3 Yohanes 1 - Abun Scripture

¹ Ji, gato yekwesu mo nu ari anato krom surat ré wa nan, Gayus gato ji jimnotku. Ji bi sukjimnut sye kas subot nan ndo nde.

² Ji bi yesyim gato ji jimnotku, ji ki suk su Yefun Allah wa nan subere nan yo ku suki nde, wo ji benadi subere suk mwa gato nan ben ne kas sisu ndo, ete nan kem ndo mo bur ré sor, tepsu nan si Yefun Allah kem ndo su yu it.

³ Men bi nji, ye Kristen ge bok yo ma ki nai ji do, nan sa, jom Yefun Allah bi sukduno gato sangge ne pe, ete nan benbot petok sor, sane ji mit iwa wai o re.

⁴ Ji jam do, ji bi pa benbot Yefun Allah bi sukduno gato sangge sane yo, ji mit at wa wai o re. Suk yi yo ben ji mit at wa sane nde.

Yohanes un Gayus

⁵ Ji bi yesyim gato ji jimnotku, nan ben suk gato ndo ne petok sor wa ós men bi nji, ye Kristen gato ma mone. Kapre nan jam nde yé bok yo gato ma mone, nan ós án re.

⁶ Ye gato nan ós ne ma ki napyo nai nje mo nu ari more jam subot sukndo gato nan ben ne re. Sane nan ós ye gato ma mone su suk gato án mitmo, subere án mu ben Yefun bi suk-i mo pe gato án mu mone. Sane bere Yefun Allah mit iwa re.

⁷ Nan ós yé gato ma ne, we án mu ben Yesus Kristus bi suk-i. Ye gato jam nde Yefun Allah ne bere yo ós án nde.

⁸ Sane men ye Kristen ós ye gato mubot os wa ben Kristus bi suk-i ne et. Men ós án yo, tepsu men si án ben suk sino wa frot Yefun Allah bi sukduno gato sangge anane.

Sukdu subot Diotrefes si Demetrius

⁹ Ji krom surat wokgan wa nje mo nu ari mone subot ye gato ma ne mó re, wo Diotrefes gato iwa bes an dakai gum kok tepsu yekwesu mo nu ari ne, an bariwa jambot ji bi sukdu-i ne.

¹⁰ Sane ji ba ku nin mone yo, ji kibot suk mwa gato an ben ne subere bor wa yé mwa jam. An ki men gum ibit ket kwayo-kwayo. An ki bi sukdu-i ibit subot men ne yo tep nde, wo an ben sukibit yo ó sare do, an bariwa men bi nji, ye Kristen ma mone. Or o, an duyawa yé gato iwa ós ye Kristen ne, ete an syun yé gato iwa ós ye Kristen gato ma ne titi wé subere yé ne yo sok ari si nje mo nu ari ne o nde.

¹¹ Ji bi yesyim gato ji jimnotku, men konem sukibit gato yetu ben ne nde, wo men me sukndo gato ye ben ne, ete men waii benbot sor. Ye gato ben sukndo yo, Yefun Allah bi pá-i anane, wo ye gato ben sukibit yo, ye ne jam nde Yefun Allah re.

¹² Yé mwa un Demetrius gum. Sane dom Yefun Allah un an gum dom, we an benbot Yefun Allah bi sukduno. Men dom un an gum. Nan jam do, suk gato men ki ne sangge.

Sukdu wari

¹³ Ji iwa ji krombot sukdu mwa yo o wa nan, sarewo ji bariwa ji krom mo surat re, we

¹⁴ yo nam nde ge, ji iwa ji dakai ba ku nan, ete ji si nan, men ka we ki men bi sukdu-i nai yu.

¹⁵ Yefun Allah ete uttok nan sor. Nan bi yesyim more ki ndo mo nan. Nan ki ndo mo men bi yesyim, án kadik-kadik gato si nan kem mone.