Yohanes 14 - Abun Scripture

Yefun Yesus anato tepsu os wa men mu mo men bi Ai mo gu

¹ Yefun Yesus ki nai An bi pakon do, ”Nin kwabom dek subot suk mwa neya nde, wo nin kwabom kam mo Yefun Allah et. Nin kwabom kam mo Ji dom et!

² Mo Ji bi Ai bi nu, gumwak mwa wa nin kem mone mó re. Sukdu ne sangge, ondesor sa, Ji yo ki nai nin jam nde. Ji mu mone wa Ji fro nat wa bere nin kem mó.

³ Ji mu fro nat wa nin orete yo, Ji satu ma, ete Ji kar nin mu mo Ji bi nat-i. Bere men sino kem mone subere mo nat gato Ji kem mone, nin dom si Ji kem mone sino.

⁴ Nin jam os gato mu mo nat gato bere Ji mu mone re.”

⁵ Orete Tomas ki nai Yefun Yesus do, ”Yenggras, men bi Yekwesu, men jam nde nat gato Nan mu mone. Sane men jam os gato mu mone sa u ne?”

⁶ Yefun Yesus ki nai an do, ”Ji dakai anato tepsu os gato mu mo Yefun Allah. Ji anato tepsu os gato sangge. Ji anato kak os wa yetu kem ndo mone. Yetu yo ku os wa an mu kom mo Ji bi Ai nde, wo an sibot os gato Ji kak ne sa, bere an kom mo Ji bi Ai re.

⁷ Nin do jam Ji su sangge it yo, bere nin jam Ji bi Ai dom. Saneyo, nin jam Ji bi Ai it anare. Nin me An it anare.”

⁸ Filipus ki nai Yefun Yesus do, ”Yenggras, Nan kadum Nan bi Ai nai men me subere men yo nutbot o nde.”

⁹ Yefun Yesus ki nai Filipus do, ”Ji sisu nin nam it. Filipus, nan jam Ji yo ri nde tó bado? Ye to me Ji it yo, ye ne me Ji bi Ai dom anane it. Sane suma ben anato nan ki do, Ji kadum Ji bi Ai wa nan me ne?

¹⁰ Filipus, nan nut do, sangge, Ji si Ji bi Ai tepsu dik bado nde e? Sangge, Ji dakai bi sukdu-i anane nde, wo Ji bi Ai gato si Ji tepsu dik, An anato fro suk gato Ji ki e, Ji ben e ne re.

¹¹ Sane nin onyar kem mo suk gato Ji ki ré et, sangge, Ji si Ji bi Ai tepsu dik. Ondeyo, nin onyar kem mo suk gato Ji ben gato ben nje yeket ne sor, we suk ne kadum do, sangge, Ji si Ji bi Ai tepsu dik.

¹² Suk gato Ji ki ré suksangge anare, ye to onyar kem mo Ji yo, an waii ben suk tepsu suk gato Ji ben ne re. Bere an ben suk mwa wai kadit suk gato Ji ben ne, we bere Ji satu mu mo Ji bi Ai, ete Ji bi An Gen ma bok nggwa mo nin.

¹³ Suk to nin ndek mo Ji bi Ai yo, nin ki Ji gum mo suk ne, bere Ji syo nai nin. Ji syo suk ne nai nin subere yé bes Ji bi Ai gum kok mo suk gato Ji syo nai nin ne.

¹⁴ Suk to nin ndek mo Ji bi Ai, ete nin ki Ji gum mó yo, bere Ji syo nai nin re.”

Yefun Yesus tom do, bere Yefun Allah Gen ma bok nggwa mo nje

¹⁵ ”Nin bi sukjimnut sye kas subot Ji it yo, bere nin benbot suk gato Ji syogat nin ben ne sor.

¹⁶ Bere Ji ndek mo Ji bi Ai subere An bi An Gen ma win Ji. An Gen ne tepsu yegweswai gato ós nin, ete sisu nin pe to kapyo mato kapyo.

¹⁷ Bere Yefun Allah Gen duno nin su suk gato sangge sor. Yetu mo bur ré yo ku os wa Yefun Allah Gen ós án nde, we yetu mo bur ré yo me Yefun Gen nde. Yetu ne yo jam Yefun Gen dom nde. Sarewo nin sane nde, nin sa, nin jam Yefun Allah Gen, we An sisu nin pe. Bere Yefun Allah Gen ne ma bok nggwa mo nin mit dom.

¹⁸ Ji yo misyar nin dakai kem yi nde, Ji yo misyar nin tepsu pa ti nde. Bere Ji satu ma wa nin tó.

¹⁹ Yo nam nde ge, yetu mo bur ré yo ku Ji o nde. Sarewo nin sa, bere nin ku Ji mone tó, we bere Ji mbau kadit sukkwop o re. Sane bere nin kem gesyos dom.

²⁰ Su kam gato nin kem gesyos ne it yo, bere nin jam do, Ji si Ji bi Ai tepsu dik. Sane dom bere nin jam do, nin si Ji tepsu dik sino.

²¹ Ye to jammo Ji bi sukdu-i, ete benbot yo, ye ne anato bi sukjimnut sye kas subot Ji. Bere Ji bi Ai bi sukjimnut sye kas subot an. Ji dom bi sukjimnut sye kas subot an, ete Ji kadum Ji nggwa nai an.”

²² Yudas, gato Yudas Iskariot nde, wo Yudas doyi, an ndo mo Yefun Yesus do, ”Yenggras, men bi Yekwesu, ben sa u anato Nan kadum Nan nggwa nai men sor re, wo Nan yo kadum Nan nggwa nai yetu sino mo bur ré nde ne?”

²³ Yefun Yesus ki nai an do, ”Ye to bi sukjimnut sye kas subot Ji it yo, bere ye ne benbot sukduno gato Ji duno an su ne. Bere Ji bi Ai bi sukjimnut sye kas subot an. Bere Ji si Ji bi Ai ma mo an, ete si an kem sino.

²⁴ Ye to bariket Ji yo, ye ne yo benbot sukduno gato Ji duno an su ne nde. Sukdu gato Ji ki nai nin jam ne yo ma kadit Ji dakai bi sukjimnut-i nde, wo sukdu ne ma kadit Ji bi Ai gato syogat Ji ma more bi sukjimnut-i re.

²⁵ Ji kem sisu nin tó, Ji ki sukdu mwa ne nai nin jam re.

²⁶ Sarewo Yefun Allah Gen gato Ji bi Ai bere syo ma win Ji ne, bere Yefun Gen duno nin su suk mwa ne sino. Bere Yefun Gen ós nin napawa suk mwa gato Ji ki nai nin re.

²⁷ Ji syo suktinggi nai nin subere nin kwabom dek nde, wo nin kem ndo tepsu Ji dakai ré. Ji syo suktinggi nai nin wa nin kem ndo. Ji yo syosuktinggi ne tepsu yetu mo bur ré nde. Sane nin nutbot suk mwa teker nde, nin nyu nde.

²⁸ Nin jam Ji ki do, ’Ji mu kadit nin, sarewo bere Ji satu ma o re.’ Nin bi sukjimnut sye kas subot Ji it yo, bere nin mit iwa Ji mu mo Ji bi Ai. Ji bi Ai anato gum kok sye wai kadit Ji.

²⁹ Su ré Ji ki sukdu ne nyim nai nin jam subere su kam gato sukdu ne bor it yo, nin onyar kem mo Ji bi sukdu-i anane.

³⁰ Ji yo ki suk mwa su nin o nde, we biris bi yekwesu gato jom bur ré ma it anare. Sarewo biris bi yekwesu yo nggiwa jom Ji nde,

³¹ wo suk mwa ne sino gato Ji bi Ai syogat Ji ben ne, Ji ben suk mwa ne sino subere yé mo bur ré jam do, Ji bi sukjimnut sye kas subot Ji bi Ai. Tep more it, men ti men mu kadit pe ré et.”