Matius 27 - Abun Scripture

Yé gwat Yefun Yesus mu ku Pilatus

¹ Nosoro gan, yekwesú mo Yefun Allah bi nu bok yo si ye Yahudi bi yepasye kibot Yefun Yesus, orete án nai sukjimnut dik wa gu Yefun Yesus kwop wé.

² Yekwesú si yepasye ne syogat ye rai Yefun Yesus krat ete ye gwat mu ku Pilatus, we sugane Pilatus gum yekwesu wa pemerintah ye Roma mone.

Yudas gu nggwa

³ Yudas, yeketut ne, jam do, yekwesú si yepasye ne syokom ye gu Yefun Yesus kwop sa, an nutbot sukibit gato an ben nai Yefun Yesus ne ndo nde sane sor an kaim rere su. Orete an gwat sugum perak det musyu gri ne mu satu, an syo nai yekwesú mo Yefun Allah bi nu si ye Yahudi bi yepasye.

⁴ Ete an ki do, ”Ji ben sukibit it! Ji meret os wa gwat yeko ma wa but Ye gato ben sukibit yo mo nde, anato su ré, yekwesú syokom ye gu An kwop.” Yekwesú mo Yefun Allah bi nu ki nai an do, ”Men yo nutbot nan su nan bi sukdu-i nde. Nan dakai fro koita ne sor.”

⁵ Sane Yudas am sugum ne mo Yefun Allah bi nu mit, orete an mu kadit nu ne. An mu ete kok an nggwa su jamtu mo nden, ete an kwop.

⁶ Yekwesú mo Yefun Allah bi nu nai sugum ne ete ki do, ”Sugum ré tepsu kousukem anare, sane men bok tó Yefun Allah bi nu bi sugum-i ne nde, men bi sukduno duyawa re.”

⁷ Sane yekwesú kibot, orete án nai sukjimnut dik wa án so bur det gato ye kendo gum do, ”Ye gato ben sukbo kadit bur er ne bi bur det-i.” Bur det ne ye fro tepsu makwe wa yedamok gato kem mone.

⁸ Sane kom mo kam ré ye kendo nat ne gum do, ”Bur Kousukem.”

⁹ Sane suk gato yenabi Yeremia ki ne bor mone. Yeremia ki do, ”Ye gwat sugum perak det musyu gri tepsu sugum gato ye Israel fro wa án bi wa Yefun.

¹⁰ Orete ye so bur det su sugum ne. Ye so yé gato ben suk su bur er ne bi bur det-i, tepsu Yefun syogat ji ben re.”

Pilatus ndobot Yefun Yesus

¹¹ Yé gwat Yefun Yesus mu ku Pilatus gato gum yekwesu mo pe ne sa, Pilatus ndo mo Yefun Yesus do, ”Nan anato ye Yahudi bi Yekwesu bado?” Yefun Yesus ki do, ”Suk gato nan ki ne sangge.”

¹² Sarewo yekwesú mo Yefun Allah bi nu si ye Yahudi bi yepasye ne ndak Yefun Yesus ket kwayo-kwayo ware, Yefun Yesus yo ki suk yo o nde, An not sor.

¹³ Sane Pilatus ndo mo Yefun Yesus do, ”Nan jam suk bok gato yé ndak Nan su ne bado, nde, e?”

¹⁴ Sarewo Yefun Yesus yo ki suk yo mo nde, An not sor. An yo ki sukdu wokgan yo dom nde. Sane Pilatus yeket ndo nde.

Pilatus syokom yé gu Yefun Yesus kwop

¹⁵ Kam Sye Waiket, sagana Pilatus sombok yetu ge dik yo wé kadit sel tepsu yé mwa ne imo.

¹⁶ Sugane yekweke bi yesu wa syun ye Roma wé kadit ye Yahudi bi bur det-i, an kem mo sel, an gum do Yesus Barabas.

¹⁷ Sane yé mwa sum mone sa, Pilatus ndo mo án do, ”Nin iwa ji sombok je u wé kadit sel wa nin ne? Ji sombok Yesus Barabas bado, ji sombok Yesus gato ye kendo gum yo o do, Kristus ne, e?”

¹⁸ Pilatus kiwa an sombok Yefun Yesus wé sane, we an jam do, yekwesú mo Yefun Allah bi nu ne syo Yefun Yesus mo an syim, we yekwesú ne on sa mo gato yé mwa ne iwa Yefun Yesus wai kadit yekwesú ne, bergan yekwesú bi sukdu-i yo git o nde.

¹⁹ Pilatus kem ga mo nat gato sagana an kem wa an ndobot nje mone saresa, an bi nggon taru ma nai an do, ”Nan kibot Ye gare o nde. An yo ben sukibit yo mo nde. Nan misyar sor, we noru gado ji semda ku An, ete suksemda ne ben ji sane sor ji nutbot ndo nde.”

²⁰ Sarewo yekwesú mo Yefun Allah bi nu si ye Yahudi bi yepasye wergat yé mwa mone subere yé jammo yepasye ne bi sukdu, ete yé kiwa Pilatus sombok Barabas wé, wo Pilatus syokom ye gu Yefun Yesus kwop sor.

²¹ Pilatus ndo mo nje ne o do, ”Kadit yetu ka we ré, je u anato nin iwa ji sombok wé wa nin ne?” Yé mwa ne ki do, ”Barabas.”

²² Pilatus ndo mo án o do, ”Sane bere ji ben suma su Yesus gato ye kendo do Kristus ne?” Án ki do, ”Nan mban Ye ne mo kwesukwin sor!”

²³ Pilatus ndo o do, ”Wa suma ne? An ben sukibit sato suma ne?” Sarewo yé mwa ne bariwa jammo Pilatus bi sukdu-i ne. Yé mwa ne saiye nggi o do, ”Nan mban Ye ne mo kwesukwin wé sor!”

²⁴ Pilatus nutbot do, an yo ku os o nde, we bergan yé mwa mone maskwa ete saiye daret. Sane an nai syur, an mus an syim mo yé mwa ne gwem, ete an ki do, ”Nin dakai gu Ye ré kwop sor, ji yo sok mone nde.”

²⁵ Yé mwa mone ki do, ”Men gu Ye ne kwop yo, men si men bi rus mwa ré sino dakai sam Ye ne bi kwede ne sor.”

²⁶ Orete Pilatus sombok Barabas wé tepsu yé mwa kiwa ne, ete Pilatus syogat an bi yesukmise kwam Yefun Yesus, ete gwat Yefun Yesus mu mban mo kwesukwin.

Yesukmise siker Yefun Yesus

²⁷ Pilatus bi yesukmise ne gwat Yefun Yesus mu sok mo Pilatus bi nu sye mit ne, ete án kendo yesukmise mwa ne sino gato ben suk mo nu ne ma sum wairi wa Yefun Yesus.

²⁸ Yesukmise ne jogru Yefun Yesus bi san, ete án it san er mo Yefun Yesus, {san er gato sagana ye Roma bi yekwesu it ne}. Yesukmise siker Yefun Yesus anane.

²⁹ Án nai kweran gato jak mó, ete án far kweran ne bot yu tepsu bumam, ete án bom mo Yefun Yesus su. Án syo kwepu wa Yefun Yesus jom mo Yefun syim ge, orete án tu án umsu mo Yefun Yesus gwem, ete án siker Yefun Yesus. Án kamo su Yefun Yesus, ete án ki do, ”Ye ré ye Yahudi bi Yekwesu anare. Men bes An gum kok et.”

³⁰ Án sukut tom Yefun Yesus, ete án nai kwepu ne, án gwa Yefun Yesus su sú kwepu ne wam bok yo.

³¹ Án kamo su Yefun Yesus, or án jogru san er ne kadit, ete án it Yefun Yesus bi sansun ne satu mo Yefun Yesus. Orete án gwat Yefun Yesus mu nden wa án mban mo kwesukwin.

Ye mban Yefun Yesus mo kwesukwin

³² Yesukmise bok ne gwat Yefun Yesus mu kom mo os mit saresa, án ku yetu ge dik yo. Ye ne ye Kirene gato gum do Simon. Án syaugat Simon sam Yefun Yesus bi kwesukwin ne.

³³ Án mu kom mo nat gato gum do Golgota gato bi sukjimnut do, ”Nat gato ka sa yekri subris.”

³⁴ Mone án nai nau anggur gato án fros su suk gato ndó, ete án syo nai Yefun Yesus da, subere ós Yefun kaim yo yó teker eta nde. Sarewo Yefun Yesus rim nau ne or sa, An bariwa An da.

³⁵ Sane yesukmise ne mban Yefun Yesus mo kwesukwin ne or sa, yesukmise ne tik bit wa án wat Yefun Yesus bi san su yu.

³⁶ Orete án kem ga, án mewa Yefun Yesus mone.

³⁷ Mo kwesukwin napnim ne, karowa Yefun Yesus su de nim, ye mban kwedet dik yo su sukdu gato ye ndak Yefun Yesus su ne, ye krom do, ”Yesus gato ye Yahudi bi Yekwesu anare.”

³⁸ Mone dom, ye mban yetu ka we gato syimsi suk, dik yo mo Yefun Yesus de syim ge, dik yo mo Yefun Yesus de syim jam.

³⁹ Yé gato waiket pe ne kabor Yefun Yesus, án bagriket Yefun Yesus ete án juwai án su,

⁴⁰ ete án siker Yefun Yesus do, ”Nan gato ki do, Nan tarak Yefun Allah bi nu, ete Nan nggo or satu su kam gri rek, sane yo, Nan dakai sombok Nan nggwa wé kadit sukye gato Nan ku ré et. Nan anato Yefun Allah bi Gan su sangge yo, Nan is kadit kwesukwin ne et.”

⁴¹ Orete yekwesú mo Yefun Allah bi nu e, yeguru agama si ye Yahudi bi yepasye ne siker Yefun Yesus su sukdu sane dom.

⁴² Án ki nai yu do, ”An sombok ye yi kadit sukye gato ye yi ku ne, wo An yo nggiwa An sombok An dakai nde. An ye Israel bi yekwesu su sangge it yo, An is kadit kwesukwin ne et, sane bere men jammo An.

⁴³ An onyar kem pe mo Yefun Allah, ete An ki do, ’An anato Yefun Allah bi Gan,’ sane yo, Yefun Allah iwa nai An wé kadit kwesukwin ré bado, nde, e? Men me mó et.”

⁴⁴ Ye we gato syimsi suk gato yé mban mo Yefun Yesus de ne, an we kabor Yefun Yesus ket kwayo-kwayo dom sane.

Yefun Yesus kwop

⁴⁵ Yé mban Yefun Yesus mo kwesukwin mone sa, ndendu kewa pe ne sino kadit kam ti ri sor kom mo kam dek.

⁴⁶ Kam dek, jam gri, ete Yefun Yesus saiye su a Ibrani do, ”Eli, Eli, lama sabakhtani?” gato bi sukjimnut do, ”Ji bi Ai, Yefun Allah, Ji bi Ai, Yefun Allah, Nan misyar Ji wa suma ne?”

⁴⁷ Yé mwa mone jam suk gato Yefun Yesus ki ne sa, án ki nai yu do, ”An kendo Elia ma wa ós An anane.”

⁴⁸ Sugane it yetu ge dik yo kas mu nai suk gato yé tik syur su tepsu san det. An ras mo nau anggur gato muk, ete an dú mo kwekoi naprut, eteyo an syo su mu nim mo Yefun Yesus mip nap, wa Yefun da subere ós Yefun nggi wokgan yo o.

⁴⁹ Ye yi bok yo mone ki do, ”Men ben suk yo su An nde tó yei, men me mó et. Te Elia ma wa sombok An wé kadit kwesukwin bado?”

⁵⁰ Orge Yefun Yesus saiye nggi wam dik yo o sa, An mas bok it, An Gen satu mu mo bi Ai.

⁵¹ Yefun Yesus kwop sa, san det gato yé kok mo Yefun Allah bi nu mit gato kewa Yefun Allah bi gumwak fo ne, san det ne brer kadit nim mu kom mo bur. {Sane yé mwa ne ku os wa sok mo gumwak fo ne wa ku Yefun Allah it, ye yo mitmo yesu gato ben suk mo Yefun Allah bi nu tepsu yegweswai o nde.} Yefun Yesus kwop sa, sui juwai bur, jok gato mo banbo ne det.

⁵² Makwe bok ne kak, orete ye gato onyar kem mo Yefun Allah ne, gato kwop nyim ne, ge bok yo sun, mbau satu o re.

⁵³ Yefun Yesus sun kadit sukkwop, or eteyo, yé bok ré waii mu kadit makwe ne mu mo Yerusalem, án kadum nggwa nai yé mwa mone.

⁵⁴ Sane ye Roma bi yesukmise si bi yesu gato mewa Yefun Yesus me sui juwai bur si suk mwa gato bor mone sa, án nyu ndo nde, án yeket, ete án ki do, ”Sangge, Ye ré anato Yefun Allah bi Gan sor.”

⁵⁵ Mone nggon ge bok yo kem os syu kadit, nggon ne ndarwa Yefun Yesus dom. Nggon ne simo Yefun Yesus kadit bur Galilea, án ben suk wa ós Yefun.

⁵⁶ Nggon ne deyo gum do, Maria gato bi nat mo Magdala, si Maria gato Yakobus si Yusuf bi im, si Zebedeus bi nggon.

Ye bi Yefun Yesus mukri mo jokwak mit

⁵⁷ Kam bok, kre, ete ye Yahudi bi yepasye ge dik yo ma ku Pilatus. Yepasye ne gum do Yusuf, an bi suk mwa, an ontu mo kota Arimatea. An simo Yefun Yesus dom.

⁵⁸ An ma ku Pilatus sa, an ndekwa Yefun Yesus mukri. Orete Pilatus syogat bi yesukmise ne si Yusuf mu nai Yefun Yesus mukri ne.

⁵⁹ Sane Yusuf si yesukmise ne mu nai Yefun Yesus mukri. An nai, ete an nggwot su san kwo det gato be.

⁶⁰ Orete an gwat Yefun Yesus mukri ne mu, an grem mo an dakai bi jokwak gato an fro sim mo bobuk jok ne mit. Yusuf grem Yefun Yesus mukri mo jokwak mit or, an wop jok sye dik yo ma an grem kewa jokwak syo, ete an mu kadit re.

⁶¹ Yusuf yo mu kadit pe ne nde tó, Maria gato ma kadit Magdala si Maria dik yo o {gato Yakobus si Yusuf bi im ne}, nggon we ne ma kem tak jokwak syo mone.

Yesukmise gato mewa makwe

⁶² Ye fro suk wa kam sye ne or, bi ik, ye Yahudi bi kam sye, ete yekwesú mo Yefun Allah bi nu si ye Farisi mu ku Pilatus.

⁶³ Yekwesú mo Yefun Allah bi nu si ye Farisi ne ki do, ”Yenggras, men napakom yekidar gane kem mo bur ré tó, An ki do, ’Kam we rek, ete Ji sun wé kadit sukkwop.’

⁶⁴ Sane nan syogat yesukmise mewa makwe ne sisu ndo kom mo kam we rek et, sawe bere An bi pakon ne ma syimsi An mukri, ete ki nai nje do, Yefun Allah sun Ye ne kadit sukkwop re. An bi pakon do ben sane yo, bere sukkidar wari ré sye wai kadit sukkidar gato nyim ne o re.”

⁶⁵ Pilatus ki nai án do, ”Yesukmise anare, nin dakai si án, eteyo nin fro án subere án mewa makwe ne krat sisu ndo sor.”

⁶⁶ Sane yekwesú si yepasye ne sino mu mo jokwak, ete án grem suk yo wa ós jom jok sye gato ye grem wa jokwak syo ne subere krat. Orete án fro yesukmise ne mewa makwe ne noru nombrak sor, subere ye yo ma ben suk yo mone nde.