Yohanes 10 - Abun Scripture

Yefun Yesus gwat sukamno subot ye gato mewa an bi suksi sisu ndo

¹ Yefun Yesus ki do, ”Suk gato Ji ki ré suksangge anare, yé si suge gato gum do domba yo, yé gat ros wairi wa domba kem mo mit. Sane ye gato yo sokbot ros syo nde, wo an it ket ros mo nat yi ne yo, ye ne anato ye gato syimsi suk, ye ne ben sukibit.

² Sarewo ye gato sokbot ros syo yo, ye gato mewa bi suksi anane.

³ Ye gato mewa bi suksi kom mo ros syo ne yo, ye gato mewa ros syo kak wa ye gato mewa bi suksi ne sokbot. Ye gato mewa bi domba ne sok mo ros mit sa, an kendo an bi suksi gedik-gedik gum, sane an bi suksi jam an ké, ete an bi suksi syesyar. An mu nyim mo nden, ete an bi suksi mu boribot an mu mo nden.

⁴ An si an bi domba syesyar mo nden sa, an mu nyim, an bi domba boribot an, we an ké, ete an bi domba jamwa an re.

⁵ Ye yi ké yo, bere suksi ne yo simo ye ne nde re, wo domba ne titi wé kadit ye ne, we domba ne jam nde ye ne re.”

⁶ Yefun Yesus gwat sukamno ne, sarewo ye mone yo jam bi sukjimnut nde.

Yefun Yesus anato tepsu Ye gato mewa bi suksi sato domba sisu ndo

⁷ Sane Yefun Yesus ki bi sukdu-i subot ye gato mewa domba wam dik yo o do, ”Suk gato Ji ki ré suksangge anare, Ji dakai anato tepsu ros syo wa domba sokbot.

⁸ Ji yo ma nde tó, yé bok ne sino gato ma nyim gato ki do, Yefun Allah syogat án ma, yé ne kidar, án anato ye gato syimsi suk, án anato ye gato ben sukibit. Yé bok ne ké, sarewo domba yo jammo án nde re.

⁹ Ji anato tepsu ros syo, ye to sokbot Ji yo, an titi fro kadit sukye, an ku nat wa an kem ndo, an sok, an syesyar, an ku sugit wa an git.

¹⁰ Ye gato syimsi suk, an ma wa nai yé bi suk or wé kadit nje, an ma wa gu nje kwop, an ma wa ben suk mwa mone ibit or re. Sarewo Ji ma kak os wa nje subere yé kem ndo to kapyo mato kapyo. Bere yé kem ndo wai o re, yé yo yewa suk yo o nde.

¹¹ Ji anato tepsu ye gato mewa an bi suksi sisu ndo. Ji mewa Ji bi domba sisu ndo. Ji bi Ji nggwa kwop wa Ji bi domba mwa ne sino.

¹² Ye gato ye bi an bi kamba su sugum wa an mewa domba ne, suksi ne yo tepsu an bi suksi kai nde. Sane an me ndar krok do ma yo, an titi kadit, an misyar domba dakai kem. Ndar krok do ma sa, ndar gu domba, ete domba ne titi daret.

¹³ Ye gato ye bi an bi kamba ne titi kadit domba, we an yo nutbot domba ne nde, wo an nutbot sugum gato an ku mo an bi kamba sor re.

¹⁴ Ji anato tepsu ye gato mewa an bi suksi sisu ndo. Ji jam Ji bi suksi sisu ndo. Sane dom Ji bi suksi jam Ji sisu ndo.

¹⁵ Ji si Ji bi suksi jamwa yu tepsu Ji si Ji bi Ai jamwa yu re. Ji bi Ji nggwa kwop wa Ji bi suksi.

¹⁶ Ji si domba yi yo o gato kem mo nat ré nde. Domba ne kem mo nat tara re. Ji mu gwat domba yi ne si Ji bi domba ré sok mo nat dik sor. Bere domba yi ne jam Ji ké, ete domba ne ma si domba ré kem mo pe dik. Sane bere Ji ka dik sor anato mewa domba mwa ne sino mone.

¹⁷ Ji bi Ji nggwa kwop wa Ji bi suksi ne, orete bere Ji mbau satu anato Ji bi Ai bi sukjimnut sye kas subot Ji.

¹⁸ Ye yi yo gu Ji ret nde, Ji dakai iwa Ji bi Ji nggwa wa ye gu Ji kwop, bere ye gu Ji sor. Ji dakai nggiwa Ji bi Ji nggwa, ete Ji nai Ji nggwa mbau satu tepsu suk gato Ji bi Ai syogat Ji ben ne.”

¹⁹ Sane ye Yahudi duwer yu mo sukdu gato Yefun Yesus ki ne.

²⁰ Yé mwa mone ki do, ”Semda ben An ko ré go! An bi sukjimnut ibit it. Nin jammo An wa suma ne?”

²¹ Sarewo yé deyo o mone ki do, ”Ye gato semda ben kapyo ki bi sukdu-i sato Ye ne e? Semda nggiwa ben ye gato gro ndu gro ndo satu mó e?”

Ye Yahudi bariwa Yefun Yesus

²² Mo kota Yerusalem ye Yahudi konwa kam sye dik yo o. Su kam sye ne ye Yahudi napawa kam gato án konwa Yefun Allah bi nu su ketke. Sugane aina gato nden dek.

²³ Yé konwa kam sye ne sa, Yefun Yesus mubot Yefun Allah bi nu de, mo pe gato gum do, Salomo bi Nusyari.

²⁴ Yefun Yesus mu mone sa, ye Yahudi mwa ti wairi wa Yefun, ete án ndo mo Yefun Yesus do, ”Men bi sukjimnut we subot Nan, kam ot ete Nan ki rer subot Nan dakai wa men jam ne? Nan ki rer nai men jam et! Te Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men, bado?”

²⁵ Yefun Yesus ki nai án do, ”Ji ki nai nin mó re. Sarewo nin bariwa nin jammo Ji bi sukdu-i. Suk gato Ji ben ne, Ji bi Ai syogat Ji ben. Sane suk gato Ji ben ne kadum nai nin do, Ji dakai anato tepsu Ye gato Ji ki ne.

²⁶ Sarewo nin bariwa nin jammo Ji, we nin yo tepsu Ji bi domba nde.

²⁷ Ji ké yo, Ji bi domba ne bere jamwa Ji. Ji jam domba ne, ete domba ne simo Ji.

²⁸ Ji mewa domba ne subere domba mbau to kapyo mato kapyo, domba ne yo ges mo bot gesyos nde. Ye yi yo nggiwa nai Ji bi domba wé kadit Ji nde.

²⁹ Ji bi Ai gato syo domba ne nai Ji, An sa gum kok sye wai o re. Ye yi yo nggiwa nai domba ne wé kadit Ji bi Ai nde.

³⁰ Ji si Ji bi Ai tepsu dik.”

³¹ Sane ye Yahudi nai jok wa án am Yefun Yesus su o re.

³² Sarewo Yefun Yesus ki nai án do, ”Ji bi Ai syogat Ji ben suk mwa gato ndo, gato ben nje yeket, suk gato yetu yo nggiwa ben ne nde. Kwa u anato ben nin maskwa anato nin am Ji su jok ré ne?”

³³ Ye Yahudi ki nai Yefun Yesus do, ”Men am Nan su jok mo sukndo mwa gato Nan ben ne nde, wo Nan kiket Yefun Allah gum ibit anato men am Nan su jok ré. Nan yetu sor re, ete Nan bes Nan nggwa kok teker, Nan ki do, Nan anato tepsu Yefun Allah, sane anato men am Nan su jok it anare.”

³⁴ Or o Yefun Yesus ki nai án do, ”Mo Yefun Allah bi sukdu gato yé krom wa nin, yé krom sare do: Yefun Allah ki do, ’Nin, ye Yahudi bi yekwesu ne anato tepsu yefun.’

³⁵ Sane men yo win Yefun Allah bi sukdu ne nde. Sukdu ne kwop mone it. Tomgato nyim ne ye gato Yefun ki bi sukdu-i nai ne, Yefun Allah ki do, án anato tepsu yefun.

³⁶ Sane Ji anato yefun digane dom. Ji anato yefun sor nde, wo Ji anato Yefun Allah bi Gan gato Yefun Allah bes ete syogat ma mo bur ré re. Sane ben sa u anato nin ki do, Ji kiket Yefun Allah gum ibit mone ne? Ji ki sukdu ne sangge sor.

³⁷ Ji yo ben suk tepsu Ji bi Ai syogat Ji ben ne nde yo, nin misyar Ji bi sukdu-i sor.

³⁸ Sarewo Ji ben suk tepsu Ji bi Ai syogat Ji ben ne, sane nin onyar kem mo Ji mo suk gato Ji ben gato ben nje yeket ne. Kapre nin bariwa nin jammo Ji bi sukdu-i, nin onyar kem mo Ji mo suk gato Ji ben ne sor. Sane bere nin jam kom mo mit do, Ji bi Ai si Ji tepsu dik. Ji dom, Ji si Ji bi Ai tepsu dik.”

³⁹ Ye Yahudi werwa án but Yefun Yesus ware, Yefun Yesus titi fro wé kadit án.

⁴⁰ Yefun Yesus satu mu mo Syur Yordan deta, An mu mo nat gato Yohanes ras nje mo syur su ketke. Yefun Yesus kem mone.

⁴¹ Yé mwa ma ku An, ete yé mwa ne ki do, ”Yohanes yo ben suk yo gato ben men yeket bor mo nde, sarewo suk mwa ne sino gato Yohanes kibot Yefun Yesus ne sa, sangge.”

⁴² Orete yé mwa mone nai sukjimnut dik do, án onyar kem mo Yefun Yesus.