Matius 10 - Abun Scripture

Yerasul ge musyu dik sop we

¹ Yefun Yesus kendo An bi pakon ge musyu dik sop we ne ma, ete An syo suktinggi nai An bi pakon ne subere pakon ne nggiwa syun semda ete ben yé mwa ne sino gato i ne ge re.

² Ye gato Yefun Yesus bes tepsu An bi yerasul gum do, ketke Simon (gato ye kendo do Petrus) sisu an bi nji Andreas, Yakobus sisu bi nji Yohanes gato yenggras Zebedeus bi gan we ne;

³ Filipus, Bartolomeus, Tomas, Matius gato nai sugum kadit nje wa pemerintah; Yakobus gato Alfeus bi pa, Tadeus;

⁴ Simon gato sok mo yekweke, si Yudas Iskariot gato ri ma meret os wa gwat yeko ma wa but Yefun Yesus.

Yefun Yesus syogat yerasul mu ben suk

⁵ Yefun Yesus bi pakon ge musyu dik sop we ré, Yefun Yesus syogat mu ben suk, An ki nai pakon ne do, ”Nin mubot yewis yi neya bi bur-i nde. Nin mubot kota mo bur Samaria dom nde,

⁶ wo nin mubot ye Israel. Ye Israel anato tepsu domba gato muri.

⁷ Nin mu yo, nin kibot Ji bi sukdu do, ’Yefun Allah ma jowa men tepsu men bi Yekwesu it anare!’

⁸ Nin ben ye gato i ne ge. Nin sun ye gato kwop ne mbau satu. Nin ben ye gato suki borbuk git ne ge satu. Nin syun semda wé kadit ye gato semda ben ne. Ji syo suktinggi nai nin wa nin ben suk bok gare, nin yo bi sugum nai Ji wa nde, sane nin ós nje it yo, nin ndek sugum wa dom nde.

⁹ Nin gwat sugum bot os nde,

¹⁰ nin gwat nin bi yu nde, nin gwat san sun dik yo o nde, nin gwat sandal nde, nin gwat kwepu wa nin kan bot os dom nde. Nin ben suk ós nje, sane suk gato nin mitmo, bere yé bi nai nin tepsu nin bi kamba mone.

¹¹ Nin kom mo kota e, nin kem mo kampung e ne yo, nin meret yetu ge dik yo mone gato ben sukndo ete kak an mit wa nin si an kem mo bi nu. Nin si an kem mone sino sane sor nin mu kadit nat ne.

¹² Nin sok mo nu mit ne yo, nin ki nai nje mone do, ’Yefun ete ben sukndo su nin sino.’

¹³ Yé gato kem mo nu ne do iwa nin si án kem mone yo, nin bi sukdu kwop mone, wo yé gato kem mo nu ne do bariwa nin si án kem mone yo, nin ki do, ’Bere Yefun yo ben sukndo su nin more o nde.’

¹⁴ Nin mu kadit pe gato yé bariwa nin si nin bi sukdu-i ne yo, nin tet nin gwes tak su bofuf ne ges kadit nin gwes satu subere yé gato kem mone jam do, án ben sukibit nai nin.

¹⁵ Suk gato Ji ki ré suksangge anare, su kam gato bere Yefun Allah ma ndobot yetu mo bur ré sino, yé mo kota ne ku sukye wai kadit yé mo kota Sodom si Gomora gato Yefun Allah syo bot git wé mo sukibit gato yé mone ben ne.”

Sukye gato bere pakon ku ne

¹⁶ ”Nin jammo suk gato Ji ki ré et, Ji syogat nin mu, nin tepsu jot gan gato yo nggi nde mu mo ndar krok miten. Sane nin kem fra tepsu kwis bam, nin ben suk-i njep tepsu ndabu.

¹⁷ Nin mewa nin nggwa, kadit bere yé meret os wa but nin, or yé gwat nin mu mo yepasye wa ndobot nin, ete ben sukye nai nin. Or o bere yé kwam nin mo ye Yahudi bi nu ari.

¹⁸ Nin benbot suk gato Ji ki ne, sane bere ye gwat nin mu mo yepasye gwem. Bere ye gwat nin mu mo yekwesu gato ye kendo do yeraja ne gwem. Mone bere nin ki sukdu subot os be gato Ji kak wa yetu sok mo Yefun Allah bi rus-i. Nin ki sukdu gato ndo ne nai yepasye ne si yewis yi neya sino.

¹⁹ Ye gwat nin mu mo yepasye wa ndobot nin yo, nin nutbot suk gato bere nin ki ne teker eta nde. Nin nutbot do, ’Men ki sukdu sa u ne?’ teker dom nde, we su kam gane bere Yefun Allah Gen kadum suk gato ndo wa nin ki ne.

²⁰ Sukdu gato bere nin ki ne yo ma kadit nin nde, wo sukdu ne bere ma kadit nin bi Ai, Yefun Allah mo gu ne, An Gen bere kadum sukdu gato ndo wa nin ki mone.

²¹ Bere yé dakai syo án bi nji mo yepasye syim wa gu kwop wé. Sane dom, pa bi ai dakai syo bi pa mo yepasye syim wa gu pa ne kwop wé. Sane dom, pa dakai syo bi yenggras mo yepasye syim wa gu yenggras ne kwop wé.

²² Nin ben Ji bi suk-i, sane bere yé mwa ne sino bariket nin, wo ye gato onyar kem pe mo Ji sor kom mo pe gato or mó, bere ye ne kem ndo to kapyo mato kapyo.

²³ Yé ben sukye nai nin mo kota dik yo it yo, nin titi kadit kota ne mu mo kota yi yo o. Suk gato Ji ki ré suksangge anare, nin mubot ye Israel bi kota mwa ne sino, nin kibot Ji bi sukdu yo or nde tó yo, bere Yetu bi Pa ma nyim wé re.

²⁴ Ye gato farkor ne yo gum sye wai kadit an bi yeguru nde. Sane dom, pakwerut yo gum sye wai kadit an bi yenggras nde.

²⁵ Sane ye gato farkor sane sor an gum sye tepsu an bi yeguru yo, wai mó re. Sane dom, pakwerut gato ku gum tepsu an bi yenggras yo, wai mó re. Rus dik yo bi yesu gato gum do Beelzebul ben sukibit, sane yo, bere yé mwa mo an bi rus-i ne sino ku gum ibit wai kadit an o re.”

Men nyuwa Yefun Allah sor

²⁶ ”Sane nin nyuwa yetu nde. Yefun Allah jam suk mwa ne sino, sane suk gato yé gurik su ré, ri ma bere bor wa yé mwa jam. Suk gato ye dumik wa yu waré, bere yé mwa jam or re.

²⁷ Suk gato Ji ki nai nin mo pe gato ndendu, nin waii ki nai yé mwa su nombrak. Suk gato Yefun Allah tom mo nin dabe, nin waii ki sye wa yé mwa jam.

²⁸ Nin nyuwa ye gato nggiwa gu nin da kridek kwop ne nde, wo nin nyuwa Yefun Allah gato nggiwa gu nin da kridek si nin da gesyos ne sino, ete bare mo bot gesyos.

²⁹ Yé so ndam syik ge we su sugum wokgan det dik yo sor re, wo men bi Ai mo gu mewa ndam ne, sane sor ge dik yo ges gwa mo bur daret nde.

³⁰ Mo nin dakai dom, nin sugo mwa ne sino, Yefun Allah newa re.

³¹ Sane nin nyuwa suk daret nde. Yefun Allah bi sukjimnut sye kas subot men yetu ndo nde, sane Yefun mewa nin wai kadit ndam mwa ne o re.”

Men ki Yefun Yesus gum mo yé mwa gwem

³² ”Ye gato ki mo yé mwa gwem do, an si Ji tepsu dik, bere Ji waii ki sane nai Ji bi Ai mo gu.

³³ Sarewo ye to da jam Ji gum, sarewo an bambrai wa ki Ji gum mo yé mwa gwem, sane bere Ji waii bambrai wa Ji ki ye ne gum mo Ji bi Ai gwem mo gu dom.”

Yefun Yesus ma wa ben yetu kem ndo su yu nde, wo An ben nje maskwa yu

³⁴ ”Te, nin nut do Ji ma mo bur ré wa Ji ben yetu kem ndo su yu bado? Sane nde. Ji ma wa Ji ós yetu kem ndo su yu nde, wo Ji ma wa Ji ben yetu maskwa yu ete wat yu.

³⁵ Ji ma wa Ji ben pa yebris maskwa ket bi ai, pa donggon maskwa ket bi im, nggonkra maskwa ket bi om.

³⁶ Bere ye ku sukmaskwa mo ye ne dakai bi rus wai kadit ye yi neya.

³⁷ Ye to bi sukjimnut sye mo bi ai si bi im wai kadit Ji it yo, Ji bariwa ye ne simo Ji tepsu Ji bi pakon re. Sane dom, ye to bi sukjimnut sye mo bi pa yebris si bi pa donggon ne wai kadit Ji it yo, Ji bariwa ye ne simo Ji tepsu Ji bi pakon re.

³⁸ Ye gato bariwa ku sukye tepsu ye sam bi kwesukwin, ete bariwa sibot suk gato Ji ben ne yo, Ji bariwa ye ne simo Ji tepsu Ji bi pakon re.

³⁹ Ye to werwa an dakai mewa an nggwa, bergan an kwop re, wo ye to bi nggwa mo Ji wa an ben Ji bi suk-i yo, bere an kem ndo to kapyo mato kapyo.”

Ye ku suk mo sukndo gato ye ben ne

⁴⁰ ”Ye to kak an mit wa nin ma ku an, tepsu an kak an mit wa Ji ma ku an. Sane dom, ye to kak an mit wa ma ku Ji, tepsu an kak an mit wa ma ku Yefun Allah gato syogat Ji ma ne.

⁴¹ Ye to kak an mit wa yenabi ma ku an, we yenabi gwat Yefun Allah bi suktaru, bere an sisu yenabi ne sino ku suk gato ndo. Sane dom, ye to kak an mit wa ye gato ben sukndo tepsu Yefun mit ne ma ku an, we ye ne ben sukndo, bere an sisu ye ne sino ku suk gato ndo ne.

⁴² Sane dom, bere ye to syo syur dek nai Ji bi pakon wa pa da, kapre pa ne tepsu ye gato onyar kem mo Ji sim, Ji ki sare do, sangge sor, bere Yefun Allah syo suk gato ndo nai an mo suk gato an ben ne.”