Matius 15 - Abun Scripture

Ye Yahudi bi amui bi sukduno

¹ Ye Farisi ge bok yo si yeguru agama ge bok yo ma kadit Yerusalem mu ku Yefun Yesus, ete án sino ndobot Yefun do,

² ”Suma ben anato Nan bi pakon ben suk wai ket men bi amui bi sukduno-i ne? Án git sugit re, án yo mus án syim tepsu men bi amui bi sukduno-i ne nde.”

³ Yefun Yesus ki do, ”Suma ben anato nin ben siri kadit Yefun Allah bi sukduno-i subere nin jom nin bi amui bi sukduno-i ne?

⁴ Yefun Allah ki do, ’Nin jammo nin bi ai si nin bi im.’ Yefun Allah ki o do, ’Ye to dufo mo bi ai si bi im yo, bere nin gu ye ne kwop wé sor.’

⁵ Sarewo nin duno nje sare do, ye to ki nai an bi ai si an bi im do, ’Bere ji gwat ji bi suk mu, ji syo nai Yefun Allah tepsu suksom, sane ji yo ós nin ka we su suk ne nde.’ Sane nin yeguru agama duno nje do, ye ne gwat suk mwa ne tepsu suksom wa Yefun, ete an misyar an bi yenggras anato ndo.

⁶ Sane bere, an yo ós an bi ai su an bi suk nde. Sane nin jom nin bi amui bi sukduno-i ne krat re anato nin misyar Yefun Allah bi sukduno-i.

⁷ Nin gare, nin ki suk su nin syokwet sor re, wo nin mit tara re. Sukdu gato Yefun Allah tarubot Yesaya wa nin ne sangge, sare do,

⁸ ’Yefun Allah ki sare do: Yé ré un Ji su án syokwet sor re, wo án mit si án onyar tara kadit Ji re.

⁹ Án un Ji ware, án yo un Ji su án mit dik nde, we án duno nje su yetu bi sukduno-i, kadit Ji bi sukduno-i re.’ ”

Suk gato ben Yefun Allah bariket men yetu

¹⁰ Orete Yefun Yesus kendo ye Farisi si yeguru mone ma karowa An, ete An ki nai do, ”Nin syaretwa suk gato Ji ki ré sisu ndo subere nin jam et.

¹¹ Yefun Allah yo bariket men mo sugit gato men git ete ngga mo men syokwet ne nde, wo suk gato syesyar kadit men syokwet anato bere ben Yefun Allah bariket men mone.”

¹² Orete Yefun Yesus bi pakon ma ki nai An do, ”Nan jam do, ye Farisi maskwa mo suk gato Nan ki ne bado?”

¹³ Sane Yefun Yesus kibot Ye Farisi si bi sukdu-i sare do, ”Sukjan gato Ji bi Ai mo gu yo jan nde, bere An tik buk wé re.

¹⁴ Nin misyar ye Farisi ne. Yé bok ne tepsu yesu gato gro ndu. Ye gato gro ndu gwat ye yi gato gro ndu bot os yo, bere an we ne sino ges mo bur wak.”

¹⁵ Petrus ki do, ”Nan kibot sukamno subot sugit ne rer wa men jam et.”

¹⁶ Yefun Yesus ki nai án do, ”Nin jam sukamno ne bi sukjimnut ri nde tó bado?

¹⁷ Nin jam bado, nde e? Suk gato sok ket men syokwet, waii sok mo men ondim orete yo, bere syesyar mu nden wé re.

¹⁸ Wo suk gato syesyar kadit men syokwet ma kadit men mit si men onyar. Sukibit gato ma kadit men mit si men onyar bere ben Yefun Allah bariket men,

¹⁹ we sukibit gato ma kadit men mit si men onyar anato sukjimnut ibit gato ben men ben sukibit sato ré: men gu ye yi kwop e, men ben siri su nggon daret e, men syimsi suk e, men ndak nje su sukkidar e, men kiket yé yi e ne.

²⁰ Men ben suk bok gare anato bere Yefun Allah bariket men, wo sugit gato men git su men syim dum gato men yo mus nde yo, bere Yefun Allah yo bariket men mone nde.”

Nggon ye Kanaan ge dik yo kwabom kam mo Yefun Yesus

²¹ Yefun Yesus mu kadit nat ne, ete mu mo bur dik yo karowa kota Tirus si kota Sidon.

²² Nggon ye Kanaan gato kem mo bur ne ma ku Yefun Yesus ete saiye do, ”Yeraja Daud bi Dat o, Nan jimnotku ji et. Semda ben ji bi mam, semda jowa ji bi mam krat re, sane sor mom yo ndo o nde.”

²³ Sarewo Yefun Yesus yo ki sukdu kwa yo nai nggon ne nde. Sane Yefun Yesus bi pakon ma wergat Yefun do, ”Nan syogat nggon ne mu kadit men et, we mom boribot men ete saiye gat men petok sor, men bari it.”

²⁴ Sane Yefun Yesus ki do, ”Yefun Allah syogat Ji ma wa ye Israel gato muri kadit An ne sor re, wo Ji yo ma wa ós yewis yi su ré nde tó. Ye Israel ne ku sukye tepsu domba gato muri kadit ye gato mewa domba ne.”

²⁵ Yefun Yesus ki sane, or nggon ne ma tu an umsu mo Yefun Yesus gwem, ete mom ki do, ”Yenggras, Nan ós ji et.”

²⁶ Yefun Yesus ma wa ós Ye Israel sor re yei, sane An duyawa nggon ne, we mom an yewis yi, sane Yefun Yesus ki do, ”Ji nai pa wokgan bi sugit ete syo nai ndar, bere siri re.”

²⁷ Nggon ne werwa Yefun Yesus ós mom, sane nggon ne ki do, ”Sangge, Nan syo pa wokgan bi sugit nai ndar nde, wo bere ndar git sugit mwir gato ges kadit yenggras bi meja mo bur fe!”

²⁸ Sane Yefun Yesus ki nai nggon ne do, ”Mban! Pa donggon a, nan sa, nan kwabom kam mo Ji it! Sane suk gato nan ndek mo Ji bere Ji ben re.” Sugane it, nggon ne bi mam ge re.

Yefun Yesus ben yé mwa gato i ne ge re

²⁹ Yefun Yesus mu kadit nat ne ete muket Em Galilea de. Orete An it mo bobuk, An kem mone.

³⁰ Yé mwa ma sum mone, ete yé gwat ye gato gwes út e, ye gato gro ndu e, ye gato syim út e, ye gato dabe mbut e, ye gato syokwet mbut, si yé mwa yo o gato i ne, yé gwat ma mo Yefun Yesus gwem, or An ben yé mwa ne ge or re.

³¹ Yé me ye gato syokwet mbut, du sisu ndo satu e; ye gato syim út, syim ndo satu e; ye gato gwes út, mu ndo satu e; ye gato gro ndu, gro ndo satu o. Sane yo, yé mwa mone yeket ete un Yefun Allah, Yefun gato jom ye Israel ne.

Yefun Yesus syo sugit nai yetu ge ribu at

³² Yefun Yesus kendo An bi pakon ma, ete An ki nai do, ”Ji dakai jimnotku yé mwa more ndo nde. Án si men kem more kom mo kam gri rek it. Su ré, án bi sugit yo mo nde. Sane Ji yo syogat án mu satu nde tó, men syo sugit nai án git et, sawe án mu su án on de bere án mbrin mo os mit.”

³³ Orete Yefun Yesus bi pakon ndo mo Yefun do, ”More yetu yo kem mo nde, sane men nai sugit tep wa yé mwa ré mo u ne?”

³⁴ Yefun Yesus ki do, ”Nin bi roti koi ot ne?” Án ki do, ”Koi mufit, si boge wokgan ge bok yo.”

³⁵ Sane Yefun Yesus syogat yé mwa ne kem mo bur.

³⁶ Orete Yefun Yesus nai roti koi mufit ne si boge, ete An ki do, ”Ndo mo Nan, Yefun Allah wa sugit gato Nan syo nai men ré.” Orete An syat sugit ne, An syo nai bi pakon, ete pakon waii syo nai yé mwa mone git.

³⁷ Yé mwa ne git sor án sino on ge, orete pakon mubot nat ne sum sugit napta, ete án bok mo yu mufit ses.

³⁸ Yé gato git sugit mone, yebris ne ye newa kom mo yetu ge ribu at, wo nggon si pa ne, ye yo newa nde.

³⁹ Yefun Yesus syogat yé mwa ne mu, orete An it mo kwem mu mo bur Magadan.