ji bi Ai gato syogat Ji ma mo bur ré, An anato ki sukdu rer subot Ji. Wo nin yo jam An ki An bi sukdu-i yo mo nde. Nin yo ku An gro-i yo mo nde.

³⁸ Nin yo grem An bi sukdu mo nin mit dom nde, we Ji, gato An syogat ma mo bur ré, nin yo onyar kem mo nde.

³⁹ Nin samok wa nin baca Yefun Allah bi sukdu petok sor, we nin gendo nin baca yi sor re, bere nin kem ndo to kapyo mato kapyo. Mo sukdu ne Yefun Allah dakai anato ki sukdu rer subot Ji.

⁴⁰ Ji da kak os wa nin kem ndo to kapyo mato kapyo, sarewo nin bariwa nin jammo Ji.

⁴¹ Ji yo mitwa nin yetu un Ji gum nde.

⁴² Ji jam nin kom mo nin mit re. Ji jam do, nin bi sukjimnut sye yo kas subot Yefun Allah mo nde.

⁴³ Ji bi Ai bes Ji wa Ji ma mo bur ré, wo nin bariwa Ji re. Wo ye yi dakai bes an gum kok ete ma yo, bere nin iwa ye ne.

⁴⁴ Nin bi sukjimnut sye wa ye yi un nin gum, ete nin bambrai wa Yefun Allah un nin gum ne yo, bere nin nai sukjimnut dik wa nin onyar kem mo Ji sa u ne? Yefun Allah, An ka dik ne sor, ye yi yo nggi wai kadit An nde. Sarewo nin yo werwa ben suk subere An un nin gum nde.

⁴⁵ Nin gendo Ji anato ndak nin gum mo Ji bi Ai gwem. Sane nde. Wo ye gato nin kwabom kam mó, gato gum do Musa, bere an anato ndak nin mo Ji bi Ai gwem.

⁴⁶ Nin do onyar kem mo Musa it yo, bere nin onyar kem mo Ji dom, we Musa krom sukdu subot Ji mó re.

⁴⁷ Wo nin yo onyar kem mo suk gato Musa krom ne nde, sane bere nin onyar kem mo suk gato Ji ki ne sa u ne?” Bere yo mo nde.