Matius 28 - Abun Scripture

Yefun Allah sun Yefun Yesus kadit sukkwop

¹ Ye Yahudi bi kam sye ne or, kam Ari, bundugan, Maria Magdalena si Maria yi ne, an we mu me makwe ne.

² Nggon we ne kom mone sa, nggon we gensu sui juwai bur ndo nde, ete Yefun Allah bi malaikat dik yo is ma kadit gu. Orete malaikat wop jok gato kewa jokwak syo ne wé kadit jokwak ne, ete malaikat ne kem mo jok ne yu.

³ Malaikat ne de gwem rup-rek sato nowarek, an bi san ne kwo ru ges.

⁴ Yesukmise gato mewa makwe ne sokme malaikat ne sa, án nyu ndo nde, sane sor án tetet, orete án kaim rere, án tepsu ye gato kwop re.

⁵ Malaikat ne ki nai nggon we ne do, ”Nin nyu nde. Ji jam do, nin meret Yefun Yesus gato ye mban mo kwesukwin ne, sarewo

⁶ An yo more nde, An mbau re, An sun re, saga nyim neya An dakai ki nai nin jam. Nin ka we dakai ma me nat gato ye grem An mukri mone.

⁷ Su ré, nin ka we mu kekro. Nin ka we ki nai Yefun bi pakon ne do, ’Yefun Yesus sun re. An mu nyim mo bur Galilea. Nin sino mu sakanwa An motu.’ Nin ka we napawa suk gato ji ki ré sisu ndo et.”

⁸ Sane nggon we ne mu kekro kadit makwe ne. Nggon we ne nyu ndo nde, sarewo nggon we mit iwa suk gato nggon we me ne, ete nggon we kas mu ki napyo nai Yefun Yesus bi pakon ne jam.

⁹ Nggon we ne kas mu sa, nggon we ne gensu Yefun Yesus ma ku nggon we, ete Yefun Yesus ki do, ”Ndo mo nin ka we.” Nggon we ne ma karowa Yefun Yesus ete syimtok An gwes tak, orete nggon we un An.

¹⁰ Yefun Yesus ki do, ”Nin nyu nde. Nin mu ki nai Ji bi pakon ne do, pakon ne mu sakanwa Ji mo bur Galilea. Bere án ku Ji motu.” Sane nggon we ne mu.

Sukdu kadit yesukmise gato mewa makwe ne

¹¹ Nggon we ne do mu saresa, yesukmise gato mewa makwe ne ge bok yo mu mo kota Yerusalem re. Yesukmise bok ne kibot suk mwa gato án me bor mo makwe ne nai yekwesú mo Yefun Allah bi nu jam.

¹² Yekwesú mo Yefun Allah bi nu ne si ye Yahudi bi yepasye sum wa kibot sukdu ne sa, án fro sukdu su yesukmise ete syo sugum mwa nai yesukmise ne.

¹³ Orete án ki nai yesukmise do, ”Nin ki sare do, ’Noru miten ne, men sem mit saresa, Yesus bi pakon ma syimsi An mukri ete gwat mu re.’

¹⁴ Bere men frot koita nai yekwesu gato gum gubernur. Men bidek an subere nin yo ku sukye mone nde.”

¹⁵ Sane yesukmise gwat sugum ne, ete ki bi sukdu-i tepsu suk gato yepasye ne ki ne. Sukdu gato ye ki do, Yefun Yesus bi pakon mu syimsi An mukri ne, yé ki frekbot ye Yahudi bi nat-i mwa ne sino kom mo kam ré re.

Yefun Yesus kadum nggwa nai bi pakon

¹⁶ Yefun Yesus bi pakon ge musyu dik sop dik mu mo bur Galilea. Án mu mo bobuk mo pe gato Yefun Yesus syogat án mu mone.

¹⁷ Án ku Yefun Yesus mone sa, án un Yefun Yesus, sarewo án ge bok yo mit we, ge bok ne nutbot do, sangge, Yefun Yesus dakai anare bado?

¹⁸ Orete Yefun Yesus ma karowa pakon ne, ete An ki do, ”Yefun Allah bes ji gum tepsu Yekwesu mo gu nim si bur ré sino.

¹⁹ Sane nin mu mo yewis mwa ne sino mo bur ré iwedewe, ete nin duno nje subere yé ne tepsu Ji bi pakon, ete nin ras nje ne mo syur sisu men bi Ai, Yefun Allah gum, sisu Yefun Allah bi Gan gum sisu Yefun Allah Gen gum ne sino et.

²⁰ Nin duno nje ne subere yé ne benbot suk mwa ne sino gato Ji syogat nin ben ne. Nin jammo suk gato Ji ki ré et, nin mu duno nje yo, bere Ji sisu nin petok sor kom mo kapyo mato kapyo.”