1 Yohanes 4 - Abun Scripture

Sukdu subot Yefun Allah Gen-i gato sangge si biris bi yekwesu gato gwat men yetu ges mo os ibit

¹ Ji bi nji ji bi nyanggon gato ji jimnotku, yé mwa ki do, Yefun Allah Gen bok nggwa mo án, sane sukdu gato án ki ne ma kadit Yefun Gen. Sarewo nin jammo án bi sukdu-i kekro nde, nin watbot sukdu ne kom-kem et, subere nin jam do, án ku án bi sukdu-i kadit Yefun Allah Gen bado, án ku án bi sukdu-i kadit suk yi neya e? Sane nin watbot sisu ndo et, we su ré yenabi mwa gato kidar suk mu ki bi sukdu-i bot peyo-peyo mó re.

² Nin watbot sukdu gato ye ki ne subere nin jam do, sukdu ma kadit Yefun Allah Gen bado, kadit biris bi yekwesu gato jom ye ne e? Nin nutbot sare do, ye gato ki do, Yesus Kristus ma mo bur ré su kaim tepsu yetu yo, Yefun Allah Gen kem mo ye ne.

³ Sarewo ye gato ki do, Yesus Kristus ma mo bur ré yo tepsu yetu nde yo, Yefun Allah Gen yo kem mo ye ne nde. An ki an bi sukdu-i kadit biris bi yekwesu gato tepsu yeko wa Kristus ne. Nin dakai jam suga nyim ne do, biris bi yekwesu ne bere ma, ete ré ne, biris bi yekwesu ne ben bi suk-i bor mo bur ré re.

⁴ Sarewo ji bi pa, nin anato sok mo Yefun Allah bi rus-i. Nin sa, nin misyar yenabi gato kidar suk ne si án bi sukdu-i, we Yefun Allah Gen gato bok Nggwa mo nin, An bi suktinggi nggi kadit biris bi yekwesu bi suktinggi-i gato jom ye gato jam nde Yefun mo bur ré.

⁵ Yenabi gato kidar suk, án jam nde Yefun, sane án ki án bi sukdu-i ne ma kadit yetu bi sukjimnut-i sor re. Sane ye gato jam nde Yefun mo bur ré bere jambot yenabi ne bi sukdu-i.

⁶ Sarewo men ré sok mo Yefun Allah bi rus-i, sane ye gato mit kem mo Yefun Allah, bere an jambot men bi sukdu-i. Wo ye gato jam nde Yefun Allah, bere an yo jambot men bi sukdu-i nde. Sane kadit ne men jam do biris gne pet moe ye ne. Men jam do Yefun Allah Gen bi sukdu-i ne sangge, tara kadit biris bi yewkesu bi sukdu-i gato gwat nje ges mo os ibit.

Yefun Allah bi sukjimnut sye kas subot men yetu petok sor

⁷ Ji bi nji ji bi nyanggon gato ji jimnotku, men bi sukjimnut sye kas subot yu, we Yefun Allah ben men nggiwa men bi sukjimnut sye kas subot ye yi ne. Sane men bi sukjimnut sye kas subot ye yi, bere yé jam do, men anato ye gato mit kem mo Yefun Allah, gato Yefun Allah nai sok mo An bi rus-i ne.

⁸ Yefun Allah bi sukjimnut sye kas subot yetu petok sor, sane ye gato bi sukjimnut yo kas subot ye yi nde, ye ne jam nde Yefun Allah re.

⁹ Yefun Allah bi sukjimnut sye kas subot men yetu, An kadum nai men sare do, An syogat An bi Gan ka dik ne ma mo bur ré, subere men yetu ku os wa men kem ndo.

¹⁰ Men jam sukjimnut sye gato kas subot yetu sisu sangge anare: Men yetu bi sukjimnut sye kas subot Yefun Allah sisu sangge nde, wo Yefun Allah sa, bi sukjimnut sye kas subot men yetu sisu sangge, anato bor mo gato An syogat An bi Gan ma bi nggwa kwop wa tot men bi suktot mo sukibit gato men ben ne wé re.

¹¹ Ji bi nji ji bi nyanggon gato ji jimnotku, Yefun Allah bi sukjimnut sye kas subot men, sane it yo, men waii bi sukjimnut sye kas subot yu dom et.

¹² Men yetu yo me Yefun Allah su men gro mo nde, sarewo men do bi sukjimnut sye kas subot yu it yo, bere Yefun Allah si men tepsu dik, ete An ben men nggiwa men bi sukjimnut sye kas subot ye yi sisu sangge tepsu Yefun re.

¹³ Yefun Allah syo An Gen bok nggwa mo men anato men jam do, Yefun Allah si men tepsu dik, sane dom men si Yefun Allah tepsu dik.

¹⁴ Men dakai me Yefun Allah bi Gan su men gro re, ete men ki sukdu subot An frekbot nje subere ye jam do, Yefun Allah syogat An bi Gan ma mo bur ré wa An nai men kadit sukye, ete kak os ndo wa men kem ndo to kapyo mato kapyo.

¹⁵ Ye to ki an bi sukjimnut rer mo yé mwa gwem do, sangge, Yesus Kristus anato Yefun Allah bi Gan ne yo, bere Yefun Allah si ye ne tepsu dik. Sane dom, ye ne si Yefun Allah tepsu dik.

¹⁶ Men dakai jam do, sangge Yefun Allah bi sukjimnut sye kas subot men. Men kwabom kam mo An do, bere An bi sukjimnut sye kas subot men petok sor. Yefun Allah bi sukjimnut sye kas subot men yetu petok sor. Sane ye to bi sukjimnut sye kas subot ye yi petok ne yo, ye ne si Yefun Allah tepsu dik. Sane dom Yefun Allah si ye ne tepsu dik.

¹⁷ Sane men jam do, men bi sukjimnut sye kas subot ye yi sisu sangge yo, bere kam gato Yefun Allah ma ndobot men yetu, men yo nyuwa nde. Men ben men bi suk-i mo bur ré tepsu Yesus Kristus ben An bi suk-i, sane su kam ne yo, bere men yo nyuwa nde.

¹⁸ Yefun Allah bi sukjimnut sye kas subot men, sane men yo nyuwa Yefun nde. Yefun bi sukjimnut sye kas subot men sisu sangge anato syun sukjimnut gato ben men nyu ne or wé kadit men re. Sane ye gato nyuwa kam gato bere Yefun ma ndobot men yetu ne, ye ne yo jam Yefun bi sukjimnut sye kas subot an sisu sangge nde tó.

¹⁹ Yefun Allah bi sukjimnut sye kas subot men nyim, anato men waii bi sukjimnut sye kas subot An re.

²⁰ Ye gato ki do, an bi sukjimnut sye kas subot Yefun Allah, sarewo an yo bi sukjimnut sye kas subot an bi nji mo Kristus bi rus-i nde yo, ye ne kidar kone, we ye gato ku an bi nji, ete an yo bi sukjimnut sye kas subot an bi nji nde yo, sane bere an bi sukjimnut sye kas subot Yefun Allah gato an yo me su an gro nde sa u ne? Bere yo mo nde.

²¹ Sane Yefun duno men su sukduno dik yo sare do, ”Ye to bi sukjimnut sye kas subot Yefun Allah, an bi sukjimnut sye kas subot an bi nji ne dom et.”