Yakobus 3 - Abun Scripture

Sukdu subot men yetu syokwet

¹ Ji bi nji, ji bi nyanggon, nin iwa nin ben suk tepsu yeguru nde, we nin jam do, men yé gato tepsu yeguru bere Yefun Allah ndobot an wai kadit ye yi neya.

² Men sino ben sukibit ket kwayo-kwayo mó, wo ye gato mewa an syokwet, ete ki sukdu gato ibit mo nde yo, ye ne ben suk mwa ne ndo sino, an ye gato mewa an nggwa sisu ndo.

³ Men nut subot suge gato gum do kuda et. Men do bok sukwokgan mo kuda syokwet, ete men tik su jamtu it yo, bere kuda kaim ne sino brek mu mo pe gato men iwa men mu mone, kuda ne jammo men ne.

⁴ Men nut subot kapal dom et. Kapre kapal ne sye ete nobu krat ti mó ete gwat mu, kapal sye bi kemudi gato wokgan yi ne gwat kapal mu mo pe gato ye gato jowa kemudi ne iwa mu mone.

⁵ Sane dom, men syokwet ne sukwokgan yi mo men kaim, sarewo sukwokgan ne ki bi sukdu-i gato men bes men nggwa kok su ne. Sane dom, men nut subot bot wokgan et. Bot gato git nden sye ne or ma kadit bot wokgan yi.

⁶ Men syokwet dom tepsu bot. Mo men kaim ne, men syokwet anato i-ke mo sukibit gato men ben ne. Tepsu bot wokgan bere git nden sye or, men syokwet dom ben men ibit or re. Men syokwet anato tepsu bot gato ma kadit bot gesyos, sane men syokwet ben suk mwa gato men ben ne ibit.

⁷ Men yetu sa, tan suge wis mwa ne sino. Men tan suge krok gato muket bur sato nok e ne; men tan suge gato ok sato ndam e ne; men tan suge gato rut su on bet sato kwis e ne; men tan suge mo syur si sem sato boge e ne sino mo re.

⁸ Men yetu da tan suge mwa, sarewo yetu gato nggiwa tan an syokwet yo mo nde. Men mewa men syokwet kadit men ki sukibit, bere yé teker wa men. Men syokwet ne bi ri mwa mó sato kwis gato jau men yetu ete men kwop su re.

⁹ Men un men bi Ai, Yefun Allah gato men bi Yekwesu ne su men syokwet, sarewo men dufo mo yetu gato Yefun ut tepsu Yefun dakai ne. Men dufo mo yetu gum ibit su men syokwet ne dom re.

¹⁰ Kadit men syokwet dik ne men un Yefun si men kabor ye yi sino. Ji bi nji, ji bi nyanggon, men un si kabor nje sino su men syokwet sane nde.

¹¹ Syur gato ndo si syur gato ibit yo syesyar kadit syur gro dik nde re.

¹² Ji bi nji, ji bi nyanggon, kwe mbrus yo syesyar wai bo-i nde. Wai yo syesyar fot bo-i nde re. Sane dom syur gro gato ibit yo syesyar syur gato ndo yo mo nde. Sane men un si men kabor nje sino su men syokwet nde.

Yefun Allah mo gu nim ne kak men bi sukjimnut ko

¹³ Mo men ré, te je u anato jam suk mwa ne? Je u anato bi sukjimnut ko ne? Ye gato bi sukjimnut ko ete jam suk mwa mó it yo, an ben an bi suk-i ne ndo sor. An nutbot sukndo gato an ben ne sisu ndo, an bes an nggwa kok su nde. Sane bere ye jam do, sangge, an jam suk mwa re.

¹⁴ Wo ye gato ki do an jam suk mwa, ete an on sa ket ye yi mo suk mwa gato ye ne ku wai kadit an, si an on sa ket ye yo gato gum yepasye, we an iwa an gum yepasye dom et, suk gato an ben ne siri kadit Yefun Allah bi sukduno gato sangge ne, sane an mit at mo suk mwa gato an jam ne nde.

¹⁵ Suk mwa gato an jam ne yo ma kadit Yefun Allah nde, wo sukjimnut ne ma kadit bur ré bi suk-i, kadit an dakai bi sukjimnut-i, kadit biris bi yekwesu bi sukjimnut-i ne re.

¹⁶ Ye nutbot ye dakai sor re, ete ye on sa ket ye yi mo suk mwa gato ye yi ku wai kadit an ne yo, bere ye ben sukdaret, bere sukibit mwa ne sino bor mone.

¹⁷ Sarewo ye gato Yefun Allah kak bi sukjimnut ko wa jam suk mwa ne bere ben bi suk-i sare do, kwa gato sye wai anato an ben an bi suk-i ndo petok sor, kwa gato ibit yo mo nde. Sane dom, an werwa subere an si ye yi kem ndo su yu sino, an ben an bi suk-i njep, an nutbot ye yi bi sukdu-i, an dakai jimnotku ye yi sye wai o re, an ben suk mwa ne ndo sino bor mone, an ben an bi suk-i su yé mwa ne tepsu yu, an ben suk tepsu suk gato an ki ne.

¹⁸ An ben an bi suk-i tepsu yegweswai gato iwa yetu mwa ne kem ndo su yu. Tepsu ye jan sukjan gro ete bere sugit bor mone, an werwa os yetu kem ndo su yu anato ri ma suk mwa gato ndo bor mone.