Efesus 1 - Abun Scripture

¹ Ji gato gum do Paulus, gato Yefun Allah bes gum yerasul wa ben Yesus Kristus bi suk-i, ji anato krom surat ré wa nin. Ji krom sukdu ré wa nin yé gato Yefun Allah nai sok mo An bi rus-i mo kota Efesus. Ji krom surat ré wa nin yé gato onyar kem mo Yefun Yesus mone.

² Men bi Ai, Yefun Allah si men bi Yekwesu Yesus Kristus ete mewa nin. Yefun Allah si Yesus Kristus ete uttok nin petok sor.

Kristus kak os wa Yefun Allah syo suk mwa gato ndo nai men ne

³ Men sok mo Yesus Kristus bi rus-i, sane anato Yefun Allah syo suk mwa gato ndo mo gu, gato men mitmo wa ós men kem ndo tepsu An bi pa-i. Sane men bi Yekwesu Yesus Kristus bi Ai, gato Yefun Allah ne, men bes An gum kok et.

⁴ Yefun Allah yo ut bur ré nde tó, An bi sukjimnut wa An nai men tepsu An bi rus-i. Yefun bi sukjimnut nyim wé sare do, An fro men dor subere men ben suk gato ndo sor. Men ben kwa gato ibit yo mo nde, wo men ben suk tepsu An mit sor. Yefun Allah bi sukjimnut sye kas subot men

⁵ kadit ketke ne it, anato An bi sukjimnut wa nai men tepsu An dakai bi pá-i, we men sibot os gato Yesus Kristus kak ne. Yefun Allah mit iwa An fro os ne wa men.

⁶ Men yo ben suk yo nyim wa An nde, wo An dakai bi sukjimnut sye kas subot men, An ben sukndo wai su men dakai yi anato An syo An bi Gan gato An jimnotku ne ma kwop win men. Sane men un Yefun Allah sor.

⁷ Yefun Allah syo An bi Gan, Yesus Kristus ne ma kwop. Yefun Yesus dé sye wa men, An bi An nggwa wa tot suktot mo sukibit gato men ben ne wé. Sane anato Yefun Allah yo maskwa ket men mo sukibit ne o nde, An yo nutbot o nde. Sane men me mone do, Yefun Allah bi sukjimnut sye kas subot men ndo nde, men yo ben suk yo nyim wa An nde, wo

⁸ Yefun Allah ben sukndo mwa yé su men dakai yi. Yefun jam suk mwa kom mo mit, Yefun bi sukjimnut ne ko dom, sane anato An ben suk mwa ne ndo sino su men dakai yi.

⁹ Os ndo gato Yefun Allah fro wa men ne, gato nyim tuya yo bor nde, An iwa ki bor wa men jam it anare. Os gato An fro wa men anato bor mo Yesus Kristus it.

¹⁰ Yefun Allah fro os ré, subere kom mo bi kam-i gato tepsu yo, bere Yesus Kristus wadigan gum Yekwesu wa jom suk mwa mo gu nim ne si bur ré sino.

¹¹ Yefun Allah fro Yesus Kristus wa men sane anato Yefun Allah nai sukjimnut ete ben suk mwa ne sino tepsu pe gato An ki kwop mone it. Kadit ketke it, An iwa nai men sok mo An bi rus-i tepsu pe gato An dakai fro ne. Sane An ben suk mwa ne kas subere suk gato An fro ne bor.

¹² Yefun ben An bi suk-i sane subere men yé gato kwabom kam mo Kristus nyim kadit ye yi ne, men nutbot Yefun Allah gato ben bi suk-i ne ndo yé, ete men bes An gum kok mone sor.

¹³ Nin ye Efesus dom jam Yefun Allah bi sukdu subot os ndo gato Yesus Kristus kak ne. Sukdu ne ós nin kem ndo to kapyo mato kapyo. Nin jam, orete nin onyar kem mo Yesus Kristus, sane anato nin sok mo Yefun Allah bi rus-i ne it. Nin onyar kem mo Kristus, sane Yefun Allah bok An Gen mo nin tepsu An tom ne, subere yé jam do, nin anato Yefun Allah bi pá-i it.

¹⁴ Yefun Allah Gen bok nggwa mo men, sane mone men jam rer do, suk mwa gato An tom su men ne bere men ku mone tó. Yefun Gen bok nggwa mo men, sane mone men jam do, sangge, kom mo rut, Yefun nai men yé gato sok mo An bi rus-i ne wé kadit sukye mwa mo bur ré, ete men si An kem sino. Yefun Allah ben An bi suk-i ndo yé wai o re, sane men bes An gum kok mone sor.

Paulus ki suk su Yefun

¹⁵ Sane, kadit kam gato ji jam do, nin yé Efesus onyar kem mo men bi Yekwesu Yefun Yesus, ete nin bi sukjimnut sye kas subot ye gato onyar kem mo Yefun Yesus ne sino sa,

¹⁶ kadit kam ne, ji ki ndo mo Yefun Allah wa nin noru nombrak petok sor, kam dik yo ji yo mbrinket nin dom nde. Ji ki suk su Yefun wa nin, ji napawa nin petok sor.

¹⁷ Ji ndek mo men bi Yekwesu Yesus Kristus bi Ai, Yefun Allah gato kem kok ne, subere An Gen bok nggwa mo nin, subere nin bi sukjimnut kak ko, ete An Gen kadum Yefun Allah rer nai nin, subere nin jam An sisu ndo o et.

¹⁸ Ji ki suk su Yefun, ji ndek mo Yefun Allah subere Yefun kak nin bi sukjimnut-i ne rer, subere nin kwabom kam mo Yefun Allah gato nai nin sok mo An bi rus-i ne. Ji ki suk su Yefun subere Yefun Allah kak nin bi sukjimnut subere nin jam subot suk mwa gato ndo wai, si suk mwa gato Yefun Allah fro wa An syo nai yé gato onyar kem mo Yefun Yesus ne.

¹⁹ Ji ki suk su Yefun subere Yefun Allah kak nin bi sukjimnut, subere nin jam subot Yefun Allah bi suktinggi gato bor mo men yé gato onyar kem mo An ne. Suktinggi ne sye wai o re. Yefun Allah bi suktinggi ne nggi wai kadit suk mwa ne sino.

²⁰ Suktinggi ne bor su bi kam gato Yefun Allah sun Yesus Kristus kadit sukkwop ete bes Kristus kem kok tak An de syim ge mo gu. Kristus gum kok tepsu Yefun Allah dakai mone it.

²¹ Yesus Kristus gum kok sye wai kadit yekwesu mwa gato kem mo bur ré si gu nim ne sino. Ye yo gum kok sye tepsu An nde. Yesus Kristus nggi wai kadit yepasye mwa ne sino gato jom nje mo bur ré re. Kristus nggi wai kadit suk sato yerom e, aboksye e ne sino o re. Ye yo nggi tepsu Kristus nde. An gum-i anato kok wai kadit yekwesu mwa ne sino gato jom yetu. An gum-i kok wai kadit yekwesu mwa ne su ré sor to kapyo mato kapyo.

²² Yefun Allah syo suk mwa ne sino mo Yesus Kristus syim, ete Yefun Allah bes Yesus Kristus gum Yekwesu mo suk mwa ne sino wa ye gato onyar kem mo Yefun Yesus mo nu ari sino mo bur ré.

²³ Yé mwa gato onyar kem mo Yefun Yesus anato tepsu Yefun Yesus kaim-i mo bur ré. Yé mwa gato onyar kem mo Yefun Yesus mo bur ré ku bi suktinggi ne sino kadit Kristus re. Yesus Kristus syo bi suktinggi nai nje mo pe mwa mo bur ré or sino re.