Roma 10 - Abun Scripture

¹ Ji bi nji, ji bi nyanggon, ji mit iwa ji bi wis-i, ye Israel ne, kem ndo to kapyo mato kapyo. Ji ki suk su Yefun Allah sisu sangge wa ji bi wis-i ne sor.

² Ji ki rer subot ji bi wis-i ne do, sangge, ji bi wis-i mit iwa ben suk wa Yefun Allah. Án da mit iwa ben suk wa Yefun Allah, sarewo án bi sukjimnut yo kak mo suk gato Yefun Allah iwa án ben ne nde tó re.

³ Án jam nde os ndo gato Yesus Kristus kak wa án sok mo Yefun bi rus-i, wo {ye Israel gato ye kendo gum yo o do, ye Yahudi}, án dakai fro án dakai bi os-i Án nut do án benbot ye Yahudi bi sukduno-i sa, bere Yefun nai án gum sok mo bi rus-i sor re. Án dakai fro án dakai bi os-i sane anato án yo jammo os gato Yefun Allah fro ne nde.

⁴ Yefun Allah fro bi os-i anato Yefun Allah bi Yesus Kristus ma mo bur ré. Yesus Kristus ma fro os gato tara kadit ye Yahudi bi sukduno-i. Sane su ré, men ku os wa men gum sok mo Yefun Allah bi rus-i mo os ndo gato Kristus kak ne sor re. Os nyim gato ye benbot ye Yahudi bi sukduno-i ne yo tep o nde. Kristus ma kak os be subere ye gato onyar kem mo Yesus Kristus sa, bere Yefun Allah nai ye ne gum sok mo An bi rus-i mone.

Yesus Kristus kak os ndo wa men yetu sino

⁵ Musa krom do, ye gato benbot ye Yahudi bi sukduno-i subere Yefun Allah nai án gum sok mo Yefun bi rus-i. Yé ne benbot sukduno mwa ne sino sor, kwa yo gwet mo nde, sane sa, bere Yefun Allah nai án gum sok mo An bi rus-i ne.

⁶ Sarewo ye gato onyar kem mo Kristus, ete mone Yefun Allah ki mo ye ne do, án sa, tep wa Yefun nai án gum sok mo Yefun bi rus-i ne yo, yé ne yo meret os yi yo o wa án sok mo Yefun bi rus-i o nde, we Yesus Kristus ma kak os ne it. Yefun Allah bi sukdu ki sare do, ”Nan ndobot nan mit do, ’Je u anato it mu mo gu wa meret ye yo ma kak os wa men ne?’ Sane bere siri re.” (Men ndobot sane bere bi sukjimnut do, men werwa kar Kristus is ma mo bur wam dik yo o anane, sarewo Kristus is ma mo bur ré, An kak os ndo wa men mó re.)

⁷ Sane dom, ”Nan ndobot mo nan mit do, ’Je u anato is mu mo gwinggri syo mo bur desnak wa meret ye yo ma kak os wa men ne?’ Sane bere siri re.” (Men ndobot sane bere bi sukjimnut do, men werwa sun Kristus satu kadit sukkwop anane. Sarewo Kristus sun kadit sukkwop, An kak os ndo wa men mó re.)

⁸ Sarewo men yé gato simo os ndo gato Kristus kak ne, men ki sare do, ”Sukdu subot Kristus ne ma kom mo nin it, nin ki subot sukdu ne petok sor, nin grem sukdu ne pe mo nin mit mó re.” Sukdu gato men ki frekbot nin anato nin onyar kem mo sukdu subot Yesus Kristus sor.

⁹ Nin do ki rer su nin mit dik sare do, Yesus Kristus anato tepsu nin bi Yekwesu, ete nin bi sukjimnut dik mo nin mit do, sangge, Yefun Allah sun Yesus Kristus kadit sukkwop, sane it yo, Yefun Allah nai nin gum sok mo An bi rus-i wé kadit bot gesyos ne it, bere nin kem ndo to kapyo mato kapyo.

¹⁰ Men mit si men onyar kem mo Yesus Kristus, sane Yefun Allah nut mo men do, men sa, men gum tep wa sok mo An bi rus-i it. Sane dom, men ki rer si men mit dik do, Yesus Kristus anato tepsu men bi Yekwesu it yo, bere Yefun Allah nai men wé kadit bot gesyos, subere men kem ndo to kapyo mato kapyo.

¹¹ Tepsu ye krom mo Yefun Allah bi sukdu do, ”Ye gato kwabom kam mo Yefun, bere ye ne damen nde, wo bere an ku suk gato Yefun fro ne re.”

¹² Os dik ne sor re, yewis mwa mo bur ré or sino, ye Yahudi, si yewis yi mwa ne sino, bi os wa sok mo Yefun bi rus-i ne tepsu yu re, os gato tara yo mo nde. Kristus anato Yekwesu wa yetu mo yewis mwa ne sino gato onyar kem mo An. Yetu mo yewis mwa ne sino gato ndekwa Kristus ós án bere Kristus ben sukndo su ye ne re.

¹³ Tepsu ye krom mo Yefun Allah bi sukdu do, ”Yé mwa ne sino gato ndekwa Yefun nai án wé kadit sukye it yo, bere án kem ndo to kapyo mato kapyo re.”

¹⁴ Sarewo ye gato yo onyar kem mo Kristus nde tó, bere ye ne ndekwa Yefun Allah ós an sa u ne? An yo ku os nde. Sane dom ye gato jam sukdu subot Kristus nde tó, bere an onyar kem mo Kristus sa u ne? An yo ku os nde. Sane dom, ye yo mu ki sukdu ne nai an nde tó, bere an jam sukdu subot Kristus sa u ne? An jam nde.

¹⁵ Ye syogat nje mu ki sukdu ne nde tó, bere ye ki sukdu subot Kristus nai nje jam sa u ne? An jam sukdu mo nde. Ye krom mo Yefun Allah bi sukdu subot ye gato gwat sukdu ne do, ”Yé mit iwa ye gato ma ki sukdu subot os ndo gato Yefun Allah fro ne ma ku án et.”

¹⁶ Sarewo yé mwa ne sino yo mit iwa jambot sukdu subot os ndo gato Yefun Allah fro ne nde, tepsu Yesaya ki do, ”Men bi Yekwesu o! Je u anato onyar kem mo sukdu gato men ki ré ne?”

¹⁷ Sane anato yé mu ki sukdu subot os ndo gato Yesus Kristus kak ne, bere yé jam sukdu subot Kristus re. Yé jam sukdu subot Kristus, sane bere yé ku os wa ye onyar kem mo Kristus mone.

¹⁸ Sarewo ji ndo mó do: Sangge, ye Israel jam sukdu subot os ndo ne nde tó bado? Nde re, án jam it, we ye krom mo Yefun Allah bi sukdu do, ”Yé ki sukdu ne frekbot bur ré iwedewe it. Án bi sukdu-i ne kas kom mo pe mwa ne or sino re.”

¹⁹ Ji ndobot o do, ye Israel jam sukdu subot Kristus ne ri re, bado nde tó, e? Ye Israel ne da jam, sarewo án bariwa jammo sukdu ne, wo yewis yi sor ete iwa jammo. Musa ki subot suk gato bor mo yewis yi suga nyim ne. Musa krom sukdu gato Yefun Allah ki nai ye Israel sare do, ”Yewis yi neya gato nin nut do ye jam nde gum ne, bere Ji ben nin maskwa ket yewis yi ne mo os ndo gato Ji fro wa án ne. Bere Ji ben nin maskwa ket yewis yi gato nin nut do jam suk nde.”

²⁰ Sane dom, Yesaya waii krom suk gato Yefun ki ne nggi o sare do, ”Yewis yi yo syeret Ji nde, wo yé mwa ne ku Ji it. Ji kadum Ji nggwa nai ye gato yo meret Ji nde re.”

²¹ Sarewo Yesaya krom sukdu gato Yefun Allah ki subot ye Israel ne dom sare do, ”Noru nombrak Ji eswa án, yewis dik gato su krat ne, Ji eswa án, yewis gato bariwa jammo Ji, subere án satu ma wa si Ji kem ndo ware, án yo ma nde.”